Փաստ ինֆո

Արտահերթ ընտրությունները կարող են արդյունավետ լինել, սակայն նախքան այդ՝ երկրում պետք է կայունություն լինի։ Առաջին հերթին պետք է առկա ճգնաժամը կառավարել։ «Փաստինֆո»-ի հետ զրույցի ժամանակ նման կարծիք հայտնեց ԱԺ պատգամավոր Սոֆյա Հովսեփյանը։

Պատգամավորի կարծիքով՝ ընտրություններն արդյունավետ կարող են լինել նաև խորհրդարանում այլ ուժերի ներգրավվածության առումով։

Հարցին՝ հնարավո՞ր է իշխանությունները որևէ երաշխիք ներկայացնեն, որ նախքան ընտրությունները կսառեցնեն տարածքներ հանձնելու գործընթացը, Սոֆյա Հովսեփյանը նկատեց՝ այդ առումով ոչ մի գրավոր երաշխիք չկա։ Ավելին, նույն կերպ երաշխավորվում էր, որ պատրաստվում ենք պատերազմին, այնինչ պատգամավորի խոսքով փաստը ցույց տվեց, որ պատրաստման իմիտացիա է եղել․

«Այդ առումով երաշխիքներ չկան, չեն էլ կարող տալ։ Մնում է՝ իրապես գործընթացը գիտակցաբար կանխեն, մինչև ճգնաժամը կառավարելի դառնա։ Տարածքներ այլևս չեն հանձնվում, էլ ինչ տարածք են թողել, որ մի հատ էլ հանձնեն։ Սահմանագծերի ճշգրտման հարց կա, որն անգրագետ կերպով է կազմակերպվում»,-նշեց պատգամավորը։

Դիտարկմանը, որ սահմանագծերի ճշգրտման հետևանքով էլ, միևնույն է, որոշ հողեր անցնում են թշնամու վերահսկողության ներքո, Սոֆյա Հովսեփյանն ընդգծեց՝ պատճառները խնդրին անգրագետ մոտեցումը և մասնագետների բացակայությունն են․ «Մասնագետ չկա։ Ով ուզում գալիս, մտնում ու ասում է՝ դուք այստեղ պետք է կանգնեք, դուք էլ այնտեղ պետք է կանգնեք։ Գյուղացին է կանգնում ադրբեջանցու հետ սահմանագծման հարցերի ժամանակ,-ասաց պատգամավորը՝ կարևորելով, որ նախքան արտահերթ ընտրությունները պետք է այդ գործընթացն ավելի խելացի կերպով իրականացվի, մասնագետներ ներգրավվեն։

Սոֆյա Հովսեփյանի կարծիքով իշխանությունները պարտավոր են նման երաշխիք տալ։

Պատգամավորը գտնում է, որ մինչև ընտրությունները պետք է ժամանակավոր կառավարում կազմակերպվի, հակառակ դեպքում ընտրությունները հերթական ճգնաժամը կառաջացնեն․ «Մենք դեռ չենք կայունացել և մեկ էլ գերիների ու մի շարք այլ հարցեր թողած, ընկնելու ենք ընտրությունների, քարոզարշավի հետևից։ Սա ուղղակի անլրջություն է»,-նշեց պատգամավորը։

Հարցին՝ գործող իշխանությունը չի՞ կարող երկրում ստեղծված ճգնաժամը կարգավորել, Սոֆյա Հովսեփյանն արձագանքեց․ «Չեմ կարող ասել կկարողանա, թե ոչ, բայց ավելի արդյունավետ կլինի ժամանակավոր համախոհության կառավարություն ստեղծել։ Այսինքն` երկիրն այս օրին հասցրած բոլոր ուժերը նստեն, խելք խելքի տան, որոշակի ժամանակահատվածում կառավարեն, մինչև ընտրություններ կանցկացվեն»։

Անդրադառնալով վարչապետի՝ կիսանախագահական համակարգի անցնելու մասին հայտարարությանը, Սոֆյա Հովսեփյանը նկատեց՝ ստացվում է յուրաքանչյուրն իր տեղն ամրացնելու համար ինչ-որ բան է մոգոնում․

«2015-ին հորինվեց խորհրդարանական վիճակը, հիմա՝ 2021-ին, հորինվում է կիսանախագահական համակարգը։ Վարչապետական վիճակում ի՞նչ է արվել, որ հիմա էլ կիսանախագահականում արվի։ Այսինքն` անունը փոխելուց, գործելաոճը կփոխվի՞։ Ենթադրենք կիսանախագահական եղավ և խորհրդարանը չընտրեց, բայց գործելաոճը փոխվելու՞ է։ Խորհրդարա՞նն է իրեն խանգարում աշխատել, խորհրդարա՞նն է ձեռքը բռնել ու ասել՝ գնացեք ցույց արեք գործ անելու փոխարեն։ Ամեն մեկը փորձում է իր ձևով իր դիրքերն ամուր պահի»,-ասաց պատգամավորը։

Հիշեցնենք, որ ՀՀ վարչապետ Նիկոլ Փաշինյանը հայտարարել էր՝ հոկտեմբեր ամսին հանրաքվեով պետք է ընդունեն նոր Սահմանադրություն կամ սահմանադրական փոփոխություններ․ «Ի վերջո կիսանախագահական կառավարման համակարգին անցնելը հնարավոր տարբերակներից մեկը պետք է լինի»,-ասել էր Նիկոլ Փաշինյանը։

Աղբյուր` Փաստինֆո