Փաստ ինֆո

Հայրենիքի փրկության շարժման մասնակիցները՝ Նախագահ Արմեն Սարգսյանի որոշմանը ծանոթանալուց հետո, հայտարարեցին հաղթանակի քայլերթի մասին։  Շարժման ներկայացուցիչներն ու մասնակիցները «Ազգ, բանակ, հաղթանակ» վանակարկումներով  շարժվեցին Բաղրամյան պողոտայով։ 

«Վաղը հայտարարում ենք հաղթանակի և հանգստյան օր, իսկ երկուշաբթի օրը, ժամը 16։00-ից կշարունակենք մեր աշխատանքը»,-հայտարարեց ՀՓՇ վարչապետի միասնական թեկնածու Վազգեն Մանուկյանը, հորդորելով մյուս ուժային կառույցներին ՝ ԱԱԾ-ին, դատախազությանը, ոստիկանությանը միանալ բանակին։   

Հիշեցնենք, որ փետրվարի 25-ին ՀՀ Զինված ուժերի գլխավոր շտաբը հայտարարություն է տարածել՝ պահանջելով Նիկոլ Փաշինյանի և կառավարության հրաժարականը՝ նշելով, որ ՀՀ վարչապետը և կառավարությունն այլևս ի վիճակի չեն ընդունելու ադեկվատ որոշումներ՝ հայ ժողովրդի համար այս ճգնաժամային և ճակատագրական իրավիճակում:

«Գործող իշխանությունների անարդյունավետ կառավարումը և արտաքին քաղաքականությունում ցուցաբերած լրջագույն սխալները երկիրը հասցրել են կործանման եզրին»,- նշել են հրամանատարները, ինչից հետո Նիկոլ Փաշինյանը ՀՀ նախագահի է ներկայացրել Օ. Գասպարյանին ԳՇ պետի պաշտոնից ազատելու առաջարկը։

Գործող Սահմանադրության համաձայն՝ նախագահը եռօրյա ժամկետում կամ պետք է ստորագրեր հրամանագիրը, կամ առարկություններով այն հետ ուղարկեր ՀՀ վարչապետին։

ՀՀ Նախագահն ընտրեց երկրորդ տարբերակը և իր սահմանադրական լիազորությունների շրջանակում, առարկություններով վերադարձրել է հրամանագրի նախագիծը՝ նշելով, որ՝ ստեղծված իրավիճակն աննախադեպ է, պահանջում է համակարգային և համապարփակ լուծումներ և չի կարող կարգավորվել կադրային հաճախակի փոփոխությունների միջոցով՝ առանց հաշվի առնելու երկրում առկա վիճակը:

Պաշտոնական հաղորդագրության մեջ նաև նշվել էր, որ՝ Իրավաբանների և փորձագետների տեսակետներն ամփոփելով՝ կարելի է եզրակացնել, որ հրամանագրի նախագիծն առերևույթ հակասում է Սահմանադրությանը:

Սահմանադրության համաձայն ՀՀ վարչապետը 5-օրյա ժամկետում կրկին պետք է ՀՀ նախագահին ներկայացնի հրամանագրի նախագիծը, իսկ նախագահը կրկին եռօրյա ժամկետում պետք է կայացնի որոշում՝ ընդ որում ունենալով երկու տարբերակ՝ կամ ստորագրել հրամանագիրը կամ դիմել Սահմանադրական դատարան։  

Աղբյուր` Փաստինֆո