Փաստ ինֆո

Փաստաբան Անահիտ Սարգսյանը բաց նամակ է հղել ՀՀ նախագահ Արմեն Սարգսյանին։ Բաց նամակը հրապարակվել է Սարգսյանի ֆեյսբուքյան էջում։

«Բաց նամակ ՀՀ Նախագահ Արմեն Սարգսյանին

ՀՀ Նախագահ Արմեն Սարգսյան,

2021թ. փետրվարի 25-ին Ձեզ է ներկայացվել ՀՀ զինված ուժերի գլխավոր շտաբի պետ, գեներալ-գնդապետ Օնիկ Գասպարյանին պաշտոնից ազատելու վերաբերյալ առաջարկությունը՝ համապատասխան հրամանագրի նախագծով:

Դուք 27.02.2021 -ին առարկություններով վերադարձրել եք հրամանագրի նախագիծը՝ նշելով, որ Հանրապետության նախագահը հետապնդում է մեկ նպատակ՝ երկիրը զերծ պահել սահմանադրական կարգին ու անվտանգությանը սպառնացող վտանգներից, ապահովել երկրի կայունությունը և զինված ուժերի բնականոն գործունեությունը:

Ընդ որում, Ձեր դիրքորոշումը հիմնվել է այն եզրակացության վրա, որ հրամանագրի նախագիծն առերևույթ հակասում է Սահմանադրությանը:

Միաժամանակ փաստել եք, որ հրամանագրի նախագիծը Հանրապետության նախագահին է ներկայացվել զինված ուժերի գլխավոր շտաբի պետի և գլխավոր շտաբի ավելի քան չորս տասնյակ բարձրաստիճան զինվորական պաշտոնյաների հայտարարությունից հետո, ռազմական դրության իրավիճակում, քաղաքական ճգնաժամի և անվտանգային լուրջ մարտահրավերների առկայության պայմաններում:

Այնուհետև, ի պատասխան տարբեր շահարկումների, 01.03.2021 թ-ին հայտարարություն եք տարածել, որ անհիմն շահարկվում է Ձեր կողմից հրամանագրի նախագիծը առարկություններով վերադարձնելու փաստը:

Այս կապակցությամբ ևս մեկ անգամ ընդգծել եք, որ Հանրապետության նախագահն որոշումները կայացնում է առաջնորդվելով բացառապես համազգային և համապետական շահերով:

Հաջորդ օրը՝ 02.03.2021 թ-ին Ձեր կողմից նախագիծը չի ստորագրվել: Ունենալով աշխատակազմ և իրավաբաններ՝ դուք գիտեիք, որ չստորագրելու և Սահմանադրական դատարան չուղարկելու պարագայում այն ուժի մեջ է մտնում:

Ուստի, հաշվի առնելով վերոգրյալը, խնդրում եմ պատասխանել.

1. Արդյո՞ք չեք կարծում, որ նախագիծն ուժի մեջ մտնելու պարագայում առաջանում է Հայաստանի Հանրապետության սահմանադրական կարգին ու անվտանգությանը սպառնացող իրական վտանգ, խաթարվում է երկրի կայունությունը և զինված ուժերի բնականոն գործունեությունը /ինչպես նշել էիք Ձեր 27.02.2021 թ-ի հայտարարության մեջ/:

2. Ինչու՞ տվյալ նախագիծը Ձեր կողմից չուղարկվեց Սահմանադրական դատարան, որպեսզի կանխվեն Ձեր՝ 27.02.2021 թ-ի հայտարարության մեջ նշված հետևանքները /հակառակ դեպքում, ստացվում է, որ դուք ցանկանում եք այդ հետևանքների առաջացումը/:

3. Ինչպե՞ս եք գնահատում 02.03.2021 թ-ին Ձեր կողմից դսևորված անգործությունը /չստորագրել, բայց և չուղարկել Սահմանադրական դատարան/՝ Ձեր կողմից 01.03.2021 թ-ին տարածված հայտարարության մեջ նշված համազգային և համապետական շահերի համատեքստում, որոնք, ըստ հայտարարության, ուղղորդում են Ձեզ:
Միաժամանակ, կցանկանամ ստանալ առարկայական և ոչ վերացական պատասխան, ինչպիսին է, օրինակ՝ Նախագահն իրավունք ունի չստորագրել նախագիծը:

Այդ լիազորության մասին, լինելով իրավաբան, տեղյակ եմ, սակայն, որպես ՀՀ քաղաքացի, ցանկանում եմ ստանալ այն հարցի պատասխանը, թե Ձեր տվյալ լիազորության իրացումը /չստորագրելը/ որքանո՞վ է նպաստում ՀՀ-ում կայունության հաստատմանը, զինված ուժերի բնականոն գործունեությանը, սահմանադրական կարգին ու անվտանգությանը սպառնացող վտանգներից երկիրը զերծ պահելուն»,- գրել է Անահիտ Սարգսյանը:

Աղբյուր` Փաստինֆո