Փաստ ինֆո

«Դժվարանում եմ ասել, թե որտեղ է Հայկ Մարությանը, երևի վախից՝ տանից դուրս չի գալիս կամ, գուցե, պատիվ ունի և աշխատում է քաղաքապետարանի շենքում ու չի գալիս միանալու Փաշինյանի հորինած այս խեղկատակությանը՝ ինքն իրեն հերթական անգամ ծաղր ու ծանակի առարկա չդարձնելու համար «Փաստինֆո»-ի հետ զրույցում ասել է Երևանի ավագանու ԵԼՔ խմբակցության քարտուղար Թեհմինա Վարդանյանը՝ չբացառելով, որ, գուցե, նրա մեջ ինքնասիրության նշույլներ են հայտնվել։

«Պատրաստ եմ, նույնիսկ, սատարել Հայկ Մարությանին, եթե նա ևս միանա ու պահանջի Նիկոլ Փաշինյանի հրաժարականը», - նշել է Թ.Վարդանյանը։ Ինչպես հայտնի է, Երեւանի քաղաքապետը չի մասնակցել նախօրեին Նիկոլ Փաշինյանի կազմակերպած հանրահավաքին, որին, վարչական ռեսուրսի կիրառմամբ, ապահովվել էր մի շարք այլ պետական եւ տեղական ինքնակառավարման մարմինների աշխատակիցների ներկայությունը։

Թեհմինա Վարդանյանն ասում է՝ ինքը եւս նկատել է, որ քաղաքապետ Հայկ Մարությանը երեկ ներկա չի գտնվել Փաշինյանի հայտարարած հրատապ հավաքին և ուզում է անկեղծորեն հավատալ, որ այդ բացակայությունը կապ ունի, բացառապես, Հայկ Մարությանի ներսում արթնացած արժանապատվության զգացումի հետ. «Վերջին մեկ տարվա ընթացքում թե´ լրատվական դաշտում, թե´ ներքաղաքական հարաբերությունների մեջ, Փաշինյանը հնարավոր բոլոր միջոցներով ոտատակ է առել Հայկ Մարությանին: Չմոռանանք, որ «Իմ քայլ»-ի ռահվիրան՝ «Հայկական ժամանակ»-ը վերջին շրջանում խիստ քննադատական հոդվածներով է անդրադառնում Հայկ Մարությանի անձին և քաղաքական գործունեությանը՝ հնարավորինս վարկաբեկելով նրան, ընդհուպ մինչև՝ կոռուպցիոն սկանդալների մեջ ներգրավված լինելու մեղադրանքով: Բոլորիս համար էլ պարզ է, որ «Իմ քայլ»-ի ռահվիրան՝ «Հայկական ժամանակ»-ն, առանց Նիկոլ Փաշինյանի կամ նրա կնոջ գիտության և համաձայնության, նման վարք չի դրսևորի: Հետևաբար, այս ամենի ֆոնին, ուզում եմ հավատալ, որ Հայկ Մարությանն, իսկապես, վիրավորված է և, վերջապես, կգնա քայլին՝ պահանջելու Նիկոլ Փաշինյանի հրաժարականը, որի մասին մենք նրան ասում ենք՝ սկսված խայտառակ կապիտուլացիոն ակտի ստորագրման պահից»,- նշում է Երևանի ավագանու ԵԼՔ խմբակցության քարտուղար Թեհմինա Վարդանյանը:

Խոսելով վերջին շրջանում Հայկ Մարությանի որդեգրած վարքագծի մասին, Թեհմինա Վարդանյանը նկատում է՝ չմոռանանք, որ ժողովուրդն, իրականում, ոչ թե Հայկ Մարությանին է ընտրել քաղաքապետի պաշտոնում, այլ Նիկոլ Փաշինյանին: Այնուամենայնիվ, փաստ է, որ մարդկանց 81-ն իր ձայնը տվել է Հայկ Մարությանի օգտին: Հետևաբար, ըստ վերջինիս, երևանցին իրավունք ունի իմանալու, թե ի՞նչ է մտածում Երևանի դե յուրե քաղաքապետը՝ երկրում և մայրաքաղաքում տիրող իրավիճակի և կատարվող ներքաղաքական զարգացումների վերաբերյալ. «Այն մարդիկ, ովքեր խուսափում են այսօրինակ հարցերին անդրադառնալուց, հայտարարելով, թե Երևանի ավագանին քաղաքական մարմին չէ, նրանց պետք է հիասթափեցնեմ, հիշեցնելով, որ ավագանին, ինքնին, քաղաքական մարմին է, թեկուզ միայն այն պատճառով, որ ընտրվում է կուսակցական ցուցակով և ներկայացվում է կուսակցության կողմից»,- ասում է Թեհմինա Վարդանյանը:

Հարցին՝ ի՞նչ խնդիրներ ունի Հայկ Մարությանը ներթիմային հարաբերություներում, որ արժանացել է Նիկոլ Փաշինյանի այսօրինակ վերաբերմունքին, ինչի արդյունքում, անթաքույց կերպով լարվել են նրա և մի ողջ քաղաքական թիմի հարաբերությունները, Թեհմինա Վարդանյանը պատասխանում է՝ խնդիրները երկուստեք են և կես կատակ հավելում. «Ինչպես Հայկ Մարությանի մասնակցությամբ հայտնի մանրապատման մեջ է նկարագրված, իշխանության և քաղաքապետի՝ վերջին մեկ տարվա հարաբերություններն իրենցից ներկայացնում են՝ «բոշա – փչացած» անվերջ ձգվող «երկխոսությունը», որից Հայկ Մարությանն, այնուամենայնիվ, լավ առիթ ունի դուրս գալու՝ պահանջելով կապիտուլյանտ վարչապետի հրաժարականը, սրանով պահպանելով, գոնե, իր հեռուսատադիտողների մի որոշ հատվածի սերը և այն հույսը, որ քաղաքապետի պաշտոնն ու քաղաքական տապալած կարիերան թողնելուց հետո, նա կարող է վերադառնալ իր նախկին՝ զվարճալի մանրապատումների մեջ նկարահանվելու աշխատանքին», -ամփոփելով զրույցն, ասում է Երևանի ավագանու ԵԼՔ խմբակցության քարտուղար Թեհմինա Վարդանյանը:

Հեղինակ՝ Նվարդ Մանվելյան

Աղբյուր` Փաստինֆո