Փաստ ինֆո

ԱԺ աշխատակազմի նախկին ղեկավար, գլխավոր քարտուղար Արա Սաղաթելյանին մեկուսացնելու ուղղությամբ իշխանությունները քայլեր սկսել են ձեռնարկել դեռեւս 2020 թվականի նոյեմբերի առաջին տասնօրյակում, երբ պատրաստվում էին ստորագրել 2020 թվականի նոյեմբերի 9-ի կապիտուլյացիայի ակտը։ Հայտնի է, որ Արա Սաղաթելյանը շատ մեծ ու կարեւոր դերակատարում է ունեցել միազգային հարթակներում Ադրբեջանի դեմ իրականացվող տեղեկատվական պատերազմում, իսկ 2020 թվականի պատերազմի հենց առաջին օրերից գտնվել է Արցախում եւ կազմակերպել, աջակցել օտարերկրյա հեղինակավոր ԶԼՄ-ների կողմից Ադրբեջանի պատերազմական հանցագործությունների լուսաբանմանը։ Ու այն օրերին, երբ Արա Սաղաթելյանը Արցախում էր՝ «Ֆեյքերի ֆաբրիկայի» Տարոնը ֆեյսբուքում զբաղված էր նրա դեմ սեւ քարոզչությամբ եւ Փաշինյանի կողմից դավաճանական փաստաթուղթն ստորագրելուց մեկ օր առաջ՝ նոյեմբերի 8-ին, նա շրջանառության մեջ դրեց «ֆեյքերի ֆաբրիկայի» արտադրած տեսանյութը՝ Սաղաթելյանին մեղսագրելով իշխանություններին, Նիկոլ Փաշինյանի ընտանիքին վարկաբեկող տեղեկատվական քաղաքականությունը համակարգելու մեջ։ 

Ներքին թշնամիները՝ կրկին օրակարգում․ Չալաբյանը բացահայտում է Արա Սաղաթելյանի վերաբերյալ տեսանյութի կեղծված լինելու հանգամանքները

Այս տեղեկությունը շատ արագ հերքվեց, իսկ մասնագետներն ապացուցեցին, որ Տարոնի պատրաստած տեսանյութը կեղծիքների շարան է, որ ներքաղաքական նպատակ է հետապնդում։ Արա Սաղաթելյանը, արձագանքելով իր դեմ շրջանառության մեջ դրված տեսանյութին, պետական դավաճանություն որակեց պատերազմի ծանր պահին ակնհայտ կեղծիքով ներքին թշնամանք հրահրելու և թիկունքը թուլացնելու ցանկացած փորձ՝ ընդգծելով. «Ինձ համար ակնառու են թե՛ կատարողները, թե՛ պատվիրատուները։ Ես դիմել եմ համապատասխան պետական պաշտոնյաներին, որպեսզի միջոցներ ձեռնարկեն և հայտնել եմ, որ ծայրից ծայր զրպարտություն հանդիսացող այդ ստոր կեղծիքը անհետևանք չի մնալու»։

«ՀՀ ազգային անվտանգության ծառայությանը կոչ եմ անում ստուգել ովքեր և ինչ կողմերի դրդմամբ են պատերազմական իրավիճակում ներքաղաքական բախումներ հրահրում, հայերին հանում հայերի դեմ, և ովքեր էին իրականում վերջին բառերով հրապարակավ արտահայտվում երկրի ղեկավարի, առաջին տիկնոջ, իրենց զավակի և ՀՀ ՊՆ ներկայացուցչի մասին, դա վերագրելով այլ մարդու», -հայտարարել էր տեղեկատվության անվտանգության մասնագետ Ալեքսեյ Չալաբյանը, որը բավական մանրամասն վերլուծել ու բացահայտել էր Տարոնի մշակած կեղծիքը։

Իր իսկ տարածած կեղծիքի բացահայտումից հետո Տարոն Չախոյանը ֆեյսբուքյան էջից հեռացրեց այն, սակայն Արա Սաղաթելյանն ինչպես եւս հայտարարել էր հարցը տեղափոխեց իրավական դաշտ ու հայցադիմում ներկայացրեց ընդդեմ ֆեյքերի Տարոնի, որը դատարանն արդեն վարույթ է ընդունել։ Բացի այդ ներկայացվել է նաեւ հանցագործության մասին հաղորդում  Տարոն Չախոյանի կողմից՝  սուտ մատնություն կատարելու համար, քանի որ Չախոյանը մեղադրել էր Սաղաթելյանին ֆեյքը շահագործելու մեջ, ինչը պատերազմի օրերին ՀՀ քրեական օրենսգրքի 307.4-րդ հոդվածով նախատեսված արարք էր։ 

Արա Սաղաթելյանին զրպարտելու համար «ֆեյքերի» ֆաբրիկայի Տարոն Չախոյանի դեմ հայց կներկայացվի 3 մլն դրամի պահանջով. Այն կուղղվի զինվորների ապահովագրության հիմնադրամին

Նախաքննական մարմինը, բնականաբար, քննություն չիրականացրեց՝ Արա Սաղաթելյանի վերաբերյալ զրպարտչական բնույթի տեղեկություններ տարածող Չախոյանին ու նրան հրահանգ տված անձանց պատասխանատվության ենթարկելու համար։ Ավելին,  ամիսներ շարունակ փորձ արվեց Արա Սաղաթելյանին մեկուսացնելու ուղիներ գտնել՝ տարաբնույթ արհեստածին քրեական գործերի միջոցով։ Մտասեւեռվածություն ու զգուշավորություն կա իմ անձի նկատմամբ եւ միջոցներ են ձեռնարկում ինձ վարկաբեկելու կամ ընթացող գործընթացներից ինչ-որ կերպ զերծ պահելու համար, - դեռեւս 2020 թվականի նոյեմբերի 25-ին «Փաստինֆո»-ի հետ զրույցում հայտարարել էր Արա Սաղաթելյանը։

Զուգահեռաբար իշխանությունները հրապարակավ խրախուսեցին ընդդիմախոսների նկատմամբ զրպարտչական բնույթի տեղեկությունների տարածումը եւ այդ առաքելությունն անձամբ իրականացնելու, կեղծ լուրերի միջոցով հեղինակություն ունեցող անձանց վարկաբեկելու, նրանց դեմ սուտ մատնություն կատարելու համար աչքի ընկած Տարոնին բարձր պաշտոն տվեցին Փաշինյանի աշխատակազմում՝ որպես Արսեն Թորոսյանի տեղակալ։

Հետաքրքիր զուգադիպության Տարոն Չախոյանի նշանակման մասին հայտնի դարձավ ճիշտ այն օրը, երբ ձերբակալվեց ադրբեջանցիների դեմ տեղեկատվական պատերազմ իրականացնող Արա Սաղաթելյանը՝  VPN-ից օգտվելու համար։ 

«Ֆեյքերի ֆաբրիկայի» Տարոն Չախոյանը նշանակվել է վարչապետի աշխատակազմի ղեկավարի տեղակալ

Արա Սաղաթելյանի փաստաբան Հակոբ Ենոքյանը հայտարարել է, որ Սաղաթելյանի  նկատմամբ իրականացվող հետապնդումը կապում է «ֆեյքերի ֆաբրիկայի» Տարոն Չախոյանի՝ կառավարության  աշխատակազմի ղեկավարի տեղակալի պաշտոնում նշանակվելու հետ։ Փաստաբանը ողջամիտ ենթադրություններ ունի առ այն, որ Արա Սաղաթելյանի նկատմամբ հետապնդումն ուղղորդվել է հենց Տարոն Չախոյանի կողմից՝ վերջինիս՝ պաշտոնում նշանակվելուց հետո, իսկ Փաշինյանն էլ Տարոն Չախոյանի նշանակմամբ ապացուցել է, որ հենց ինքն է կանգնած Արա Սաղաթելյանի դեմ հետապնդումների հետեւում։ 

Աղբյուր` Փաստինֆո