Փաստ ինֆո

«Կարծում եմ՝ նախագահի քայլն ուներ իրավական հիմքեր, բխում էր օրենքից և Հայաստանի Հանրապետության շահերից: Սա իր մեջ հստակ նախանշան էր պարունակում, այսինքն՝ այն ներքին պրոցեսները, որ վերջին երկու օրերին ընթանում են Հայաստանում, հստակ տվել են իրենց արդյունքները և նախանշում են այն հետագա ընթացքը, որով զարգանալու են դեպքերը», - «Փաստինֆո»-ի հետ զրույցում ասել է ՀՅԴ անդամ Բագրատ Եսայանը:

Նա վստահ է, որ սա չի վերածվելու Նախագահի նստավայրի, Կառավարության առաջին մասնաշենքի և Գլխավոր շտաբի միջև ներքին նամակագրության, ինչպես նաև վստահ է, որ Նիկոլ Փաշինյանի իշխանության ոչ թե օրերը, այլ ժամերն, այլևս, հաշված են: Վերջնիս համոզմունք է հայտնում ՝ Փաշինյանը կորցրել է վստահությունը ժողովրդի, բանակի, ինչպես նաև՝ Ոստիկանության մեծ մասի մոտ և այլևս որևէ հենարան, բացի իր հավաքած 5000 հոգուց այլևս չունի, իսկ վերոհիշյալ զանգվածի մակարդակը, ըստ բանախոսի, երեկ արդեն տեսանելի էր:

Դաշնակցական գործիչը նկատել է՝ միակ գործը, որով հիմա զբաղված է ՀՀ-ում դեռևս վարչապետ աշխատող անձը, սեփական փախուստն ինչ – որ կերպ կազմակերպելն է, որը, սակայն, նրա մոտ դժվար ստացվի. «Փաշինյանը փորձ է անելու աշխարհի մոտ տպավորություն ստեղծել, թե իրեն բռնի ճանապարհով հեռացնում են իշխանությունից, այդ նպատակով նա բախումներ է հրահրելու, բայց ավելի քան վստահ եմ, որ Ոստիկանությունը բախումների չի գնա, քանի որ բանակը հստակ հաղորդագրություն է ուղարկել՝ բախումների կամ բռնությունների պարագայում՝ կագնելու է ժողովրդի կողքին: Ի վերջո՝ Փաշինյանին մնալու է միակ ելքը՝ փորձել կազմակերպել սեփական փախուստը՝ դառնալով էմիգրացիայում դեգերող «ազգընտիր» վարչապետ, բայց ավելի քան վստահ եմ, որ հայկական Սահակաշվիլու դեր ստանձնելու սցենարը նրա մոտ չի ստացվի», - ասել է Բագրատ Եսայանը:

Հիշեցնենք, որ նախագահ Արմեն Սարգսյանը չի ստորագրել Օնիկ Գասպարյանի ազատման հրամանագիրը և առարկություններով հետ վերադարձրել նախագիծը: Առաջարկության կապակցությամբ Հանրապետության նախագահը խորհրդատվություններ և հանդիպումներ էր ունեցել իշխանության ներկայացուցիչների, խորհրդարանական և արտախորհրդարանական ուժերի, զինված ուժերի բարձրագույն հրամանատարական կազմի հետ: Հրամանագրի նախագիծն ուսումնասիրվել էր Հանրապետության նախագահի աշխատակազմում, ամենայն մանրամասնությամբ քննարկվել էր առաջատար իրավաբանների և անկախ փորձագետների հետ:

Իրավաբանների և փորձագետների տեսակետներն ամփոփելով՝ եզրակացություն էր կազմվել, որ հրամանագրի նախագիծն առերևույթ հակասում է Սահմանադրությանը:

Հեղինակ՝ Նվարդ Մանվելյան

Աղբյուր` Փաստինֆո