Փաստ ինֆո

«Քանի դեռ Նիկոլ Փաշինյանը ՀՀ-ում վարչապետ է աշխատում, Հայաստանում քաղաքական լարվածությունը չի նվազի, իսկ հանրային, քաղաքական, տնտեսական, սոցիալական կյանքը բնականոն հուն չի վերադառնա: Այդ մարդը չունի ո´չ լեգիտիմություն, ո´չ կոմպետենտություն, բացարձակապես չունի ոչ մի հնարավորություն՝ առաջ տանելու Հայաստանը, լուծելու գերիների ու անհետ կորածների հարցը, պատերազմի հետևանքները, ինչպես նաև՝ պատշաճ կերպով ներկայացնելու երկիրը միջազգային ասպարեզում: Այլ կերպ ասած՝ Նիկոլ Փաշինյանը Հայաստանի անկայունության աղբյուրն է, հետևաբար, ՀՀ ԶՈւ Գլխավոր Շտաբի երեկվա հայտարարությունը խիստ պահանջված էր, եթե չասենք, նույնիսկ, ուշացած»,- «Փաստինֆո»-ի հետ զրույցում ասել է քաղաքական վերլուծաբան Անդրանիկ Թևանյանը:

Քաղաքական վերլուծաբանը նկատում է՝ անկախ նրանից, թե ներքաղաքական իրավիճակով պայմանավորված, ինչ զարգացումներ կլինեն, ամենակարևորն այս պահին այն է, որ հաջողվի պրոցեսները պահել քաղաքական դաշտի շրջանակներում. «Որպես կանոն, ցնցումների կողմնակից մշտապես Նիկոլ Փաշինյանն է եղել, որի արդեն այսօրվա կարագախոսն է՝ կամ ինքը կլինի Հայաստանի վարչապետ կամ Հայաստանը չի լինի: Նա շատ լավ է հասկանում, որ իշխանափոխությունից հետո ինքն, անպայման, քրեական պատասխանատվության է ենթարկվելու՝ թե´ պատերազմից առաջ տեղի ունեցածի, թե´ բուն պատերազմի, թե´ դրա խայտառակ պարտության և հետևանքների առնչությամբ: Հետևաբար, աթոռին կառչած մնալու իր գլխավոր մոտիվացիան վախն է: Աթոռից կտրվելն իր համար, նույնիսկ, ֆիզիկական անվտանգության խնդիր է, ինչպես նաև՝ այս ընթացքում կայծակնային արագությամբ կուտակած միջոցների ապահով պահպանման խնդիր: Այլ հարց է, թե ի՞նչ է սպասում Փաշինյանի թիմակիցներին իշխանափոխությունից հետո: Պարզ է, որ նրանց մեծ մասի համար, իհարկե, ֆիզիկական անվտանգության խնդիր չկա, պարզապես, ե, նրանք, միգուցե, չեն կարողանում վճռական որոշում կայացնեն: Այս իմաստով, Նիկոլ Փաշինյանը քաղաքական մահապարտության խորհրդանիշ է: Անկասկած, նա իր հետ կտանի նաև իր թիմակիցներին, որովհետև իր համար նրանք, բացարձակապես, որևէ արժեք չեն ներկայացնում, ինքը միայն իր անձնական խնդիրներն է լուծում»,- նշում է Անդրանիկ Թևանյանը:

Խոսելով Փաշինյանի որդեգրած վարքագծի մասին՝ Անդրանիկ Թևանյանը նկատում է՝ առավել տհաճ է լսել, թե ինչպես է նա բարձրախոսը ձեռքին, աջ ու ձախ հայտարարում, թե սիրում է բոլորին, այն պարագայում, երբ նրա համար միևնույն են ոչ միայն բոլորը, այլև մի ողջ պետություն՝ մեծ իմաստով վերցված: Վերջինս նկատում է՝ այդպիսի պոպուլիստ, դեմագոգ և երեսպաշտ վարքագիծ դրսևորելով, Նիկոլ Փաշինյանն, անուղղակիորեն հայտարարում է, որ ինքը Հիսուս Քրիստոսն է. «Փաշինյանն անընդհատ կեղծում է իրեն, նա այդպիսին էր ընդդիմադիր աշխատած տարիներին, երբ բավական լավ էր կեղծում, դրա դիմաց էլ բավականին լավ վճարվում էր, հիմա էլ իշխանությունում է աշխատում և այս անգամ՝ բավական լավ ինքնավարձատրվում է»,- ասում է Անդրանիկ Թևանյանը:

Արդյո՞ք Փաշինյանը գիտակցված արյունալի բախման է տանում ժողովրդի երկու հատվածներին: Անդրանիկ Թևանյանը նկատում է՝ այս մարդը, բացարձակապես, որևէ խնդիր չունի՝ արյուն հեղելու տարբերակով մի քիչ էլ իշխանական աթոռին մնալու հեռանկարի հետ. «Որպես ընդդիմություն, նա դա արդեն մեկ անգամ արել է՝ 2008 –ի մարտի 1-ին, որպես իշխանություն՝ առավել ևս, նման խնդիր չի ունենա: Ամեն ինչ կախված է նրանից, թե ինչպե՞ս կլուծվի իր անձի անվտանգության հետ կապված խնդիրն, ինչպես նաև՝ կուտակած ռեսուրսների պահպանման հարցը: Այլ իրավիճակ է ստեղծվում, երբ հասարակությունը զանգվածային կերպով ոտքի է կանգնում: Այս պարագայում նա չի կարող այդպիսի քայլերի գնալ: Եթե սրան էլ հավելենք նաև Զինված ուժերի հայտարարությունը, որն իր մեջ որոշակի չափով բալանսավորում է պարունակում և բախումները, հնարավորինս, բացառելու որոշակի երաշխիքներ է տալիս, ապա հույս կա, որ կհաջողվի շրջանցել արյունահեղության հեռանկարը: Ամեն դեպքում, մենք չենք կարող անտեսել Նիկոլ Փաշինյան անձի արատավոր վարքը: Նա չի խորշի՝ թող լիքը զոհ պահանջվի՝ ինձնից բացի կարգախոսից, ինչը նա մի քանի անգամ արդեն հաստատել է՝ ինչպես մարտի 1–ին, այնպես նաև` վերջին պատերազմի ընթացում», -ամփոփելով զրույցն, ասում է քաղաքական վերլուծաբան Անդրանիկ Թևանյանը:

Հիշեցնենք, որ երեկ ՀՀ ԶՈւ Գլխավոր շտաբը հայտարարությամբ էր հանդես եկել, որով իր վճռական բողոքն էր արտահայտել անհեռատես և չհիմնավորված պատճառներով ՀՀ զինված ուժերի գլխավոր շտաբի պետի 1-ին տեղակալի պաշտոնից ազատման առնչությամբ, որն իրականացվել էր առանց Հայաստանի Հանրապետության ազգային և պետական շահերը հաշվի առնելու՝ հիմնվելով միայն անձնական և հավակնոտ զգացմունքների վրա, միաժամանակ ընդգծելով, որ երկրի և պետության համար այսպիսի ծանր պայմաններում նման որոշումը հակապետական և անպատասխանատու քայլ է:

Ստեղծված իրավիճակով պայմանավորված՝ ՀՀ զինված ուժերը պահանջել էին ՀՀ վարչապետի և կառավարության հրաժարականը, միաժամանակ նախազգուշացնելով՝ ձեռնպահ մնալ ժողովրդի դեմ ուժ կիրառելուց, ում զավակները զոհվել են՝ պաշտպանելով Հայրենիքն ու Արցախը:

Հեղինակ՝ Նվարդ Մանվելյան

Աղբյուր` Փաստինֆո