Փաստ ինֆո

Երեկվա թեժ քննարկումներից հետո օրենքով գողեր են կապվել ինձ հետ և սպառնացել: Այս մասին ԱԺ-ում Վճռաբեկ դատարանի դատավորի ընտրության հարցի քննարկման ժամանակ հայտարարեց անկախ պատգամավոր Արման Բաբաջանյանը.

«Զգուշացնում եմ, սատանի մայլեն քյանդրբազություն չանեք, դուք իմ վախը վաղուց բռնել եք: Ես, երեք ու կես տարի անազատության մեջ գտնվելով, օրենքով գողերի հետ էլ եմ նստել, քրեական հեղինակությունների հետ էլ եմ առնչվել: Այնպես որ վե՛ր ընկեք տեղներդ, ձեր գործերով զբաղվեք, կգանք ձեր հետևից»,-ասաց պատգամավորը և հետաքրքրվեց, թե նիստին ինչու՞ ներկա չէ ԲԴԽ նախագահ Ռուբեն Վարդազարյանը:

ԱԺ նախագահ Արարատ Միրզոյանն էլ արձագանքելով Բաբաջանյանին նշեց, Ռուբեն Վարդազարյանը նեղ ընթացակարգային առումով այս փուլում անելիք չունի և կարող է բացակայել.

«Մեր պրակտիկայում և կարծում եմ մինչև մեզ եղած պրակտիկայում այնպես է եղել, որ հարցը ներկայացնողը գուցե էթիկական տեսանկյունից մինչև վերջ ներկա է եղել Ազգային ժողովի նիստերի դահլիճում, սակայն կրկնում եմ, գործառութային, ընթացակարգային առումով պարոն Վարդազարյանը որևէ անելիք չուներ»,-ասաց Միրզոյանը:

Անդրադառնալով Բաբաջանյանի՝ սպառնալիքների վերաբերյալ հայտարարությանը, Միրզոյանը նշեց, որ եթե սպառնալիքի տարրեր են պարունակում, դա հաղորդում է հանցագործության մասին.

«Հրապարակավ հայտարարել եք, կարող եք նաև հետամուտ լինել»,-ասաց ԱԺ նախագահը:

Աղբյուր` Փաստինֆո