Փաստ ինֆո

«Ես դեռս մի քանի շաբաթ առաջ եմ բարձրաձայնել այն մասին, որ Կարմիր շուկայի հատվածում Ադրբեջանը տարածքային նկրտումներ ունի, ինչի վերաբերյալ լուրերը շատ արագ հերքվեցին Արցախի նախագահ Արայիկ Հարությունյանի կողմից: Չեմ զարմանում, որ այդ մասին խոսակցությունները կրկին վեր են հանվել, առավել ևս՝ չեմ զարմանա, եթե առաջիկա օրերին լսենք, որ Կարմիր շուկայի հատվածում ադրբեջանական կողմին հաջողվել է համատեղ օգտագործման ճանապարհ զավթել»,- «Փաստինֆո»-ի հետ զրույցում ասել ռազմական վերլուծաբան Հայկ Նահապետյանը։ Ինչպես արդեն հաղորդել ենք՝ տելեգրամյան ալիքներն այսօր հաղորդել էին, որ ադրբեջանական կողմը հանդես է եկել հերթական անհավանական թվացող պահանջով, այս անգամ՝ Արցախի Կարմիր Շուկա բնակավայրի հատվածում համատեղ օգտագործման ճանապարհ ձեռք բերելու վերաբերյալ, փոխարենը առաջարկելով հայկական կողմին հանձնել 30 ռազմագերի:

Վերլուծաբանը նկատել է՝ այս ամենում անթույլատրելի է հանդուրժել հայ ռազմագերիների նկատմամբ այսօրինակ անարժանապատիվ վերաբերմունքը. «Փաստորեն, ստացվում է, որ Ադրբեջանը էժանագին առուծախի թեմա է դարձրել հայ ռազմագերիների ճակատագիրը: Տվեք ինձ հողեր, կտամ մի քանի ռազմագերի, սա է ադրբեջանական կողմի որդեգրած քաղաքականությունը: Արդյունքում, այս կերպ այդ երկիրը աստիճանաբար վերահսկողություն է ստանում նախ՝ Արցախի ռազմավարական նշանակության ճանապարհների և բարձրունքների նկատմամբ, իսկ Սյունիքում նույն պրոցեսը տեղի է ունենում՝ կիրառելով հոգեբանական մեխանիզմեր: Տեղում ապրող գյուղացիների և մեր հայրենակիցների համար ստեղծելով ապրելու և վաստակելու համար անհնարին պայմաններ, փաստորեն, պատերազմից հետո էլ, Ադրբեջանը հաջողությամբ շարունակում է հողազավթման և հայաթափման իր ծրագիրը, ինչը, ինչպես գիտենք՝ իր գլխավոր նպատակն է», - ասում է Հայկ Նահապետյանը:

Խոսելով այն մասին, թե ինչպե՞ս և ի՞նչ միջոցներով է պետք կանխել վերահաս վտանգը՝ բանախոսը նշել է, որ այդ մասին բազմիցս բարձրաձայնվել է, ահազանգվել է՝ Հայաստանում անհապաղ իշխանափոխության անհրաժեշտության կա, հակառակ պարագայում՝ մենք վտանգում ենք կորցնել ոչ միայն Արցախից մնացած հատվածի և Հայաստանի Հանրապետության տարածքային ամբողջականությունն, այլև պետականությունը:

Տեղեկացնենք, որ նյութի պատրաստմանը զուգահեռ, «Փաստինֆո» լրատվականը կապ հաստատեց Արցախի Կարմիր Շուկա բնակավայրում ապրող մեր հայրենակիցների հետ, որտեղից լրատվամիջոցին փոխանցեցին, որ իրավիճակն այս պահին գյուղում հանգիստ է, արտառոց ոչինչ չի կատարվում:

Հիշեցնենք, որ Mediaport-ի հաղորդած տեղեկությունների համաձայն, Ադրբեջանցիները Արցախի Կարմիր Շուկայի հատվածում համատեղ օգտագործման ճանապարհ են պահանջում ՝ փոխարենը խոստանալով ռազմագերիների վերադարձ: Խոսքը մոտ 30 ռազմագերու մասին է: Եթե այդ ճանապարհը տրվի, ստացվում է, որ Մարտունու շրջանի հետ կապը մնում է թշնամու հսկողության տակ:

Մեդիահարթակը տեղեկացնում է նաև, որ ԱԳՆ-ն դեմ են այդ գաղափարին: Պայմանավորվածությանը կողմ է արտահայտվել Արայիկ Հարությունյանը և Նիկոլ Փաշինյանը։ Այս պահին հարցի շուրջ բանակցությունները վարում է անձամբ ԱԱԾ ղեկավար Արմեն Աբազյանը։

Հեղինակ՝ Նվարդ Մանվելյան

Աղբյուր` Փաստինֆո