Փաստ ինֆո

Նիկոլ Փաշինյանի նկատմամբ քրեական գործ  չի հարուցվի։ Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, մերժել է Փաշինյանի նկատմամբ քրեական գործ հարուցելու պահանջով փաստաբաններ Հովհաննես Խուդոյանի և Արամ Օրբելյանի բողոքը։ Այս մասին «Փաստինֆո»-ն տեղեկացավ փաստաբան Հովհաննես Խուդոյանից։

Դատարանի որոշմանը ծանոթանալուց հետո փաստաբանները կորոշեն՝ վերաքննիչ բողոք կներկայացնեն, թե ոչ։

Ինչպես արդեն տեղեկացրել ենք՝ փաստաբան Արամ Օրբելյանը ՀՔԾ հաղորդում էր ներկայացրել Նիկոլ Փաշինյանի գործողությունների վերաբերյալ՝ պահանջելով քրեական գործ հարուցել ՀՀ քրեական օրենսգրքի 137-րդ հոդվածի՝ սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքի, 226.2-րդ հոդվածի՝ բռնություն գործադրելու հրապարակային կոչերի, 332-րդ հոդվածի՝ արդարադատության իրականացմանը և քննությանը խոչընդոտելու, 344-րդ հոդվածի՝ դատավորին, դատախազին, քննիչին, հետաքննություն կատարող անձին կամ հարկադիր կատարողին զրպարտելու հատկանիշներով։ ՀՔԾ-ն մերժել է քրեական գործի հարուցումը, որը հետագայում բողոքարկվել է։ Ըստ բողոքաբերի՝ միակ պատճառաբանությունը, որ դրվել է Նիկոլ Փաշինյանի նկատմամբ քրեական գործ հարուցելու վերաբերյալ հաղորդումը մերժելու հիմքում՝ ՀՀ քրեական դատավարության օրենսգրքի 35-րդ հոդվածի 1-ին մասի 8-րդ կետն է, որևէ այլ հղում չի կատարվում։

Դատական նիստերի ընթացքում բողոքաբեր կողմը կարևորել է, որ Նիկոլ Փաշինյանի հայտարարությունները դիտարկվեն որպես երկրի վարչապետի կողմից արված հայտարարություններ, քանի որ, եթե քրեաիրավական, քաղաքացիաիրավական գնահատական չի ստանում այդ հայտարարությունը, վարչապետն իրեն թույլ է տալիս այնպիսի հայտարարություններ, ինչ թույլ էր տալիս որպես ընդդիմադիր քաղաքական գործիչ, ունենում ենք այն, ինչ ունենք այսօր։

Փաստաբանները հիմնավորել են, որ, եթե անգամ դիմումում առկա է նույնիսկ մեկ հանգամանք, որի վերաբերյալ քրեական գործ չի հարուցվել, ապա պետք է հարուցվի, իսկ նշված հաղորդումը վերաբերում է երկու տարվա ընթացքում Փաշինյանի գործողություններում և արտահայտություններում առկա առերևույթ հանցագործության հատկանիշներին։ ՀՔԾ ներկայացուցիչն ու դատախազն էլ իրենց հերթին ներկայացրել են բողոքի վերաբերյալ իրենց առարկությունները և իրենց կողմից կայացված որոշումների հիմքերը՝ նշելով, որ նույն ժամանակահատվածում տարբեր նույնաբովանդակ հաղորդումներ են ներկայացվել՝ Լարիսա Ալավերդյանի, Արթուր Ղազինյանի, ԱԺ «ԲՀԿ» խմբակցության քարտուղար Արման Աբովյանի կողմից, որոնց հիման վրա նյութերը նախապատրաստվել են իր կողմից և, եթե ինքը որոշում է կայացրել քրեական գործի հարուցումը մերժելու մասին՝ գտնելով, որ հիմքեր չկա, ընդամենը 18 օր հետո կարո՞ղ էր ինքն արդյոք քրեական գործ հարուցել՝ ոչ։ Ավելին՝ նշված որոշումները չեն բողոքարկվել և չեն վերացվել, ուստի, չի կարող նույն հանգամանքներով գործ հարուցվել։

Հեղինակ՝ Իզաբել Սահակյան

Աղբյուր` Փաստինֆո