Փաստ ինֆո

Մայրաքաղաքում իրավիճակը հանգիստ է եւ, ի հեճուկս Նիկոլ Փաշինյանի հայտարարության, զինված հեղաշրջման կամ նման փորձի որեւէ նշույլ անգամ չկա։

«Փաստինֆո»-ի նկարահանող խումբը շրջել է Երեւանում, եղել հանրապետության հրապարակում, որտեղ տեղակայված է կառավարության շենքը՝ երկրի վարչապետի նստավայրը,եւ չի հանդիպել է որեւէ զինվորականի, առավել եւս զինտեխնիկայի։

Հիշեցնենք, որ ՀՀ ԶՈՒ ԳՇ պետն ու հրամկազմը երեկ հանդես են եկել Նիկոլ Փաշինյանի հրաժարականի պահանջով.

«ՀՀ վարչապետը և կառավարությունն այլևս ի վիճակի չեն ընդունելու ադեկվատ որոշումներ՝ հայ ժողովրդի համար այս ճգնաժամային և ճակատագրական իրավիճակում: ՀՀ զինված ուժերը երկար ժամանակ համբերատար կերպով հանդուրժում էր գործող իշխանության կողմից զինված ուժերը վարկաբեկելուն ուղղված «գրոհները», սակայն ամեն ինչ ունի իր սահմանները: ՀՀ զինված ուժերը պատվով է կատարել իր պարտքը, իր ժողովրդի հետ ուսուսի մարտնչել թշնամու դեմ: Գործող իշխանությունների անարդյունավետ կառավարումը և արտաքին քաղաքականությունում ցուցաբերած լրջագույն սխալները երկիրը հասցրել են կործանման եզրին: Ստեղծված իրավիճակով պայմանավորված՝ ՀՀ զինված ուժերը պահանջում են ՀՀ վարչապետի և կառավարության հրաժարականը, միաժամանակ նախազգուշացնում՝ ձեռնպահ մնալ ժողովրդի դեմ ուժ կիրառելուց, ում զավակները զոհվել են՝ պաշտպանելով Հայրենիքն ու Արցախը: Բանակը միշտ եղել է ժողովրդի հետ, ինչպես ժողովուրդն է բանակի հետ»,- նշվում է հայտարարության մեջ:

Նիկոլ Փաշինյանն այս հայտարարությունը շտապեց որակել զինված հեղաշրջման փորձ, թեեւ բանակի հրամկազըմը որեւէ զինված ստորաբաժանում չէր բերել քաղաք, չէր փորձել գրավել որեւէ կառավարական շենք ու շարունակում է կատարել սահմանադրական իր առաքելությունը, այն է՝ երկրի սահմանների անվտանգության ապահովումը։

Խորհրդարանական եւ արտախորհրդարանական ընդդիմությունն արձագանքեց, որ զինվորականների հայտարարությունը որեւէ կերպ չի կարելի գնահատել զինված հեղաշրջում այն պարզ պատճառով, որ զինվորականները նեքաղաքական գործընթացներին միջամտելու որեւէ փորձ չեն արել, զորք դուրս չեն բերել։ Այսօր արդեն հայտարարության երկրորդ օրն է՝ «Փաստինֆո»-ի տեսախցիկը Հանրապետության հրապարակում արձանագրեց միայն ոստիկանների, որոնք հանդիսանում են Նիկոլ Փաշինյանի թերեւս հիմնական հենարանը։

Աղբյուր` Փաստինֆո