Փաստ ինֆո

«Եթե բանականությամբ առաջնորդվենք, ապա անհնար է որևէ մեկնաբանություն տալ Նիկոլ Փաշինյանի կատարած քայլերի վերաբերյալ: Այդ մարդուց ամեն ինչ պետք է սպասել: Ակնհայտ է, որ նա չի ցանկանում հեռանալ պաշտոնից, որովհետև հստակ գիտակցում է, թե իրավական ինչ պատասխանատվություն է սպասում իրեն՝ պաշտոնականությունից անմիջապես հետո: Նրան կառավարում են սեփական վախերը և նրա վարքը, համապատասխանաբար, կախված է հենց այդ վախերից: Ես մեկ անգամ չէ, որ ասել եմ՝ նա դեռևս նոյեմբերի 10 – ին պետք է հեռացած լիներ, սակայն, քանի –որ էությամբ անպատասխանատու և վախկոտ մարդ է, հանուն սեփական անձի ապահովության, հարվածի տակ է դնում ոչ միայն մեր հայրենիքի, ժողովրդի և պետության, այլև, անգամ, սեփական ընտանիքի ապագան»,- ասում է Արցախի նախկին վարչապետ Անուշավան Դանիելյանը, «Փաստինֆո»-ի հետ զրույցում խոսելով երկրի ներքաղաքական կյանքի վերջին ժամերի զարգացումների մասին:

Խոսելով առաջիկա ժամերին երկրում սպասվող զարգացումների վերաբերյալ, Անուշավան Դանիելյանը նկատում է՝ Փաշինյանն ամեն ինչի ընդունակ է՝ նույնիսկ արյունահեղության. «Նա վաղուց արդեն անցել է թույլատրելիի ռուբիկոնը և գիտի, որ իր պաշտոնում մնալու ամեն օրը քրեական նոր և ծանրագույն հոդվածեր է ավելացնում իր՝ առանց այն էլ անելանելի վիճակին: Հետևաբար, մի քանի օր ավել պաշտոնում մնալու համար, նա հիմա ընդունակ է ամեն ինչի: Սովորաբար, վախկոտները բախումների են գնում, երբ մեջքի հետևում որոշակի ուժ են զգում: Այսօր նախատեսված իր հանրահավաքի ընթացքում նա կարող է նաև հաշվի չառնել այն հանգամանքը, որ իր համար հրապարակ եկած զանգվածը վարչական ռեսուրսների գործադրման հետևանք է, և թաքնվելով այդ մարդկանց հետևում՝ բախումներ հրահրելով, իրավիճակն առճակատման կտանի», - ասում է Արցախի նախկին վարչապետը:

Խոսելով ստեղծված իրավիճակում անցանկալի և ողբերգական սցենարներից խուսափելու ուղիների մասին, Անուշավան Դանիելյանը նկատում է՝ «Հայրենիքի փրկության շարժում»-ը բազմից ընդգծել է, որ ամեն ինչ անում է բախումներից և իրավիճակն այդ ուղղությամբ տանելու քայլերից, սակայն, Հայաստանն, այսօր արդեն, կանգնած է պետականության կորստի շեմին և այլևս պետք չէ մտածել՝ սահմանադրական, իրավական կամ, այսպես ասած, ամենաճիշտ ճանապարհով հարցերի լուծման ուղիների մասին, պարզապես պետք է գործել՝ ժամ առաջ ազատելու երկիրը օրվա ապաշնորհ իշխանությունից:

Անդրադառնալով ռուսական կողմի՝ հայաստանյան ներքաղաքական կյանքի առնչությամբ որդեգրած դիրքորոշման թեմային, Անուշավան Դանիելյանը նկատում է՝ Ռուսաստանի Դաշնությունը շատ լավ է գիտակցում, որ կորցնելով Հարավային Կովկասում իր ռազմավարական դաշնակցի դիրքերը, առավելություն է ընձեռում տարածաշրջանում թուրք – ադրբեջանական տանդեմի հնարավորությունների ընդարձակմանը, ինչն անդառնալի և կործանարար հետևանքներ կարող է ունենալ ոչ միայն Հայաստանի Հանրապետության համար, այլ նաև՝ խիստ անցանկալի իրավիճակների կարող է հանգեցնել նաև իրեն՝ Ռուսաստանի Դաշնությանը:

Հիշեցնենք՝ Նիկոլ Փաշինյանը ֆեյսբուքյան իր էջում տեղեկացրել էր, որ հայրենակիցներին մարտի 1-ին Հանրապետության հրապարակում հանրահավաքի և երթի է հրավիրում: Միաժամանակ, երեկվանից համացանցը ողողված է հանրահավաքի կազմակերպման ուղղությամբ՝ իշխանական թևի կողմից վարչական ռեսուրսների մոբիլիզացման աշխատանքների մասին վկայող բազմաթիվ փաստերով:

Նույն ժամին այսօր հանրահավաք է հրավիրել նաև Բաղրամյան պողոտան արդեն մի քանի օր փակ պահող «Հայրենիքի փրկության շարժում» նախաձեռնությունը:

Հնչում են մտահոգություններ, թե իշխանությունն՝ ի դեմս գործող վարչապետ Նիկոլ Փաշինյանի, պատրաստվում է բախումներ հրահրել հանրահավաքներին մասնակցող երկու հակադիր թևերի ճամբարներում:

Հեղինակ՝ Նվարդ Մանվելյան

Աղբյուր` Փաստինֆո