Փաստ ինֆո

Ֆանտաստիկայի ժանրից բան է, ո՞վ կարող է այսօր գնալ ՀՀ ԶՈՒ գլխավոր շտաբ և փորձել իրականացնել ձերբակալություն։ Ձեզ թվու՞մ է, որ հնարավոր է գնալ ԳՇ և ուժային որևէ գործողություն իրականացնե՞լ։ Այս մասին լրագրողների հետ զրույցում ասաց Արթուր Վանեցյանը։

«Իհարկե բացառում եմ՝ երկու պատճառով։ Ուղղակի ֆիզիկապես դա հնարավոր չէ անել, եթե դիմակայեն, անհնար է, ուղղակի ֆիզիկապես հնարավոր չէ ուժ կիրառել ԶՈՒ-երի նկատմամբ »,- նշեց նա՝ ընդգծելով, որ ԱԱԾ-ում և ոստիկանությունում 95 և ավել տոկոսը հայրենասեր, հայրենիքը սիրող, երկրին ծառայող, պետական մտածելակերպ ունեցող սպաներ են։ Նրա խոսքով՝ այդ մարդիկ իրենց ողջ կյանքը նվիրել են մեր երկրի անվտանգության ապահովմանը։

Դիտարկմանը, որ սպայի գործը նաև հրաման կատարելն է, Վանեցյանն արձագանքեց. «Բայց ի՞նչ հրաման կատարելը։ ԶՈՒ-երի ԳՇ-ն կատարել է միշտ իր պարտականությունները։ Ինչ վերաբերում է հրաման կատարելուն, այո, զինվորական ծառայողները, ուսադիր կրողները պարտավոր են կատարել հրամաններ, բայց հրամանները կատարվում են սովորական պայմաններում»։

Վանեցյանի խոսքով՝ սեպտեմբերի 27-ից հետո մեր երկրում աննորմալ իրավիճակ է, որն օր օրի խորանում է և ինքը երբեք կոչ չի անի ԱԱԾ կամ ոստիկանության գործող աշխատակիցներին դուրս գալ իշխանությունների դեմ։

«Ուսադիր կրող մարդու հոգեբանությունը և ուսադիր չկրող մարդու հոգեբանությունը տարբեր բաներ են»,- նշեց նա՝ հավելելով, որ ծառայողները կարող են անել հայտարարություն, կարող են գործողություններով ցույց տալ, որ համաձայն չեն։ Նրա խոսքով՝ օրական հարյուրից ավելի զանգ է ստանում իր գործընկերներից, որոնք ասում են՝ պարոն գեներալ երկիրը կործանվում է, մի բան արեք։
Վանեցյանը պատմեց, որ 20 տարեկանում ինքն ընդունվել է ԱԱԾ և ստացել առաջին զինվորական՝ լեյտենանտի կոչումը, քսան տարի աշխատելուց հետո ստացել է գեներալի կոչում։

«Նիկոլ Փաշինյանը գեներալի կոչում տվող չի, գեներալի կոչումն իր տանից չի բերել, որ տա ինձ, գեներալի կոչումը և առհասարակ բոլոր կոչումները սպայի աշխատանքի ամփոփոխումն է և գնահատումը»,- նշեց Վանեցյանը։

Դիտարկմանը, որ Փաշինյանը կոչում տվել է Արգիշտի Քյարամյանին, իսկ Տիրան Խաչատրյանին՝ հերոսի կոչում, և միայն ծիծաղելու համար ազատել պաշտոնից, Վանեցյանն արձագանքեց. «Այս բանավեճը խոսում է այն մասին, որ իրականում երկրում աննորմալ վիճակ է։ Մեր երկիրը վերածվել է մեծ հոգեբուժարանի, գժանոցի, ես անկեղծ չգիտեմ, թե ինչ ասեմ»։

Մանրամասները՝ տեսանյութում

Աղբյուր` Փաստինֆո