Փաստ ինֆո

Նիկոլ Փաշինյանի նախաձեռնած քայլերթի ժամանակ ընդհարում է եղել նրա կողմնակիցների ու հրաժարականը պահանջող քաղաքացիների միջեւ։

Ինչպես արդեն տեղեկացրել ենք՝ ՀՀ զինված ուժերի գլխավոր շտաբն այսօր հայտարարությամբ է հանդես եկել՝ պահանջելով Նիկոլ Փաշինյանի հրաժարականը։

«Գլխավոր շտաբն իր վճռական բողոքն է արտահայտում անհեռատես և չհիմնավորված պատճառներով ՀՀ զինված ուժերի գլխավոր շտաբի պետի 1-ին տեղակալին պաշտոնից ազատման առնչությամբ, որն իրականացվել է առանց Հայաստանի Հանրապետության ազգային և պետական շահերը հաշվի առնելու՝ հիմնվելով միայն անձնական և հավակնոտ զգացմունքների վրա: Երկրի համար այսպիսի ծանր պայմաններում նման որոշումը հակապետական և անպատասխանատու քայլ է:

ՀՀ վարչապետը և կառավարությունն այլևս ի վիճակի չեն ընդունելու ադեկվատ որոշումներ՝ հայ ժողովրդի համար այս ճգնաժամային և ճակատագրական իրավիճակում:

ՀՀ զինված ուժերը երկար ժամանակ համբերատար կերպով հանդուրժում էր գործող իշխանության կողմից զինված ուժերը վարկաբեկելուն ուղղված «գրոհները», սակայն ամեն ինչ ունի իր սահմանները:
ՀՀ զինված ուժերը պատվով է կատարել իր պարտքը, իր ժողովրդի հետ ուսուսի մարտնչել թշնամու դեմ:
Գործող իշխանությունների անարդյունավետ կառավարումը և արտաքին քաղաքականությունում ցուցաբերած լրջագույն սխալները երկիրը հասցրել են կործանման եզրին:

Ստեղծված իրավիճակով պայմանավորված՝ ՀՀ զինված ուժերը պահանջում են ՀՀ վարչապետի և կառավարության հրաժարականը, միաժամանակ նախազգուշացնում՝ ձեռնպահ մնալ ժողովրդի դեմ ուժ կիրառելուց, ում զավակները զոհվել են՝ պաշտպանելով Հայրենիքն ու Արցախը: Բանակը միշտ եղել է ժողովրդի հետ, ինչպես ժողովուրդն է բանակի հետ»,- նշվածէ հայտարարության մեջ:

Այս հայտարարությունից հետո կտրուկ լարվել է ներքաղաքական իրավիճակը. Նիկոլ Փաշինյանը հանրահավաք է հրավիրել ժամը 4-ին՝ հանրապետության հրապարակում, իսկ հայրենիքի փրկության շարժումը հանրահավաք է հրավիրել Ազատության հրապարակում։ Խորհրդարանական ընդդիմությունը նախաձեռնել է արտահերթ նիստ հրավիրելու ստորագրահավաք։

Մինչ ժամը 16-ի հանրահավաքը նիկոլ Փաշինյանը իրավապահների ուղեկցությամբ քայլերթ է սկսել Երեւանի փողոցներում, որի ժամանակ բախումներ են արձանագրվել։

յ

Աղբյուր` Փաստինֆո