Փաստ ինֆո

«ԶՈՒ հայտարարությունը քաղաքական չէ։ Նրանք իրենց աջակցությունը չեն հայտնել Հայրենիքի փրկության շարժմանը, որևէ այլ քաղաքական ուժի, ուղղակի խոսել են այն մասին, որ Փաշինյանը այլևս ի վիճակի չէ ապահովել մեր երկրի անվտանգությունը։ Մենք սովորական քաղաքկան օրակարգում չենք։ Արտառոց իրավիճակում ենք գտնվում»։ «Հայրենիք» կուսակցության ղեկավար Արթուր Վանեցյանը Բաղրամյան պողոտայում էր։

Հայրենիքի փրկության շարժման հանրահավաքից առաջ լրագրողների հետ զրույցում ասաց, որ միանշանակ աննախադեպ իրադարձություն է տեղի ունեցել մեր երկրում, երբ ԳՇ պետը և ողջ հրամկազմը հայտարարել են Նիկոլ Փաշինյանի հրաժարականի անհրաժեշտության մասին։

Վանեցյանը տեղեկացրեց՝ ամեն դեպքում, ամեն ինչի լուծումը ի վերջո լինելու է քաղաքական ճանապարհով։ «Սա ինչ որ ուռուցք չէ, որ ինքն իրեն ներծծվի գնա»։

Անդրադառնալով վարչապետի՝ երեկ հանրապետության հրապարակում հնչեցրած առաջարկությանը՝ դադարեցնել ակցիաները և բանակցել, Վանեցյանը նշեց, որ պաշտոնական պատասխան դեռ չի եղել.

«Ես հրապարակային կոչին եմ ծանոթ, անձամբ իմ հետ, շարժման հետ կապ չեն հաստատել, պաշտոնական չեն դիմել մեզ  հանդիպելու։ Հրապարակային պատասխանել ենք՝ պատրաստ ենք վարչապետին հանդիպել ու քննարկել իր հրաժարականը, որն էլ մեր համար մեկ պահանջն է»։

Արթուր Վանեցյանը նշեց, որ հիմա ապստամբություն են իրականացնում՝ Բաղրամյան պողոտան փակելով, իսկ հետագա քայլերի հաջորդականություններ ունեն, որոնց մասին հիմա չի ցանկանում տեղեկացնել։

«Կարծում եմ, գնդակը ՀՀ նախագահի դաշտում է և նախագահը այսօր ունի լիազորություն, որ ինքը պետք է հանգուցալուծումը տա այս իրավիճակին։ Հույս ունեմ, որ նախագահը տեսնում է՝ ինչ է կատարվում մեր երկրում և ինքն է հայտարարել, որ անհրաժեշտ է Նիկոլ Փաշինյանի հրաժարականը ու նոր ընտրությունների անցկացումը։ Կարծում եմ, որ նախագահը որևէ կերպ չի թելի իշխանությունների թելը և կկատարի սահմանադրության պաշտպանի իր լիազորությունները»։

Վանեցյանը նաև տեղեկացրեց, որ ԳՇ պետը նշանակվում է հինգ տարով և ևս հինգ տարով ,մեկ անգամ, կարող է  երկարացվել պետի լիազորությունները, որպեսզի անկախ քաղաքական ուժերի վերադասավորումից, բանակը մնա ապաքաղաքական։ Իսկ այսօր  ԳՇ պետին ազատել ինչ-ինչ դրդապատճաներով, սահամանդրությամբ չի նախատեսվում։

«Նիկոլ Փաշինյանի միջնորդությունը՝ ազատել ԳՇ պետին, հակասահմանադրական է ու նախագահը պետք է առարկություններով այդ միջնորդությունը հետ վերադարձնի վարչապետին, իսկ եթե մեկ անգամ էլ վարչապետը ներկայացնի միջնորդություն, ապա հույս ունեմ,որ նախագահը կդիմի Սահմանադրական դատարան»,-ընդգծեց Արթուր Վանեցյանը։

Արթուր Վանեցյանը մեկ անգամ էլ հիշեցրեց, որ ՀՀ գլխավոր հարցը՝ գերիների վերադարձը, մինչև այս պահը դեռ լուծված չէ։

«Պաշտոնապես խոսք եմ տալիս, որ իմ իշխանության գալու պարագայում, գերիների վերադարձի հարցը լինելու է մի քանի օրվա հարց։ Գործող իշխանությունը պարտված է ու չի կարողանում իր պահանջները ներկայացնի մեր հակառակորդին»,-հայտարարեց Վանեցյանը։

Մանրամասները՝ տեսանյութում

Աղբյուր` Փաստինֆո