Փաստ ինֆո

Մարտի 1-ին հանրահավաք կազմակերպելը մեծ պրովոկացիա է, որն անցկացնելու համար Նիկոլ Փաշինյանը կենտրոնացրել է ամբողջ պետական ապարատը, ադմինիստրատիվ ռեսուրսը, որպեսզի հնարավորինս շատ մարդ դուրս բերի, սակայն նրա մտքերը դրական չեն: «Փաստինֆո»-ի հետ զրույցի ժամանակ այս մասին ասաց քաղաքագետ Հրանտ Մելիք-Շահնազարյանը:

Քաղաքագետը դժվարացավ ասել, թե ինչ նպատակ է հետապնդում վարչապետը, սակայն նշեց, որ կա վարչապետի հրաժարականի համընդհանուր պահանջ, և նա փաստացի փորձում է քաղաքացիներին փողոց դուրս բերել և բախում հրահրել՝ իրար հակադրելով ժողովրդի երկու հատվածին:

«Նա պարզապես ուզում է իշխանություն պահել, սակայն այսկերպ ավելի է խորացնելու ներհասարակական հարաբերությունների ճգնաժամը: Ավելի քան 10 տարի նա մարտի 1-ի զոհերի հիշատակը շահարկելով իշխանության է եկել և հիմա փորձելու է նույնն անել: Նա իշխանությունը պահելուց բացի ուրիշ խնդիր չունի, բայդ դրա հետևանքը մեծ ողբերգություն կարող է լինել: Մարդկանց միմյանց դեմ հանելու փաստն արդեն իսկ ողբերգություն է»,-ասաց քաղաքագետը:

Հարցին՝ կկարողանա վարչապետն այդկերպ պահել իշխանությունը, Հրանտ Մելիք-Շահնազարյանը նշեց, որ Նիկոլ Փաշինյանը Հայաստանում քաղաքական ապագա չունի. «Ընդդիմությունը պետք է հետևողական լինի վարչապետի հրաժարականի պահանջին և մեծ ուշադրություն դարձնի իր թեզերը հանրությանը ներկայացնելու վրա: Պետք է աշխատի պետական այն ինստիտուտների հետ, որոնք պարտավոր են ապահովել երկու ցույցերի անվտանգությունը և սահմանեն այնպիսի վերահսկողություն, որ իրավապահները տեղում լինեն, զարգացումներն անուշադրության չմատնեն կամ չենթարկվեն վարչապետի պրովոկատիվ որոշումներին: Եթե օրինակ վարչապետը փորձի մարդկանց բազմությունը տանել դեպի Բաղրամյան պողոտա, դա պետք է կանխվի, իրավապահները պետք է թույլ չտան նման բան, որովհետև դրա հետևանքներն ակնհայտ են լինելու: Ընդդիմությունը որպես պատասխանատու ուժ, որն այս պահին ոչ պակաս ազդեցություն ունի հանրության շրջանում, պետք է այդ ազդեցությունն օգտագործի բախումներից խուսափելու և վարչապետի սադրանքները կանխելու համար»,-ասաց Հրանտ Մելիք-Շահնազարյանը:

Անդրադառնալով հարցին՝ արդյոք Հանրապետության նախագահն Օնիկ Գասպարյանի հրամանագրի հարցով կդիմի ՍԴ՝ հաշվի առնելով, որ ինքն անձամբ է արձանագրել դրա հակասամանադրական լինելը, քաղաքագետը նկատեց՝ Նիկոլ Փաշինյանն առանց որևէ բան փոփոխելու, առանց առարկությունները հաշվի առնելու նույն թուղթն ուղարկել է, ինչը բացահայտ արհամարհանքի նշան է երկրի ղեկավարի հանդեպ: Այս իրավիճակում նա չի կարծում, որ նախագահ Սարգսյանն այլ տարբերակ ունի, քան ՍԴ դիմել:

«Միանշանակ է, որ վարչապետը միայնակ է մնացել: Կարծում եմ՝ վարչապետին աջակցում են միայն իրավապահ մարմինների ղեկավարները, սակայն կառույցների շարքերում այդ աջակցությունը չկա: Անգամ ընդդիմության ցույցերը վերահսկող ոստիկաններն անընդհատ ցուցարարներին ասում են, որ պետք է ակտիվանալ, օր առաջ ազատվել այս դավաճան իշխանությունից: Ոստիկաններն արդեն բաց տեքստով են դա ասում ցուցարարներին, այնպես որ չեմ կարծում՝ նա համակարգային աջակցություն ունի: Նիկոլն էլ գիտի, որ չունի, դրա համար փորձում է այլկերպ իշխանությունը պահել, այդպես հանրահավաքներ, միջոցառումներ բեմադրելով, բայց ամեն դեպքում հասկանում ենք, որ իր քաղաքական ռեսուրսը վերջնականապես սպառված է»,-նշեց Հրանտ Մելիք-Շահնազարյանը:

Վերջինս ընդգծեց՝ Ոստիկանությունում, հատկապես ԱԱԾ-ում սպաները, ծառայողները պատվարժան մարդիկ են, և նրանք պարզապես իրավունք չունեն ետ մնալ բանակի այդ դիրքորոշումից, քանի որ նրանք էլ շատ լավ տեղեկացված են, թե ինչ է կատարվում երկրում և լավ գիտեն՝ ով է այս ողբերգոթյունների հիմնական մեղավորը և պատասխանատուն:

Աղբյուր` Փաստինֆո