Փաստ ինֆո

Թշնամանքը, ատելությունը, հայի կողմից հային ատելն այն է, ինչ ուզում է Նիկոլը։ Նիկոլի հիմնական խաղաքարտն ատելությունն է, հային հայի դեմ հանելն է։ Նիկոլը Հայաստանում չունի այլևս որևէ հենարան։ Նրա միակ հենարանը մնացել է չարությունը, մաղձը, ատելությունը։ Այս մասին հանրահավաքի ընթացքում ասել է ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը։

«Եթե ես փորձեմ խոսել մանիպուլյացիայի հանճարի մասին, ապա անտարակույս, Նիկոլը համաշխարհային պատմության մեջ մնալու է որպես պոպուլիզմի, դեմագոգիայի, մանիպուլյացիայի հանճար։ Ես միշտ փորձել եմ հասկանալ, թե նվազագույն դաստիարակություն, նվազագույն ինտելեկտ, զրո հայրենասիրություն ունեցող այդ մարդն ինչով է կարողացել մանիպուլյացնել իսկապես ազնիվ հարյուր հազարավոր մեր հայրենակիցներին՝ երկու տարի առաջ և անկեղծ՝ չեմ կարողանում հասկանալ»,- նշեց Զոհրաբյանը՝ հավելելով, որ մարդկանց ազդեցության տակ գցելու համար պետք է լինել հայրենասեր։

Զոհրաբյանը նշեց, որ Նիկոլին իմանալով և ճանաչելով, ամենայն պատասխանատվությամբ կարող է հայտարարել, որ Նիկոլը մարդ է, որն ատում էր Արցախը և հանձնեց Արցախը, մարդ է, որ չի սիրում Հայաստանը և հիմա ամեն ինչ անում է՝ հային հայի դեմ հանելու համար։

Զոհրաբյանը հիշեցրեց 2007թ «Ադրբեջանի օրեր Հայաստանում» խորագրով քննարկման ժամանակ Նիկոլ Փաշինյանի խոսքերը։ Մասնավորապես, Փաշինյանը հայտարարել էր՝ «երբ պետք է հասկանանք, որ Ղարաբաղը մեզ համար գլխացավանք է և ինչքան շուտ ազատվենք այդ գլխացավանքից, այդքան՝ լավ»։ Զոհրաբյանը նշեց, որ դա ասվել էր դեռևս 2007թ՝ լրագրող և խմբագիր Փաշինյանի կողմից, իսկ իշխանության գալուց հետո Նիկոլ Փաշինյանն իրականացրեց Արցախը հանձնելու իր ծրագիրը։

«Իմ գործընկերներն ինձ հաճախ են հարցնում՝ արդյոք դա դավաճանություն էր, թե անմեղսունակության, դիլետանտիզմի, հիվանդագին փառասիրության և որևէ մեկին չլսելու արդյունք, ես ունեմ իմ հստակ պատասխանը։ Ես վստահ եմ, որ Նիկոլի և նիկոլական խունտայի նյուրնբերգը լինելու է»,- նշեց Զոհրաբյանը՝ դիմելով ԱԺ իշխանական իր գործընկերներին, որոնք, ըստ Զոհրաբյանի, քաղաքական պատանդ են՝ Նիկոլ Փաշինյանի ձեռքին, որովհետև Փաշինյանն ավելի նվազ է դասում նրանց, քան՝ իր ուսապարկը։

«Երբ ՔՊ խոսնակն ասաց, որ Նիկոլի ուսապարկն անգամ ավելի շատ ձայն կհավաքեր, քան՝ դուք, իմացեք՝ այդ խոսքերը գրել է Նիկոլ Փաշինյանը։ Այո, իր համար իր ուսապարկը հազար անգամ ավելի արժեքավոր իր է, քան՝ ձեզնից յուրաքանչյուրը։ Թոթափե՛ք այդ կեղծ բարեպաշտությունը, թոթափեք նիկոլիզմը ձեր ուսերից, որովհետև նիկոլիզմն ամենաեղկելի, ամենավտանգավոր, ամենաազգակործան բանն էր, որ կործանեց Արցախը և հիմա էլ կործանում է Հայաստանը։ Ես լավ գիտեմ Նիկոլին, Նիկոլն ուզում էր պատմության մեջ մնար որպես փրկիչ, հիմա նա գիտի, որ իր տեղն այլևս հայոց պատմության մեջ ամրագրվել է որպես «Նիկոլ, դավաճան», որպես մարդ, ով հանձնեց Արցախի 75 տոկոսը, որպես հողատու, ով հանձնեց մեր սրբավայր Շուշին»,- ընդգծեց Զոհրաբյանը։

Պատգամավորը պատմեց, որ իրեն անհարմար է զգացել որպես հայ, երբ օրեր առաջ Մոսկվայում մտել է մի հաստատություն, որտեղ ճաշում էին նաև ադրբեջանցիներ, որոնք տեսնելով, որ հայ պատգամավոր է մտնում, դիտավորյալ միացրել են «Նոլդու, Փաշինյան» երգը, իսկ Զոհրաբյանը՝ իր գործընկերների հետ գլխիկոր դուրս են եկել։

«Նիկոլը մեզնից վերցրել է մեր արժանապատվությունը»,- ասաց նա՝ ընդգծելով, որ Նիկոլը միակ մեղավորն է, որովհետև վերջինս հնարավորություններ է ունեցել կասեցնելու պետականակործան պատերազմը, բայց չի արել։

Աղբյուր` Փաստինֆո