Փաստ ինֆո

Բաղրամյան պողոտայում հանրահավաքն ընդմիջվեց 1 ժամով. ընդդիմադիրները սպասում են նախագահի որոշմանը։ Հայրենիքի փրկության շարժման համակարգող Իշխան Սաղաթելյանը նշեց, որ սպասում են ՀՀ նախագահի որոշմանը՝ կստորագրի՞ արդյոք ԳՇ պետին պաշտոնից ազատելու վարչապետի միջնորդությունը։ 18։00-ին՝ որոշմանը ծանոթանալուց հետո կհայտնեն հետագա քայլերի մասին։

Լրագրողների հետ զրույցում Սաղաթելյանը հույս հայտնեց, որ նախագահը առարկություն կանի ու վարչապետի միջնորդությունը հետ կուղարկի կառավարություն։ Անկախ որոշումից, Սաղաթելյանը հայտնեց, որ հստակ քայլերի պլաններ ունեն, բայց դրանց մասին չի հայտնի, անկախ ամեն ինչից՝ մնալու են Բաղրամյան պողոտայում։

«Հույս ու վստահություն ունենք, որ նախագահը առարկություն կներկայացնի, որովհետև որոշումը հակասահմանադրական է»։
Նիկոլ Փաշինյանը ավելի վաղ համակիրների հետ հավաքի ժամանակ հայտնել էր, որ եթե ընդդիմությունը շարունակեի նման հավաքներ անել, բանակցությունների չգնա, ապա բոլորին կձերբակալեն օրենքի սահմաններում։

«Նախ Նիկոլ Փաշինյանը գլուխը պատին է տվել, հերիք է ինքը սպառնա մեզ ձերբակալություններով։ Ինքը թավիշով վարվել է միայն թուրքերի ու ադրբեջանցիների հետ։ Չի կարող, որևէ բան Նիկոլ Փաշինյանին չի փրկելու»։

Սաղաթելյանը նաև դիմեց «Իմ քայլի» պատգամավորներին՝ երկիրը փրկելով իրենք իրենց են փրկելու, պետք է գան խորհրդարան, ռազմական դրությունը վերացնեն ու քննարկեն երկրում ստեղծված իրավիճակը։ Իբրև քաղաքական մեծամասնություն՝ պատասխանատվություն են կրում ստեղծված իրավիճակի համար։

Աղբյուր` Փաստինֆո