Փաստ ինֆո

Մենք գործ ունենք մեծ, իրական աբսուրդի հետ։ Այս ֆարսը պայթելու է, բայց պայթելով չի ավարտվելու։ Այս մասին լրագրողների հետ զրույցի ժամանակ ասաց «Քառյակ մեդիա»-ի համահիմնադիր Կարեն Բեքարյանը, ով ի աջակցություն ԱԺ աշխատակազմի նախկին ղեկավար Արա Սաղաթելյանի ԱԱԾ շենքի դիմաց է։ 

«Ուզում եմ, որ մեր ողջ իրավապահ համակարգը, առավել ևս այն հատվածը, որ հիմա կապված է այս կարվող գործընթացի հետ, աչքի առաջ ունենա հետևյալը՝ պայթելով չի ավարտվելու։ Երբ գործ ունեք մարդկանց հետ, որոնք չունեն և չեն էլ կարող ունենալ բարոյական արժեքներ, նրանք չեն կարող որևէ հարցի մոտենալուց արժեքներ հաշվի առնել, մտածել՝ որ մարդը ով է, ինչ ճանապարհ ունի։ Արա Սաղաթելյանը պետության զգացողությունը կրում է իր մեջ։ Դրա համար պետք է համապատասխան դաստիարակություն, իսկ մենք անդաստիարակների իշխանության ներքո ենք ապրում»,-նշեց Կարեն Բեքարյանը։

Վերջինս նշեց՝ Արա Սաղաթելյանը հանգիստ կարողանալու է նայել իր երեխայի աչքերի մեջ, մինչդեռ մեծ թվով մարդիկ իրենց երեխաներից են անեծք լսելու։

Կարեն Բեքարյանը նկատեց՝ ունենք գերիներ, որոնց խնդիրը մնում է օդում կախված․ «Այդ հարցով ինստիտուցիոնալ զբաղվող կառույցը ո՞րը պետք է լինի և մենք տեսնում ենք, թե այդ նույն ինստիտուցիոնալ կառույցն ինչով է զբաղվում և ինչ սկանդալային ձևերով է հանրության ուշադրությունը շեղում։ Ուշադրությունը շեղելուց բացի փորձում են հանրությանն այս ամբողջ եղած-չեղածը մարսեցնել տալ։ Արա Սաղաթելյանը եթե տեղյակ լիներ, որ այսպիսի միջոցառման մեջ ենք, կասեր՝ մի արեք, իմ խնդրով մի ծածկեք պետության կործանումը։ Սա սկսում է ծառայել իրենց օրակարգին։ Այսինքն՝ փոքր-փոքր խնդիրներով, այս սկանդալներով փորձել մարսեցնել գործընթացը։ Երրորդը կարող է լինել ուղղակի պատվեր Ալիևի կողմից՝ ոլորտ առ ոլորտ իրական հակադրվողներին շարքից հանելու»,-ասաց Կարեն Բեքարյանը։

Աղբյուր` Փաստինֆո