Փաստ ինֆո

 Գործ ունենք պրիմիտիվ քաղաքական հետապնդման հետ: Երբ քաղաքական իշխանությունն ունենում է քաղաքական հակառակորդ, ինչպես տեսնում ենք վերջին երեք տարիներին, անպայման պետք է լինի քրեական գործ: Այս մասին ՔԿ-ից դուրս գալիս ասաց փաստաբան Արամ Վարդևանյանը՝ անդրադառնալով Վազգեն Մանուկյանի դեմ հարուցված քրեական գործին:

Փաստաբանը վստահեցրեց, որ սա ՔԿ-ի՝ քաղաքական հայտարարությունները քրեական օրենսգրքի հետ առնչության մեջ դիտարկելու փորձ է։

«Խոսքերից մեկը վերաբերում էր պլան A, պլան B: Եթե պլան B-ին ուղղված կոչ լիներ, ապա  պլան B-ի իրացումը կտեսնեինք: Պատգամավորների վերաբերյալ մի քանի հայտարարություններ էին հնչել հանրահավաքի ժամանակ, դրանք պետք է դիտարկել 2018թ-ի ապրիլ-մայիս իրադարձությունների հետ ուղղակի կապի մեջ: Եթե ՔԿ-ն և դատախազությունը ընդունելի են համարել սև ժապավեն կպցնելը, դագաղներ տեղադրելը ՀՀԿ պատգամավորների տների մոտ, ապա տվյալ դեպքում Վազգեն Մանուկյանի հայտարարությունը դրանից տասնապատիկ ավելի նվազ է, որովհետև խոսքը գնում է հանրային պարսավանքի մասին»

Վարդևանյանը տեղեկացրեց, որ խափանման միջոց է ընտրվել ստորագրությամբ չհեռանալը, որն էլ բողոքարկվելու է.

«Բոլոր հնարավոր քրեադատավարական գործիքներով արձագանքելու ենք այս իրավիճակին»,-ասաց փաստաբանը:

Աղբյուր` Փաստինֆո