Փաստ ինֆո

Երթի մասնակիցները «Առանց Նիկոլ Հայաստան», «Նիկոլ դավաճան» վանկարկումներով անցան Բաղրամյան պողոտայով, Պարոնյան փողոցով և հասան ԱԳՆ շենքի մոտ։ Շարժման մասնակիցները մինչև այդ կանգ էին առել ՀՀ նախագահի նստավայրի, ապա կառավարական առանձնատան մոտ։ 

ՀՅԴ անդամ Արծվիկ Մինասյանը ԱԳՆ-ի մոտ հիշեցրեց վարչապետի՝ Իսկանդերի պայթելու մասին հայտարարությունը, նշելով, որ  այդպիսով նա հեղինակազրկեց միջազգային հարաբերությունը երկու ռազմավարական գործընկերների միջև, ապա  նսեմացրեց մեր բանակն ու ԶՈՒ-երը, իսկ երեկ էլ՝ ԶՈՒ ԳՇ հայտարարությունը մեկնաբանեց որպես հեղաշրջման փորձ։

Արծվիկ Մինասյանն ասաց, որ ոչ ավել, ոչ պակաս, այդ մարդը Հայաստանի միջազգային հեղինակությունը ոտնատակ տվեց։

«Միջազգային մամուլի բոլոր գլխագրերում խոսվում էր այն մասին, որ Հայաստանը տասնհինգերորդական  կարգի երկիր է։ Աղավաղելով իրականությունը՝ Հայաստանի թշնամիներին հնարվորություն տվեց, որ Հայաստանի մասին սկսեն վայրահաչել։ Պարզ է, որ առաջինը Փաշինյանին պետք է աջակցություն ցուցաբերեր Թուրքիայի արտաքին գործերի նախարարությունը։ Սա հերթական անգամ Հայաստանը ներսից քայքայելու փորձ է։ Եթե այս երկրում կա պետական հեղաշրջման թիվ մեկ մեղավոր, դա Նիկոլ Փաշինյանն է»։

Մինասյանը դիմեց ԱԳՆ ողջ անձնակազմին,մասնավորապես՝ դիվանագիտական կորպուսին, նշելով, որ պարտավոր են դավաճանի արտահայտությունները սրբագրել։

«Բոլոր միջազգային կառույցներում ու երկրներում, որտեղ գտնվում են, պարտավոր են արձանագրել ու փոխանցել աշխարհին՝ ՀՀ-ում իշխանությունը այսուհետ պատկանում է արժանապատիվ ժողովրդին»,-նշեց Մինասյանն ավելացնելով, որ ՀՀ բանակը երաշխավորում է Հայաստանի անվտանգությունը, որի թիվ մեկ սպառնալիքն այսօր երկրի գործադիր իշխանության աթոռը զավթած անձն է։

Ելույթից հետո շարժման մասնակիցները քայլեցին նաև դատախազության շենքի մոտ՝ ՀՀ գլխավոր դատախազին ուղերձ փոխանցելու համար։

Աղբյուր` Փաստինֆո