Փաստ ինֆո

Բաղրամյանում կանգնած որոշ քաղաքական ուժերին պետք է, որ հայ ժողովուրդը խեղճ լինի, վիզը ծուռ, կոտրված լինի, բայց մենք պետք է միասնական լինենք, ուժեղանանք և առաջ գնանք։ Այս մասին լրագրողների հետ զրույցի ժամանակ ասաց ԱԺ փոխխոսնակ Ալեն Սիմոնյանը։ 

Վերջինս, անդրադառնալով մարտի 1-ին անցկացրած հանրահավաքին, նկատեց՝ դա հավաքականության, միասնականության նշան էր․

«Համացանցում որոշ մարդիկ իրենց թույլ են տվել դրա հետ կապված մեկնաբանություն անել և նրանց մեջ շատ են այն մարդիկ, որոնք Բաղրամյան պողոտայում գնդակահարության տեսարաններ էին կազմակերպում, երգի և պարի միջոցառումներ անում»,-ասաց Ալեն Սիմոնյանը։

Հարցին՝ մարդկանց հանրահավքի բերելու համար վարչական ռեսուրս կիրառե՞լ են, Ալեն Սիմոնյանն ասաց․

«Կարելի է նման մեղադրանքներ անել ընդդիմությանը, ասել, որ ընդդիմությունը բերում է իր աշխատողներին, իշխանությանը կարելի է մեղադրել և ասել, որ պետական ռեսուրս է ծախսում։ Կա մի պարզ ճշմարտություն, երբ հրապարակում կանգնած ժողովուրդը միասնական վանկարկում է Նիկոլ վարչապետ, երբ միասնական լույս են վառում, միասնական մասնակցում միտինգին, խոսել, որ ՔՊ գրասենյակը կազմակերպել է իր համակիրների տեղափոխումն «ա» կետից «բ» կետ, և դա անվանել վարչական ռեսուրսների օգտագործում, անլուրջ է։ Այո կազմակերպվել է ինչ-որ մարդկանց տեղափոխում, բայց դա անվանել վարչական ռեսուրսի կիրառում, կլինի այն պարագայում, երբ ԱԺ-ի կամ ՊՆ-ի ավտոբուսն ուղարկենք ՔՊ-ի համակիր բերելու»,-ասաց Ալեն Սիմոնյանը։

Վերջինս ընդգծեց՝ ՀՀ-ում բոլոր տեսակի հարցումներով ՔՊ-ն և վարչապետ Նիկոլ Փաշինյանն ունի տասնապատիկ ավելի շատ վարկանիշ, քան ընդդիմությունը։

Աղբյուր` Փաստինֆո