Փաստ ինֆո

Ներքաղաքական զարգացումների շուրջ «Փաստինֆո»-ն զրուցել է քաղտեխնոլոգ Արմեն Բադալյանի հետ:

-Պարո՛ն Բադալյան, նախ Ձեր գնահատականը երեկ Հայաստանում տեղի ունեցած քաղաքական գործընթացներին, ինչ է տեղի ունենում։

-Գլխավոր իրադարձությունն այն է, որ երկրի պաշտպանության ողջ համակարգը հայտարարեց, որ վարչապետը պետք է գնա: Երբ ԳՇ պետը և տեղակալները, վարչության պետերը, կորպուսի հրամանատարները վարչապետին ասում են, որ պետք է գնաս, դա ողջ բանակի հայտարարությունն է, իսկ երկրում չի կարող այնպիսի իրավիճակ լինել, որ բանակը չի ենթարկվում քաղաքական իշխանությանը:Սա արդեն աբսուրդային իրավիճակ է, բանակը չի ենթարկվում վարչապետին, իսկ վարչապետը չի գնում:Բանակը վերահաստատել է, որ վարչապետը պետք է գնա, բայց վարչապետը դեռևս շարունակում է մնալ իր պաշտոնին, որովհետև նա ունի ոստիկանության աջակցությունը, շատ քիչ վարչական ռեսուրս:

Երեկ նկատեցինք, որ իր հանրահավաքին Երևանի քաղաքապետը չկար, այսինքն՝ մայրաքաղաքի իշխանությունը իր կողքին չէ:Շատ էին վարչական ռեսուրսով բերված մարդիկ, քաղաքացիական հագուստով ոստիկաններ, ինչպես նաև նախարարությունից բերված մարդիկ: Իհարկե, կային նաև իր կողմնակիցները, որոնք շատ քիչ էին:

-Երեկ Նիկոլ Փաշինյանը հայտարարեց, որ Զինված ուժերի հայտարարությունը ռազմական հեղաշրջման փորձ է: Ձեր գնահատմամբ՝ ԶՈՒ հայտարարությունը արդյո՞ք պարունակում էր ռազմական հեղաշրջման տարրեր.

-Ոչ, դա ռազմական հեղաշրջման փորձ չէ, ռազմական հեղաշրջում նշանակում է, որ տանկեր, զրահատեխնիկան դուրս գա, գրավեն կառավարական շենքեր, իսկ սա ընդամենը հայտարարություն է:

-ԶՈՒ հայտարարությանը անմիջապես հաջորդեց Նիկոլ Փաշինյանի կոչը՝ ուղղված իր աջակիցներին, որ հավաքվեն Հանրապետության հրապարակում: Շատերը պնդում են, որ սա ակնհայտ քաղաքական բախումների տանելու փորձ է: Ձեր գնահատականը:

-Ոչ, որովհետև նա չունի այնքան ռեսուրս, որ տանի քաղաքացիական բախումների: Նա երթը վերցրեց այլ ուղղությամբ, որ հանկարծ չհանդիպի ընդդիմության երթին, ես տեսնում եմ փորձ իշխանություն պահելու, բայց դա երկար չի կարող շարունակվել: Նա ունի ֆեյքերի ֆաբրիկան և այդ ֆաբրիկան է աշխատացնում, իսկ ֆեյքերը հասարակություն չեն:

-Այսօր առավոտյան Նիկոլ Փաշինյանը ֆեյսբուքյան գրառում կատարեց, հիշեցնելով, որ իր իշխանության օրոք բանակի հրամանատարների և զինծառայողների աշխատավարձը բարձրացվել է: Ո՞րն էր այս գրառման միտումը:

Դա ինքնաարդարացման փորձ է, որ բոլորը մեղավոր են բացի իրենից, որ ես բանակի համար ամեն ինչ արել եմ, գեներալներն են ապիկար եղել, որ պատերազմը պարտվել ենք

-Քաղաքական ի՞նչ զարգացումներ կլինեն առաջիկայում, ի՞նչ հանգուցալուծում եք տեսնում ստեղծված իրավիճակում:

Պետք է ինչ- որ հանգուցալուծում լինի, դրա համար բազմաթիվ տարբերակներ կան, թե որը կընտրվի, ապագան ցույց կտա:

Աղբյուր` Փաստինֆո