Փաստ ինֆո

«Այսօր ժամը 18-ին Բաղրամյան պողոտայում եմ լինելու: Ինձ այնտեղ է տանում մեր պարտությունը, մեր զոհված տղաներն ու գերության մեջ գտնվող հայրենակիցները և այս ամենը ես մեծ ցավով եմ ասում: Ես լինելու եմ այնտեղ, որտեղ մեր բանակն է: Նիկոլ Փաշինյանը պետք է հասկանա, որ եկել է իր անցնցում հեռանալու ժամը: Նա դա պետք է աներ դեռևս նոյեմբերի 10-ին, որի արդյունքում մեզ կհաջողվեր խուսափել հետպատերազմյան որոշակի բացասական զարգացումներից, բայց չարեց: Նա պետք է հասկանա, որ այսօր այդ օրն է»,- «Փաստինֆո»-ի հետ զրույցում ասել է դերասան, բեմադրիչ Հրանտ Թոխատյանը։ 

Դերասանը նկատել է՝ երբ հակառակ թևից ասում են, թե Բաղրամյան պողոտայում հավաքվել են հները, ապա այդպես ասողներն ու մտածողները պետք է իմանան, որ այնտեղ մարդիկ են, ովքեր միշտ և մշտապես եղել են ամենանորը, այնտեղ մեր ընկերներն են, մեր բարեկամները, մարդիկ, որոնց հետ մի ամբողջ կյանք ենք ապրել, որոնց ցնցել ու անակնկալի է բերել պարտության ցավը, մարդիկ, ովքեր մտահոգ են՝ չկորցնելու այն, ինչ մնացել է մեր հայրենիքից և մարդիկ, որոնց կարծիքն իր համար չափազանց կարևոր է.

«Նորից եմ կրկնում ՝ լինելու եմ այնտեղ, որտեղ մեր բանակն է: Չգիտես ինչու, ոնց պտտվեցին, ստացվեց, այնպես, որ այս ամեն ինչի մեջ ամենամեծ մեղավորը ստացվեց բանակը, ինչը, ոչ մի պարագայում չի կարող այդպես լինել: Մենք տարածաշրջանում ամենամարտունակ բանակն ենք ունեցել և դեռ ունենալու ենք: Մենք մշտապես հպարտացել ենք մեր անպարտելի բանակի հզորությամբ և հաղթանակներով, որ նա նվիրել է մեզ ու մեր հայրենիքին:

Խնդիրներ եղե՞լ են՝ եղել են, ունեցե՞լ են սպաներ, որոնք ավելի լավ է երբեք չունենայինք՝ ունեցել ենք, եղե՞լ են բանակում անբարեխիղճ աշխատողներ, եղել են, ճիշտ այնպես, ինչպես միշտ ու ամեն տեղ է լինում, բայց այս ամենը երբեք որևէ տեսակի էական ստվեր չի գցել ո´չ մեր բանակի պատվի, ո´չ արժանապատվության և ո´չ էլ մարտունակության վրա: Ի՞նչ եղավ, ի՞նչ պատահեց, ինչպե՞ս ստացվեց, որ տարիներով պարծանքի արժանի և թշնամուն ահ ու սարսափի մեջ պահող մեր բանակն այս պարտությունը թույլ տվեց, կամ արդյո՞ք բանակը դա թույլ տվեց…

Սրանք հարցեր են, որոնք, անպայման, ստանալու ենք իրենց իրական և ճշմարիտ պատասխանները: Անկախության համար պայքարի ելնելու օրերից մինչև հիմա, մեր հաղթանակած բանակը մշտապես իր ժողովրդի կողքին է եղել, այսօր էլ մենք պետք է մեր բանակի կողքին լինենք: Անկախ մեր ունեցած քաղաքական հայացքներից, թյուր ըմբռնում հանդիսացող՝ հներ–նորեր վեճից, անկախ ամեն ինչից՝ ժողովուրդը բանակի կողքին է, բանակը ժողովրդի թիկունքում և միշտ այդպես է լինելու», - ամփոփելով զրույցն, ասում է Հրանտ Թոխատյանը:

Հիշեցնենք՝ Նիկոլ Փաշինյանը ֆեյսբուքյան իր էջում տեղեկացրել էր, որ հայրենակիցներին մարտի 1-ին Հանրապետության հրապարակում հանրահավաքի և երթի է հրավիրում: Միաժամանակ, երեկվանից համացանցը ողողված է հանրահավաքի կազմակերպման ուղղությամբ՝ իշխանական թևի կողմից վարչական ռեսուրսների մոբիլիզացման աշխատանքների մասին վկայող բազմաթիվ փաստերով:

Նույն ժամին այսօր հանրահավաք է հրավիրել նաև Բաղրամյան պողոտան արդեն մի քանի օր փակ պահող «Հայրենիքի փրկության շարժում» նախաձեռնությունը:

Հնչում են մտահոգություններ, թե իշխանությունն՝ ի դեմս գործող վարչապետ Նիկոլ Փաշինյանի, պատրաստվում է բախումներ հրահրել հանրահավաքներին մասնակցող երկու հակադիր թևերի ճամբարներում:

Հեղինակ՝ Նվարդ Մանվելյան

Աղբյուր` Փաստինֆո