Փաստ ինֆո

ՀՀ վարչապետ Նիկոլ Փաշինյանն այսօր հայտարարել է, թե կրակված «Իսկանդերը» չի պայթել՝ ակնարկելով, որ գուցե Ռուսաստանը 80-ականների արտադրության զենք է տրամադրել Հայաստանին։

«Իսկանդերի» կիրառման մասին Նիկոլ Փաշինյանը խոսել է 1in.am-ին տված հարցազրույցում՝ արձագանքելով ՀՀ երրորդ նախագահի այն հայտարարությանը, որ «Իսկանդերը» պետք է կիրառվեր պատերազմի 4-5-րդ օրը։

Հիշեցնենք, որ մամուլի տեղեկություններով, ինչը հաստատվել է նաեւ երրորդ նախագահի կողմից, «Իսկանդերը» օգտագործվել է պատերազմի վերջին օրերին, այն էլ Շուշիի ուղղությամբ։«Իսկ «Իսկանդերը» պետք էր կիրառել արդեն պատերազմի չորրորդ-հինգերորդ օրը, երբ Ադրբեջանը հսկայական քանակով կենդանի ուժի և զինտեխնիկայի կուտակումներ էր արել Հորադիզում և այլ հատվածներում, «Իսկանդերը» հենց դրա համար է»,- նշել էր Սերժ Սարգսյանը։

Նիկոլ Փաշինյանը փոխանակ պատճառաբանելու, թե ինչու պատերազմի առաջին օրերին չի կիրառվել «Իսկանդերը», որը կարող էր բեկում մտցնել պատերազմի հետագա ընթացքի մեջ, ըստ էության, Հայաստանի ռազմավարական դաշնակի Ռուսաստանին մեղադրել է անորակ զենք Հայաստանին՝ մատակարարելու մեջ։

«Իսկ գուցե պատասխանեն՝ ինչու կրակած «Իսկանդերը» չի պայթել, կամ պայթել է 10 տոկոսով, օրինակ»,- հայտարարել է Նիկոլ Փաշինյանը։

Լրագրողի տարակուսած դիտարկմանը, թե այդպես էլ է լինո՞ւմ՝ Փաշինյանը նշել է, թե չգիտի. «80-ականների զենք էր, գուցե»,- ասել է նա։

Հիշեցնեք, որ «Իսկանդերը» Հայաստանը ձեռք է բերել Ռուսաստանից։

Աղբյուր` Փաստինֆո