Փաստ ինֆո

«Հայաստանի Հանրապետության Սահմանադրությամբ,  Զինված ուժերը քաղաքական պրոցեսներին խառնվելու իրավունք չունի, բայց այն իրավիճակը, որ հիմա ստեղծվել է մեր երկրում, վեր է, նույնիսկ, քաղաքական կոչվելուց: Մենք հասել ենք նրան, որ խոսքն, արդեն, ազգի և պետության պահպանության հարց է: Փաշինյանի անհեթեթ որոշումներն ու անմտածված պաշտոնանկությունները ազգային անվտանգության հետ կապված լուրջ խնդիրներ են ստեղծում պետության ներսում: Նա պարտավոր է իմանալ, որ Զինված ուժերը որևէ մեկի սեփական ամբիցիաների վրա հիմնված կառույց չէ: Այն պետության սահմանների ու արտաքին մարտահրավերների պաշտպանությամբ զբաղվող կառույց է, որ հենց հիմա էլ՝ իր վերջին որոշմամբ, հստակ շարունակում է իր ծառայությունը բերել Հայաստանի Հանրապետությանը»,- «Փաստինֆո»-ի հետ զրույցում ասել է մահապարտ ազատամարտիկ Եփրեմ Մարգարյանը։ Հիշեցնենք, որ բարձրաստիճան զինվորականների կողմից Նիկոլ Փաշինյանի հրաժարականի պահանջին  ի պատասխան վերջինս Նախագահի աշխատակազմին ներկայացրեց Օնիկ Գասպարյանին պաշտոնանկ անելու հրամանագրի նախագիծը, ֆեյսբուքում էլ գրառում կատարեց, թե իր իշխանության տարիներին որքան է բարձրացրել զինվորականների աշխատավարձը։

Եփրեմ Մարգարյանը նկատեց՝ ՀՀ-ում վարչապետ աշխատող անձի անհեթեթ որոշումները լցրել են Զինված ուժերում ծառայություն իրականացնող արժանապատիվ զինվորականների համբերության բաժակը. «Այդ մարդիկ արդեն չեն կարողանում և չեն էլ ցանկանում կուլ  տալ այս ամենը: Բանակում երբևէ չծառայած ու ոլորտից գաղափար չունեցող վարչապետն իրեն իրավունք է վերապահում  վերաձևակերպելու Գլխավոր շտաբի վրա դրված գործառույթներն ու պատասխանատվության բեռը:Ի գիտություն նրա, պետք է ընդգծեմ, որ Զինված ուժերի բոլոր ցուցումները գալիս են անմիջականորեն գլխավոր շտաբի պետի կողմից, իսկ այսօրվա ԳՇ պետը փայլուն զինվորական ուղի անցած անաչառ զինվորական է, որն այլևս չի ցանկանում հանդուրժել որևէ մեկի անուղեղ կամայականությունները: Զինված ուժերի բոլոր ցուցումները գալիս են անմիջականորեն գլխավոր շտաբի պետի կողմից, իսկ այսօրվա ԳՇ պետը փայլուն զինվորական ուղի անցած անաչառ զինվորական է, որն այլևս չի ցանկանում հանդուրժել որևէ մեկի անուղեղ կամայականությունները:  Այսպիսի իրավիճակում, Զինված ուժերն այլևս չէր կարող չդնել իր դիրքորոշումը, որքան էլ, որ այդ դիրքորոշումը կտրուկ  ու շրջադարձային է: Երկրում տիրող վերջին ամիսների իրավիճակն է հանգեցրել դրան, իսկ ԳՇ պետն իրավիճակին խիստ համահունչ դիրքորոշում է որդեգրել», - ասում է Եփրեմ Մարգարյանը:

Խոսելով ՀՀ-ում վարչապետ աշխատող Նիկոլ Փաշինյանի  կողմից՝ նախօրեին արված գրառման թեմայով, որտեղ վերջինս անդրադարձել էր Հայոց բանակի զինծառայողների ամսական աշխատավարձի բարձրացման իր նախաձեռնության մասին, մահապարտ ազատամարտիկը նկատում է՝ լավ է արել, որ բարձրացրել է, դա իր նախընտրական խոստումներից մեկն է եղել, որը կատարել է, հիմա ի՞նչ է ուզում դրանով ասել. «Եթե Փաշինյանը զինվորականի աշխատավարձը մի քանի հազար դրամով բարձրացնելու իր քայլը հիմա փորձում է մանիպուլյացիոն նպատակների համար ծառայեցնել, ապա ամոթ իրեն: Երբ Փաշինյանը տեղին - անտեղին հիշատակում է նախկինների անունը, մեղադրում նրանց կոռուպցիայի մեջ թաթախված լինելու համար, որի դեմ, ինքը, իբր պայքարելու եկած մարտիկ է, հիմա մեջտեղ բերելով զինվորականների աշխատավարձի բարձրացման այս թեման, ակամա դառնում է նախորդների իրավահաջորդը, որովհետև ստացվում է, որ ինքը ևս փողով հարց լուծող է՝ բարձրացրել եմ ձեր աշխատավարձը՝ փակե՞ք ձեր բերանները… Սա՞ է այդ մարդու ասածը…»,- նշում է  մահապարտ ազատամարտիկը:  

Անդրադառնալով երկրի ներսում ընթացող  ներքաղաքական զարգացումների թեմային,  Եփրեմ Մարգարյանը նշում է՝ լարվածությունն ակնհայտ է. «Փաշինյանն, իհարկե, ամեն ինչ կանի՝ բախումների գնալու համար, նա դրա  փայլուն վարպետն է: Ինչ վերաբերում է Օնիկ Գասպարյանին, ապա ճանաչելով նրան, վստահ եմ, որ նա իր բռնած ճանապարհից հետ կանող մարդ ու զինվորական չէ: Ուրիշ բան, որ, ի տարբերություն Փաշինյանի, նա ամեն ինչ կանի՝ հնարավոր բախումները կանխելու համար, նա քաղաքացու արյուն չի թափի: Իմ դիրքորոշումը ներքաղաքական այս իրավիճակում հստակ է՝ եթե ես չեմ հանդուրժում օրվա իշխանություններին, սա դեռ  չի նշանակում, որ համամիտ եմ ընդդիմության ճամբարում հայտնված շատերի հետ»:

 Ստեղծված իրավիճակից դուրս գալու  ելքը, Եփրեմ Մարգարյանի համար   հստակ է՝  երկրի ղեկն, այս իրավիճակում պետք է վերցնել գործակալական ցանցի ձեռքից և հանձնել  ռազմաքաղաքական ուժերի ձեռք. «Հիմա երկիրը պետք է ղեկավարեն բացառապես միայն  ռազմաքաղաքական ուժերը, որովհետև այն, ինչ կատարվում է երկրի ներսում  և դրա սահմաններին, մեզ տանում է ազգի, պետության և պետականության կործանման անշեղ ճանապարհով: Իրավիճակը պետք է արագ կերպով վերահսկողության տակ վերցնել, իսկ դա հիմա ի զորու է անել միայն ռազմաքաղաքական վերնախավը, այլ ելք այս պահին չկա»,- ամփոփելով զրույցն, ասում է մահապարտ ազատամարտիկ Եփրեմ Մարգարյանը:

Հիշեցնենք, որ նախօրեին ՀՀ ԶՈւ Գլխավոր շտաբը հայտարարությամբ էր հանդես եկել, որով իր վճռական բողոքն էր արտահայտել անհեռատես և չհիմնավորված պատճառներով ՀՀ զինված ուժերի գլխավոր շտաբի պետի 1-ին տեղակալի պաշտոնից ազատման առնչությամբ, որն իրականացվել էր առանց Հայաստանի Հանրապետության ազգային և պետական շահերը հաշվի առնելու՝ հիմնվելով միայն անձնական և հավակնոտ զգացմունքների վրա, միաժամանակ ընդգծելով, որ երկրի և պետության  համար այսպիսի ծանր պայմաններում նման որոշումը հակապետական և անպատասխանատու քայլ է:

Ստեղծված իրավիճակով պայմանավորված՝ ՀՀ զինված ուժերը պահանջել էին  ՀՀ վարչապետի և կառավարության հրաժարականը, միաժամանակ նախազգուշացնելով՝ ձեռնպահ մնալ ժողովրդի դեմ ուժ կիրառելուց, ում զավակները զոհվել են՝ պաշտպանելով Հայրենիքն ու Արցախը:

Հեղինակ՝ Նվարդ Մանվելյան

Աղբյուր` Փաստինֆո