Փաստ ինֆո

ՀՀ աշխատակազմի նախկին ղեկավար Արա Սաղաթելյանի նկատմամբ իրականացվող հետապնդումն ունի քաղաքական բնույթ։ Այս մասին հրավիրված մամուլի ասուլիսին հայտարարեց քաղաքագետ Ալեքսանդր Իսկանդարյանը։

«Այստեղ ասելու բան էլ չկա։ Միտքը, որ երկրում առկա տասնյակ հազարավոր ֆեյքերից և VPN-ից օգտվող մի քանի հարյուր հազար մարդկանցից պատահաբար ընտրվել է պարոն Սաղաթելյանը, դա կվիրավորի իմ ինտելեկտը։ Այդ ձերբակալությունն ունի քաղաքական բնույթ»,- ասաց նա՝ ընդգծելով, որ դա գուցե չի կարող ապացուցել, բայց դատելով, թե ինչպես է դա տեղի ունեցել, ինչ մարդիկ են ձերբակալվել, ինչ կոնտեքստում է դա տեղի ունեցել, մեղադրանքի ծիծաղաշարժությունը և վատ ծեփվածությունը, ակնհայտորեն այդ մասին է փաստում։

Իսկանդարյանը չբացառեց, որ որոշումը կայացվել է կամ պատահաբար, կամ շտապ, քանի որ կարելի էր ավելի լուրջ բան մտածել։ Իսկանդարյանը հետաքրքիր ֆենոմեն է համարում ստեղծված իրավիճակը, որը շատ ավելի լայն շրջանակ է ներառում, Արա Սաղաթելյանից բացի մի շարք անձինք են ձերբակալվել, որոնք հետո ազատ են արձակվել՝ տարբեր հանգամանքներից ելնելով։

Քաղաքագետը նկատեց, որ մինչև 2018թ Հայաստանում ավանդույթ է եղել, որ քաղաքական պայքարում չեն կիրառվել իրավական ընթացակարգեր, սակայն այդ ավանդույթները խախտվել են 2018թ և մեզ մոտ նմանատիպ գործերը շատ քիչ են։

«Պատկերացնել, որ այդ ամենը պատահական զուգադիպություն են և քննիչը, որը շուրջ 10 տարի չէր հիշում ինչ-որ քրեական գործի մասին, հենց այս պահին է հիշել և հենց այս պահին են պատահաբար գտել մարդկանց, որոնք քաղաքականության մեջ նշանակալի դեր են ունեցել, կներեք՝ այդպես չի լինում։ Դա սկսվել է ինչ որ «տուշոնկայից» և շարունակվում է առ այսօր։ Դա գործիքներից մեկն է՝ իրավական ընթացակարգերն օգտագործել քաղաքական նշանակություն ունեցող մարդկանց դեմ։ Չեմ կարող ենթադրել, որ դա պատահական է, դա չափից տարօրինակ կլիներ» ,- նշեց Իսկանդարյանը՝ հավելելով, որ բոլորի համար էլ ակնհայտ է, որ նման հետապնդումները պատահական չեն լինում։

Քրեական գործը, որի շրջանակներում կալանավորվել է Արա Սաղաթելյանը, ըստ Իսկանդարյանի, ֆեյքերի հետ կապ ունի այնքանով, որքանով Նիկոլ Փաշինյանի և Սերժ Սարգսյանի հարցազրույցը՝ «Իսկանդերին», դա քաղաքական դիրքորոշման արտահայտում է։

«Պարզապես մեր երկրում ընդունված էր, որ իրավապաշտպանները կամ իրենց իրավապաշտպան կոչող անձինք քաղբանտարկյալ են համարել այն անձանց, որոնք պատիվ են ունեցել՝ քաղբանտարկյալ լինելու, իսկ քաղբանտարկյալը մարդ է, որը ձերբակալված է քաղաքական մոտիվներով։ Արա Սաղաթելյանը հենց այդպիսին է »,- նշեց Իսկանդարյանը։

Աղբյուր` Փաստինֆո