Փաստ ինֆո

Փաշինյանի հրաժարականը պահանջող քաղաքացիները Բաղրամյան պողոտայից հեռանալու մտադրություն չունեն, եթե անգամ կրկին դիպուկահարների նկատեն։

Հիշեցնենք՝ մարտի երեքին Ազգային ժողովի շենքի ներսում դիպուկահարներ էին տեղակայվել՝ ի տես բոլորի՝ նշանառության տակ վերցնելով Բաղրամյան պողոտայում Փաշինյանի հրաժարականը պահանջող ակցիայի մասնակիցներին։ Բացի այդ՝ տեղադրվել էին լուսաձայնային նռնակներ, զոդվել են նաև ԱԺ դարպասները։ Այդուհանդերձ՝ հայրենիքի փրկության շարժման հանրահավաքը ոչ միայն կայացավ, այլ նաեւ քաղաքացիները շարունակում են գիշերել Բաղրամյան պողոտայում՝ այն երկկողմանի փակ պահելով։ «Փաստինֆո»-ի նկարահանող խմբի այցելության քաղաքացիները կրկին մայրաքաղաքի գլխավոր պողոտայում էին ու նշում՝ իրենց դիպուկահարներով չեն վախեցնի, շատ լավ հասկանում են, որ դա պարզապես ուժի ցուցադրություն էր՝ ուրիշ ոչինչ։

ՀՅԴ անդամ Բագրատ Եսայանը «Փաստինֆո»-ի հետ զրույցում վարչապետի պահվածքը մանկամիտ որակեց։

«Նա չէր վարանի նույնիսկ մարտի մեկին, երբ ոստիկանների հետ բախման էր տանում ժողովրդին և նրա հոգին փառավորվում էր, երբ ոստիկաններին ծեծում էին, կամ զանգվածաբար հետապնդում էին, այդ մարդը ուղղակի չէր վարանի հրաման տալ՝ կրակել, եթե նույնիսկ մի քանի տաքարյուն մարդ փորձեին անցնել ցանկապատի մյուս կողմը։ Դա կորակվեր արդեն որպես հեղաշրջման փորձ, որպես զինված բախում, հետագա սցենարները՝ նրա հիվանդ ուղեղի ունակությունը՝ մենք բոլորս էլ գիտենք»։

Հայրենիքի փրկության շարժման հետևորդների պայքարը պողոտայում մեկ շաբաթ է՝ շարունակվում է։ Գալիս են պայքարի հրապարակ, նրանցից ոմանք էլ գիշերում են այստեղ։ Քաղաքացիներին միավորել է ընդհանուր պահանջը՝ վարչապետ Նիկոլ Փաշինյանի հրաժարականը: ֆիքսել են, որ թավշյա հեղափոխության առաջնորդը, որ խոստացել էր, որ ժողովուրդն է իշխանության տիրակալը, այսօր զենքն ուղղում է ժողովրդի վրա, հավաքներ ու երթեր կազմակերպում ու բախումների սպասում:

«Դեպքերի տրամաբանության մեջ պետք է նայել. Առաջին իսկ օրվանից՝ առաջին իսկ գիշերը, այդ անհավասարակշիռ անձնավորությունը բունկերից սպառնում էր ժողովրդին, կոչ էր անում վրեժ լուծել նախկիններից։ Այս իրավիճակում, սա միակ ձևն է, որ կարող է պահել իր իշխանությունը՝ առճակատում, քաղաքացիական բախումներ, տարբեր ուժերի ներկայացուցիչների միջև։ Մենք տեսանք, որ ԳՇ պետի հայտարարության առիթով իր հրավիրած միտինգը առաջնորդեց դիտմամբ այն տարածքով, որտեղ հավաքված էին ընդդիմության ներկայացուցիչները ու համախոհները։ Հրաշքով այդ պահին բախումներից հաջողվեց խուսափել։ Երեկվա դեպքը ևս դրա տրամաբանական շարունակությունն է»,- «Փաստինֆո»-ին ասաց Եսայանը, հավելեց, որ հսկայական ռեսուրսը օգտագործելուց հետո՝ մարզերից վարչական ռեսուրս բերելով, վարչապետը իբրև թե ինքնավստահ է դարձել, բայց հաստատ վախեցած է։

Բաղրամյան պողոտայում շարունակում են տեղադրված մնալ վրանները, վառարաններն ու բեմահարթակը։ Քաղաքացիները հիմա էլ հայտարարում են, որ այստեղ են մնալու, մինչև իրենց պահանջը չկատարվի, չեն վախենալու ոչ մի դիպուկահարից։ Պայքարի ավարտի մասին միայն Փաշինյանի հրաժարականի դեպքում կարձանագրեն։ Քաղաքացիները նաև իրենց աջակցությունն են հայտնում Զինված ուժերի Գլխավոր շտաբի հայտարարությանը:

Քաղաքացիների գնահատականները՝ տեսանյութում։

Աղբյուր` Փաստինֆո