Փաստ ինֆո

ՀՀ գլխավոր դատախազությունը հրաժարվում է պատասխանել՝ արդյոք Նիկոլ Փաշինյանի մարտի 1-ին հրավիրած հանրահավաքին մասնակցություն ապահովելու համար վարչական ռեսուրսի կիրառման վերաբերյալ ահազանգներին ընթացք տվել են, թե ոչ։ 

Համացանցում տարածվել են բազմաթիվ ձայնագրություններ, որոնք փաստում են, որ մարզային իշխանությունները լծվել են Փաշինյանի հանրահավաքին գլխաքանակ ապահովելու գործընթացին։ Որոշ հնարամիտներ անգամ հանձնարարել են մարդկանց սեփական մեքենաներով գնալ Երեւան։

«Մարդկանց ասել եմ իրենց մեքենաներով գան, որ հետո պոզ ու պոչ չկպցնեն, ասեն վարչական ռեսուրս կիրառին, ավտոբուսները լցրին բերին զոռով։ Էդպես ասել եմ ինչքան կարաք շատ ավտոներով ու հետներդ մարդ բերեք։ Իսկ մնացածին ասել եմ հավաքվեն հրապարակում, հարցերը սաղ լուծված ա»,- ասել է Էջմիածնի փոխքաղաքապետ Կարապետյանը։

Մեղրաշենի գյուղապետ Հունան Պետրոսյանն էլ հայտարարել է, որ միայն իրենց գյուղից 50 հոգու բերելու են, բացի այդ զգուշացրել են մայրաքաղաքում շինարարության վրա աշխատող իրենց համագյուղացիներին, որ բոլորը գնան Փաշինյանի հանրահավաքին։

«Փաստինֆո»-ն դիմեց ՀՀ գլխավոր դատախազություն՝ պարզելու արդյոք այդ հրապարակումները քննարկման առարկա դարձել են, թե ոչ, սակայն Դատախազությունից հորդորեցին գրավոր հարցմամբ դիմել։

Նկատենք, որ տեղեկատվության ազատության մասին օրենքը նախատեսում է բանավոր եւ գրավոր հարցման ընթացակարգ, վերջինի պարագայում գերատեսչությունն ունի 5 օր ժամանակ պատասխանելու համար, իսկ եթե ունեն նաեւ լրացուցիչ ուսումնասիրության կարիք, ապա կարող են պատասխանել 30 օրվա ընթացքում։ Ասել է թե՝ դատախազությունը խուսափում է օպերատիվ արձագանքել Փաշինյանի իշխանության կողմից վարչական ռեսուրսի ահազանգերին։

Նկատենք, որ վարչական ռեսուրս օգտագործելու վերաբերյալ ահազանգել էր նաև ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը՝ հրապարակելով ձայնագրություններ և գրել․ «Նախկին իշխանությունների վարչական ռեսուրսիդ դեմ խաչակրաց արշավանքի դուրս եկած Նիկոլը վաղվա իր շոուին բռնի ուժով մարդ է հավաքում»,-գրել էր պատգամավորը։

Հարցին արձագանքել է նաեւ «Իմ քայլը» խմբակցությունից հեռացած, ներկայումս անկախ պատգամավոր Սոֆյա Հովսեփյանը. «2018 ֊ին մերժեցինք բոլոր արատավոր երևույթները` մարդ հավաքել, դպրոցներից մարդ բերել, պաշտոնական դիրքի չարաշահում, ընտրակեղծիք, լցոնում, ձայն առնել, վախեցնել, շանտաժ անել ։ Որքան էինք հավատում այդ իրականությանը ու որքան հաճելի էր, որ դա ստացվեց, բայց 2021 թ. կրկին հասանք զրոյական կետի և սահուն մտնում ենք մերժված, արատավոր երևույթների տիրույթ»։

Աղբյուր` Փաստինֆո