Փաստ ինֆո

Մեր պահանջը ՀՀ նախագահից մեկն է՝ արագ լուծում տալ մեր երկրում ստեղծված աննորմալ վիճակին: Այս մասին Հայրենիքի փրկության շարժման հանրահավաքի ժամանակ հայտարարեց «Հայրենիք» կուսակցության ղեկավար Արթուր Վանեցյանը:

Վանեցյանը տեղեկացրեց, որ այսօր Հայրենիքի փրկության շարժման պատվիրակության և նախագահի հանդիպման ժամանակ, իրենք նախագահին ներկայացրել են առաջարկություններ և պահանջներ.

«Նախագահից պահանջել ենք, որ, որպես սահմանադրության երաշխավոր, իրականացնի իր սահմանդրական լիազորությունները և չստորագրի ԶՈՒ ԳՇ պետ Օնիկ Գասպարյանի ազատման դիմումը»,-ասաց Արթուր Վանեցյանը:

ԱԱԾ նախկին ղեկավարն ընդգծեց, որ ԶՈՒ ԳՇ պետը ապաքաղաքական պաշտոն է և քաղաքական նպատակներով նրան աշխատանքից ազատելը Սահմանադրության խախտում է.

«Մենք ունենք տարօրինակ իրավիճակ. ունենք դեռևս դեռևս վարչապետի աթոռին նստած մի մարդ և ունենք ԶՈՒ ողջ կազմի հայտարարությունը, որ պահանջում են վարչապետի և կառավարության հրաժարականը, ինչը նշանակում է, որ մեր երկիրն այսօր ունի լրջագույն անվտանգային խնդիր և սպառնալիք, և այդ հարցի լուծում պետք է տա ՀՀ նախագահը»,-ասաց Վանեցյանը:

Վերջինս նաև հայտնեց, որ հանդիպման ժամանակ նախագահը լսել է նրանց պահանջը և ասել, որ կհանիպի ԶՈՒ ԳՇ պետի հետ և առաջիկա օրերին իր որոշումը կկայացնի:

Անդրադառնալով ԶՈՒ Գլխավոր շտաբի՝ վարչապետի հրաժարականի պահանջով հայտարարությանը, ԱԱԾ նախկին ղեկավարը նկատում է, որ իշխանական քարոզչամեքենան փորձում է մանիպուլացնել հանրությանը և ասել թե դա ռազմական հեղաշրջման փորձ է.

«Եթե բանակը ռազմական հեղաշրջման փորձեր աներ, արդյո՞ք մենք այսօր փողոցում հավաքված կպահանջեինք Փաշինյանի հրաժարականը, իհարկե՝ ոչ: Այդ հայտարարությունը մեր հանրության համար լրջագույն ահազանգ է որ երկիրը գտնվում է ծայրահեղ վիճակում և մենք կանգնած ենք անդունդի եզրին»,-ասաց իր ելույթում ասաց Արթուր Վանեցյանը:

Աղբյուր` Փաստինֆո