Փաստ ինֆո

Մենք այսօր մտահոգված ենք միայն մեկ հարցով՝ մեր երկիրը դեպի առաջընթաց տանելու և այս իշխանություններից ձերբազատվելու հարցով։ Այս մասին հրավիրված հանրահավաքում ասել է ՀՀ ՊՆ նախկին նախարար Սեյրան Օհանյանը։

Նրա խոսքերով՝ պետք է կարողանանք այս թափանիվն օրըստօրե պտտեցնել և համակիրների շարքերը լրացնել, հասնել նրան, որ ունենանք ավելի գրագետ, ավելի փորձառու, հեռանկարային և լայնախոհ իշխանություն։ Օհանյանի գնահատմամբ՝ Հայաստանում տիրող իրավիճակը դավադրության և ապիկար կառավարման արդյունք է, ինչի մասին խոսում են նաև աշխարհի առաջատար ուժերը, այդ մասին են հայտնում անգամ մեր թշնամի երկրները։

«Վերջին երկու- երեք օրերին միայն Թուրքիայի և Ադրբեջանի ղեկավարության ասածները խոսում են այն մասին, որ մեզ մոտ գործում է լայն գործակալական մի մեծ շարասյուն, որի գլխավերևում կանգնած է Նիկոլ Փաշինյանը։ Ես երբևէ անուններ չեմ ձգտել տալ, բայց այսօր նորից համոզվում եմ նրանում, որ գործակալական, թուրքական շարասյունը ՀՀ-ում գլխավորում է Նիկոլ Փաշինյանը և օր առաջ այդ շարասյունը պետք է հեռացնել ՀՀ-ից։ Նիկոլ Փաշինյանն է անձամբ պատասխանատու պատերազմի և պարտության համար, նա է ամենակարևոր մեղավորը, որովհետև նա մերժեց մեր գործընկերների հետ հարաբերությունները, մերժեց անվտանգային համակարգային գործունեությունը՝ ՀԱՊԿ-ի շրջանակներում, նա մերժեց Մինսկի ձևաչափը» ,- ընդգծեց Օհանյանը՝ ավելացնելով, որ օրեր առաջ Ալիևն ինքն անձամբ ասել է, որ Փաշինյանն ինքն է նախաձեռնել, որ իրենք երկուսով խոսեն, պլանավորեն՝ Արցախի հարցը լուծելու ուղղությամբ։

Ինչ վերաբերում է Թուրքիայի ղեկավարների հայտարարությանը, Օհանյանը նշեց, որ Թուրքիայի ղեկավարները, որոնց ձեռքերը մինչև արմունկները թաթախված են արյան մեջ, փորձում են մեզ և մեր բանակին ժողովրդավարության և հայրենասիրության դասեր տալ։

«Մի երկրի ղեկավար, որն իր պետությունը տանում է դեպի սուլթանական իշխանություն և Մեծ թուրանի գաղափարի, փորձում է մեր բանակին դաստիարակել։ Բանակ, որն իր գործունեության շրջանակներում ծնվել է իր ժողովրդի ծոցից, բանակ, որն իր գործողություններում միշտ հումանիստական ծրագրեր է իրականացրել, միշտ կատարել է պայքարի, հակամարտության բոլոր նորմերը»,- նշեց Օհանյանը՝ մատնանշելով այդ նորմերից մի քանիսը, մասնավորապես, Արցախյան առաջին պատերազմի ժամանակ, հայ ժողովուրդը պայքարում էր երկու ճակատով՝ արտաքին և խոշոր բնակավայրերը, որոնք վերածվեցին ռազմական հենակետերի, ինչն արդյունք է Ադրբեջանի կողմից ԽՍՀՄ ժամանակ կողմնակալ քաղաքականության, երբ բոլոր ենթակառույցները, ճանապարհներն անցնում էին բնակավայրերով։ Օհանյանը պարզաբանեց, որ միշտ այդ խոշոր հենակետերը (Խոջալու, Շուշի և այլ քաղաքներ) ոչնչացնելու համար միշտ մարդասիրական միջանցքներ են թողնվել՝ Ադրբեջանի խաղաղ բնակչության համար։ Բացի դա՝ մենք միշտ պատմամշակութային արժեքի նկատմամբ հոգատար վերաբերմունք են ցուցաբերել։

Օհանյանն ընդգծեց, որ հայկական բանակը ճիշտ քայլ է կատարել և այսօր միակ լեգիտիմ կառույցը հայկական բանակն է, որովհետև նա իրականացնում է անվտանգության, տարածքային ամբողջականության և սահմանների անձեռնմխելիության իր ողջ գործընթացը։

«Ի՞նչ է տեսնում հայկական բանակը՝ այդ լեգիտիմության շրջանակներում, որ մեր հետևի կառույցն (ԱԺ-ն հեղ.) ընդհանրապես չի աշխատում, չեն իրականացնում խորհրդի նիստեր, բայց վաղը բոլորն իրենց այդ պարգևավճարներով պարգևատրելու են»,- նշեց նա՝ ընդգծելով, որ կառավարությունը՝ Նիկոլի գլխավորությամբ, չի կատարել ՀՀ սահմանների անձեռնմխելիության, սահմանազատման և սահմանագծման խնդիրները, թուրքը և ադրբեջանցին հենց այնպես եկել ու կանգնել է իր համար հարմար կետերում։

Աղբյուր` Փաստինֆո