Փաստ ինֆո

Դատախազությունն այս պահին պատրա՞ստ է ցույց տալ, որ իսկապես չունի քաղաքական իշխանությունից կախվածություն, որ իսկապես ավտոնոմ սահմանադրական մարմին է, որը սահմանափակված է Սահմանադրությամբ, ՀՀ քրեական դատավարության օրենսգրքով և ՀՀ քրեական օրենսգրքով, թե ոչ։ Այս մասին «Փաստինֆո»-ի հետ զրույցում ասաց փաստաբան Արամ Վարդևանյանը՝ նշելով, որ ՀՀ ԶՈՒ ԳՇ հայտարարությունը վկայում էր, որ երկրի քաղաքական իշխանությունների կողմից առնվազն անփութության հետ կապված հանգամանքներ կան։

Հիշեցնենք, որ 2020 թվականի դեկտեմբերի 22-ին ավելի քան հարյուր փաստաբան, հաղորդում են ներկայացրել ՀՀ գլխավոր դատախազին, խնդրելով հարուցել քրեական գործ ՀՀ քրեական օրենսգրքի 299-րդ հոդվածով (պետական դավաճանությունը) նախատեսված հանցավոր արարքի կատարման փաստի կապակցությամբ։ Հաղորդումը վերաբերում էր մինչև պատերազմը, պատերազմի ընթացքում և պատերազմից հետո տեղի ունեցած այն իրադարձություններին, որոնք առերևույթ վկայում են պետական դավաճանության հնարավորության մասին։ Դատախազությունը ներկայացված հաղորդումն ուղարկել է ՀՔԾ, որտեղ այն կցվել է արդեն հարուցված քրեական գործին։ ՀՀ գլխավոր դատախազ Արթուր Դավթյանը իրավաբանների հետ տարբեր հանդիպումների ժամանակ փորձել է իր անգործությունն արդարացնել ապացույցների անբավարարությամբ, թե երբ զինվորականները խոսեն՝ քայլեր կձեռնարկի։ Երեկ ՀՀ ԶՈՒ ԳՇ-ն հայտարարությամբ է հանդես եկել՝ ընդգծելով, որ գործող իշխանությունների անարդյունավետ կառավարումը և արտաքին քաղաքականությունում ցուցաբերած լրջագույն սխալները երկիրը հասցրել են կործանման եզրին։ Արդյո՞ք սրան համարժեք գնահատական կտա դատախազությունը։

Փաստաբան Արամ Վարդևանյանը, որը ևս ներկա էր իրավաբանների հետ գլխավոր դատախազի հանդիպմանը՝ փակագծեր չբացեց, սակայն նշեց, որ գլխավոր դատախազի դիրքորոշումն այն էր, որ դեռևս կատարվում է քննություն և որոշակի նոր հանգամանքների բացահայտման անհրաժեշտություն տեսնում են։

Փաստաբանը հիշեցրեց շրջանառվող լուրերը՝ քաղաքական իշխանությունների կողմից «Իսկանդեր» զենքի կիրառման արգելքի վերաբերյալ, ինչը, ըստ Վարդևանյանի, ևս փաստական տվյալ է, որը պետք է գնահատականի արժանանա։

«Դատախազությունը մշտապես պնդում էր, որ իրենք քաղաքական կախվածություն չունեն՝ գործադիր իշխանությունից։ Խիստ վերապահում ունեմ այդ հայտարարության հետ կապված, քանի որ իրական կյանքում լրիվ հակառակը տեսել եմ»,- նշեց նա՝ հավելելով, որ դատախազությունն այս պահին պատրա՞ստ է ցույց տալու, որ իսկապես չունի քաղաքական իշխանությունից կախվածություն։

Հարցին՝ արդյո՞ք դատախազությունը հանցավոր անգործություն է դրսևորում, փաստաբանը պատասխանեց. «Առնվազն, եթե տեսնենք, որ այսօր էլ որևէ գործողություն չկա։ Դատախազությունը ցանկություն չունի՞ որևէ հայտարարությամբ հանդես գալ՝ կոնկրետ քրեական գործի հետ կապված, ոչ թե ՝ սահմանադրական կարգի տապալման կամ նմանատիպ այլ հայտարարությունների վերաբերյալ, այլ՝ կոնկրետ ներկայացված հաղորդման շրջանակներում՝ արդյոք նոր փաստական տվյալներ վերլուծվել են, թե ոչ և ինչ հետևության է եկել դատախազությունը՝ որպես դատավարական հսկողություն, ղեկավարություն իրականացնող մարմին, ասելիք չունե՞ն»։ Փաստաբանը պարզաբանեց, որ խոսքը գնում է ոչ թե քաղաքական, այլ՝ իրավական գործընթացների մասին, որովհետև, եթե դատախազությունը չի խոսում, ապա հենց իրենք են քաղաքական գործունեությամբ զբաղվողը։

Ինչ վերաբերում է ՀՔԾ-ում քննվող քրեական գործին, որի շրջանակներում քննության առարկա է դարձվել նաև հաղորդումը, փաստաբանը նշեց, որ նախաքննությունն իրականացնողը ՀՔԾ-ն է, որից այս երեք տարիների ընթացքում որևէ արդարադատություն, իրավականություն, քրեական դատավարություն չի տեսել։ Բացի դա՝ փաստաբանը մտահոգություն հայտնեց առ այն, որ երեկ ԱՀ նախագահ Արայիկ Հարությունյանը «միջնորդական առաքելությամբ» հանդիպել է ՀՀ ԶՈՒ ԳՇ պետ Օնիկ Գասպարյանին՝ ԱԱԾ տնօրեն Արմեն Աբազյանի ներկայությամբ, այն դեպքում, երբ Հարությունյանը պետք է առնվազն հարցաքննվի ԱԱԾ-ում քննվող քրեական գործի շրջանակներում՝ հանդիսանալով կողմ։ Մասնավորապես, երեկ պաշտոնապես հայտարարվել է, որ Արայիկ Հարությունյանը գտնվել է Երևանում. իսկ վերջինիս մասնակցությամբ հեռախոսազրույցի ձայնագրությունը՝ ՀՀ իշխանություններից պատերազմի օրերին օգնություն խնդրելու և այդ խնդրանքներն իշխանությունների կողմից անպատասխան թողնելու վերաբերյալ. ուսումնասիրվում է ԱԱԾ-ում քննվող քրեական գործի շրջանակներում, ուստի՝ հարց է առաջանում՝ արդյո՞ք վերջինս հարցաքննվել է այդ գործի շրջանակներում այն պարագայում, երբ ինքը գտնվում էր Երևանում։

«Այդ ձայնագրության իսկությունը ոչ մեկը կասկածի տակ չդրեց, հեռախոսազրույցի մյուս կողմը նույնիսկ ամբողջությամբ հաստատել է այն»,- նշեց փաստաբանը։

Հեղինակ՝ Իզաբել Սահակյան

Աղբյուր` Փաստինֆո