Փաստ ինֆո

Եթե դատախազությունը լսեր իրավաբան-գիտնականների հորդորը և հաղորդման հիման վրա հարուցեր պետական դավաճանության հիմքով քրեական գործ և ձերբակալեր Նիկոլ Փաշինյանին, այսօր Շուռնուխը հանձնված չէր լինի։ Այս մասին ՀՀ գլխավոր դատախազության շենքի մոտ ասաց «Մեկ Հայաստան» կուսակցության նախագահ Արթուր Ղազինյանը։

Ղազինյանը հիշեցրեց, որ պետական դավաճանության մասին հանցագործության մասին հաղորդումներ են ներկայացվել դատախազություն, այդ թվում՝ իրավաբան-գիտնականների կողմից, որտեղ հստակ, կոնկրետ ներկայացված էին պետական դավաճանության կոնկրետ փաստեր, որոնք պահանջում էին գլխավոր գերագույն դավաճան Նիկոլ Փաշինյանի անհապաղ ձերբակալությունը։

«Պարոն գլխավոր դատախազը, չլսելով իր դասախոսներին, նրանց ցուցումին չհետևելով, այդ նույն հաղորդումն ուղարկեց կցելու ըստ էության այդ հաղորդման հետ որևէ առնչություն չունեցող քրեական գործին։ Հունվարին արդեն հանձնվեց Շուռնուխը»,- նշեց Ղազինյանը։

Ղազինյանի խոսքով՝ դատախազությունը զլանում է կատարել օրենքով իրեն վերապահված գործառույթները, հեռացել է իրավունքից, տեղափոխվել է քաղաքական հարթություն և այս դատախազության համակարգում քրեական գործերը հարուցվում և կարճվում են բացառապես այսօրվա իշխանության քաղաքական նպատակահարմարությամբ, ուստի՝ «Հայրենիքի փրկության շարժման» իրավական հանձնախումբը որոշել է, որ դատախազության փոխարեն այդ գործը կվերցնեն իրենց վրա, կպատրաստեն և կներկայացնեն գլխավոր դատախազին՝ ՀՔԾ ՀԿԳ ավագ քննիչին կոնկրետ ցուցում հանձնարարականը՝ Նիկոլ Փաշինյանին ձերբակալելու և նրան մեղադրանք առաջադրելու մասին։ Ղազինյանը նշեց, որ ցուցումը սարքել են գլխավոր դատախազի փոխարեն՝ հիմքում ունենալով արդեն ներկայացված հանցագործության մասին հաղորդումները և Հայաստանում իրավական կարգերի վերականգնման գերակա պահանջը։

Ղազինյանը վստահեցրեց, որ, եթե գլխավոր դատախազը գործեր իր լիազորությունների տիրույթում, ապա Նիկոլ Փաշինյանը և իր հանցավոր խումբը վաղուց կգտնվեր մեկուսարանում։

«Նրանք իրավունք չունեին գտնվել կառավարության շենքում և հրահրել քաղաքացիական պատերազմ՝ իրար դեմ հանելով ժողովրդի երկու խմբերին »,- նշեց նա՝ ընդգծելով, որ հետագա բոլոր իրադարձությունների համար պատասխանատվություն է կրում նաև դատախազությունը և ՀՔԾ-ն, ուստի՝ որպես գործընկեր հորդորում է ստորագրել այդ ցուցումը և ուղարկել ՀՔԾ։

«Գոնե հետո կկարողանաք ձեր սերունդներին ցույց տալ, որ ինչ որ բան եք արել պետական դավաճանությանն իրավական գնահատական տալու համար»,- նշեց Ղազինյանը։

Աղբյուր` Փաստինֆո