Փաստ ինֆո

Երեկ ԲԴԽ-ն կարճ քննարկում է ունեցել ԲԴԽ անդամ Գագիկ Ջհանգիրյանի լիազորությունների դադարեցման վերաբերյալ Երևանի ընդհանուր իրավասության դատարանի դատավոր Կարինե Պետրոսյանի դիմումը։ Նիստին մասնակցել է նաև ԲԴԽ գիտնական անդամ Գագիկ Ջհանգիրյանը։ Այս մասին «Փաստինֆո»-ի հետ զրույցում ասաց ԲԴԽ անդամ Գրիգոր Բեքմեզյանը։ 

Հիշեցնենք, որ Երևանի ընդհանուր իրավասության դատարանի դատավոր Կարինե Պետրոսյանը դիմում էր ներկայացրել ԲԴԽ՝ պահանջելով դադարեցնել Գագիկ Ջհանգիրյանի լիազորությունները՝ ԲԴԽ-ի կազմում։ Որպես հիմնավորում դատավորը մատնանշել էր Գագիկ Ջհանգիրյանի՝ 65 տարին լրացած լինելու հանգամանքը։ Ըստ Պետրոսյանի՝ վերջինս չի կարող լինել լեգիտիմ դատարանի անդամ, հետևաբար՝ ԲԴԽ նախագահը պետք է հայտարարություն տարածի՝ Գագիկ Ջհանգիրյանի լիազորությունները դադարելու վերաբերյալ։

Բեքմեզյանը մեզ հետ զրույցում նշեց, որ նիստի ժամանակ դիմումը կարճ քննարկվել է, որին մասնակցել է նաեւ Ջհանգիրյանը, սակայն որոշում չի կայացվել։ Բեքմեզյանի ձեռնպահ մնաց փակ նիստից տեղեկություններ փոխանցել, սակայն նշեց, որ ամենայն հավանականությամբ դիմումը լրացուցիչ կքննարկվի, քանի որ վերջնական որոշում չի կայացվել։

Ինչ վերաբերում է ԲԴԽ անդամի տարիքային սահմանափակումների հարցին, Բեքմեզյանը նշեց, որ շարունակում է մնալ իր կարծիքին առ այն, որ գիտնական անդամը կարող է 65 տարեկանն անց լինել, իսկ ԲԴԽ դատավոր անդամի և գիտնական անդամի տարիքային տարբերության հարցում, ըստ Բեքմեզյանի, խտրականություն չկա։

Բեքմեզյանը տեղեկացրեց, որ զրուցել է «ՀՀ դատական օրենսգիրք» սահմանադրական օրենսգրքի հեղինակներից երկուսի հետ՝ տարիքային տարբերությունների վերաբերյալ, որոնք նշել են, թե տարիքային տարբերության հիմնական նպատակը եղել է այն, որ 65 տարեկանը լրանալուց հետո թոշակի գնալու դեպքում գուցե լինեն գիտական գործունեությամբ զբաղվող դատավորներ, որոնց ներուժը, փորձը կարող է օգտագործվել դատական իշխանության համար, նրանք արդեն հնարավորություն են դարձել որպես գիտնական մասնակցել ԲԴԽ անդամի ընտրությանը։

«Այսինքն, նման դրույթի ամրագրումը, ըստ նախագծի հեղինակներից ոմանց, ունեցել է տրամաբանական այդ իմաստը, որը շատը նորմալ է ինձ համար։ Ես որևէ խտրականություն չեմ տեսնում, որովհետև ԲԴԽ անդամ ընտրվում է հինգ տարով ընդամենը, ինչից հետո ինքը շարունակում է աշխատել այլ բաներով, իսկ դատավոր անդամները շարունակում են մնալ դատավոր՝ անկախ ամեն ինչից։ ԲԴԽ գիտնական-անդամների համար մեր օրենսդրությամբ որևէ սահմանափակում չկա, գիտությամբ զբաղվելը տարիք չի հարցնում։ Համալսարանում գիտնականները դասավանդում են մինչև 70-75 տարեկանը, այստեղ ոչ մի խտրականություն չկա »,- նշեց Բեքմեզյանը։

Բեքմեզյանը նշեց, որ նախկինում դատավոր Կարինե Պետրոսյանը դիմել է՝ ԲԴԽ նախագահ Գագիկ Հարությունյանի լիազորությունների դադարեցման վերաբերյալ, սակայն հիմքն ու առարկան չգիտի, քանի որ այդ ժամանակ ԲԴԽ անդամ չի եղել և այդ հարցերով հետաքրքրված չէ, բացի դա՝ գործը կիսատ էր թողնվել, որովհետև Գագիկ Հարությունյանը հրաժարական էր տվել։

«Տարբեր իրավաբաններ տարբեր կարծիքներ կարող են ունենալ, ինձ համար դա նորմալ է։ Երբեք ուրիշին այլ կարծիքի համար չեմ կարող մեղադրել, ընդունում եմ, որ իրենք էլ ունեն իրենց կարծիքն արտահայտելու իրավունքը, օրենքի մեկնաբանման իրենց տեսակետը շատ նորմալ է։ Ամեն դեպքում՝ ԱԺ-ն է իրենց ընտրել, ԱԺ դաշտում է այդ հարցը և ԱԺ որոշումը գործում է»,- նշեց Բեքմեզյանը։

Նշենք,որ դատավոր Կարինե Պետրոսյանի դիտարկմամբ՝ ԲԴԽ անդամների համար չի կարող տարբերակված մոտեցում լինել։

«Ունենք Սահմանադրության 29-րդ հոդվածը, որը բացառում է խտրականությունը։ Այսինքն՝ խտրականության նշված նորմի իմաստով, ԲԴԽ գիտնական անդամը չի կարող տարիքային առավելություն ունենալ ԲԴԽ դատավոր անդամի նկատմամբ։ Եթե ես վստահ չլինեի իմ իրավական տեսակետի հավաստիության, իրավացիության մեջ՝ չէի հարուցի այս գործընթացը»,- «Փաստինֆո»-ի հետ զրույցում հայտարարել էր դատավորը։

Հեղինակ՝ Իզաբել Սահակյան

Աղբյուր` Փաստինֆո