Փաստ ինֆո

«Եթե քաղաքացիները մտածում են շենքեր գրավելու մասին, նաև թող մտածեն, որ այդ շենքերը գտնվում են պետական պահպանության տակ, դա նշանակում է՝ պետությունը շենքերը չի պահում, այլ պետականությունը, դա էլ նշանակում է, որ նա մոնոպոլ իրավունք ունի կրակելու»,- այս մասին «Ազատություն» ռադիոկայանի եթերում ասաց Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով «Հայրենիքի փրկության» շարժման գործողություններին և Վազգեն Մանուկյանի՝ «շենքեր գրավելու» մասին հայտարարությանը։

«Վազգեն Մանուկյանը շատ լավ է աշխատել Նաիրի Հունանյանի խմբի հետ, հիմա ինքը շաբաթը մեկ այդպիսի ծրագրեր է առաջարկում՝ մեկի ոտքերը ջարդել, մեկի ընտանիքի դուռը ծեծել: Բայց Վազգեն Մանուկյանը՝ այդպիսի առաջարկություններ անելուց առաջ լավ կլինի, որ այդ խմբերի առջևից ինքը գնա, որպեսզի այն մարդկանց դռները, որ պետք է ծեծեն, իմանան ով է եկել և ինչ ծրագրով ու ինչպես պաշտպանի իր ու երկրի արժանապատվությունը։ Այնպես որ Վազգեն Մանուկյանը թող ուրիշներին չուղարկի զոհվելու, իր մոտ դա լավ է ստացվում։ 96 թիվը բոլորի աչքի առաջ էր ու հետագա իր ծրագրերը չի իրականացվում սահմանադրական պահանջին համահունչ։ Խմբեր, ջոկատներ, կայծակնային արագությամբ շենքերի գրավում. Նա առաջնորդում է մարդկանց, ու՞մ վրա է քաղաքացիների գործողությունների պատասխանատվությունը։ Եթե այդ ճանապարհն են ընտրել՝ գրավեն շենքերը և հետո ի՞նչ անեն»,- ասաց Անդրանիկ Քոչարյանը, հիշեցրեց նոյեմբերի 10-ին Կառավարության շենք ու առանձնատուն մուտք գործելու դեպքերը։

Վազգեն Մանուկյանի ելույթը ըստ Քոչարյանի, կրկնում է այդ օրվա քաղաքական առաջադրանքը։ Նա նաև հավելեց, որ այսօր պետությունն ի վիճակի է պաշտպանել իր քաղաքացուն:

«Բոլորը պետք է գիտակցեն, որ անվտանգության համակարգի հետ կատակներ չեն անում, հիմա մեր երկիրն այնպիսի վիճակում չէ, որ չկարողանա պաշտպանել իր քաղաքացուն և մեր պետությունը»,- ասաց Անդրանիկ Քոչարյանը։ Նա հավելեց, որ, որ պետք է արմատախիլ արվեն կեղծ տեղեկություն տարածողները, որ պատերազմ չսկսվի երկրի ներսում:

Աղբյուր` Փաստինֆո