Փաստ ինֆո

Ակնհայտ է, որ բանակին քաղաքական գործընթացների մեջ ներքաշելը նախապես մտածված է և միտումնավոր է արվում՝ ներքին անկայունություն ստեղծելու նպատակով։ Այս մասին ԱԺ-ում ասաց պաշտպանության և անվտանգային հարցերի հանձնաժողովի նախագահ Անդրանիկ Քոչարյանը։

Պատգամավորը, անդրադառնալով «Ազգ, բանակ, հաղթանակ» կարգախոսին, նշեց, որ այն ընկած էր Արցախյան առաջին պատերազմի հաղթանակների կերտման հիմքում, որոնց մեջ իրենց ներդրումն են ունեցել Խաչատուրովը և մի շարք այլ գեներալներ․ «Այդ կարգախոսը, սակայն, փոխվեց հոկտեմբերի 27-ից հետո, երբ տարբեր առիթներով զինված ուժերը քաղաքական գործընթացների ակտիվ մասնակից դարձան։ Այդ ժամանակ էլ բանակ ներթափանցեցին անտարբերությունն ու կոռուպցիան, որոնք էլ հանգեցրեցին 2016թ․-ի ապրիլյան պատերազմի պարտությանը, ապա 2020-ի երկրորդ պատերազմի ընթացքում զինված ուժերի ղեկավարության կողմից բանակի ոչ պրոֆեսիոնալ կառավարմանը։ Ինչպես Խաչատուրովը, այնպես էլ բազմաթիվ գեներալներ իրենց ծառայության ընթացքում բանակը քաղաքական նպատակների սպասարկու դարձնելու համար խրախուսվեցին ավելի բարձր կոչումներով։ Այժմ էլ այս նույն գեներալներից ոմանք ևս մեկ անգամ ապացուցում են, որ մարտի 1-ի դեպքերի ընթացքում 0038 հրամանով ուղղակիորեն մասնակցել են քաղաքական դրդապատճառներով բանակի օգտագործմանը»,-նշեց Անդրանիկ Քոչարյանը։

Պատգամավորը նշեց, որ նախքան ԳՇ-ի հայտարարությունը, ընդդիմությունը բանակի գեներալիտետին ևս մեղադրում էր պարտության մեջ, սակայն այժմ ընդդիմադիրները կտրուկ փոխել են պարտության վերաբերյալ իրենց դիրքորոշումը․ «Պատերազմին հաջորդող ծանր ժամանակներում այս մարդիկ կախվել են բանակի փեշերից ու թույլ չեն տալիս, որ այն ֆիզիկապես և բարոյապես վերականգնվի։ Ի վերջո զինված ուժերը միայն այդ հայտարարության տակ ստորագրած գեներալները չեն, այլև զինվորները և սպայակազմը, որոնք հերոսաբար 44 օր իրենց ուսերին կրեցին պատերազմի ամբողջ դժվարությունները։ ԳՇ ղեկավարության մի մասն իշխանությունը տապալելու նպատակով բացահայտ ռազմական հեղաշրջման փորձ է անում, որը պետք է խստորեն դատապարտվի»,-ասաց պատգամավորը։

Աղբյուր` Փաստինֆո