Փաստ ինֆո

«Իրականում նախաքննության ամբողջ գործընթացը, հարուցված քրեական գործն իր մեջ ունի զրո տրամաբանություն, երբ դու չես հասկանում գործի էությունը, չես հասկանում՝ ինչ է հետապնդվում, տեսնում ես, որ չկա տրամաբանություն, շատ պարզ հասկանում ես, որ մոտիվացիան լրիվ ուրիշ տեղ է»,-ծափողջույնների ներքո դուրս գալով Երևանի ընդհանուր իրավասության դատարանից,  լրագրողների հետ զրույցում ասաց «Քառյակ մեդիայի» համահիմնադիր Կարեն Բեքարյանը։

«Կան նախաքննական գաղտնիքի հետ կապված որոշակի դրույթներ, հետևաբար, ինչ-որ դետալների մեջ չեմ մտնի», - ասաց Կարեն Բեքարյանը՝ նշելով, թե հույս ունեցել է, որ արդար քննության տարբերակ կլինի։

Դատարանը ոչ իրավաչափ է ճանաչել վերլուծաբան Կարեն Բեքարյանի ձերբակալությունը։ Վերջինս ԱԺ աշխատակազմի նախկին ղեկավար Արա Սաղաթելյանին երկու ամսով կալանավորելու որոշմանը երեկ տեղյակ չէր, նշեց, որ իզոլացման խնդիր կար։

Անդրադառնալով «VPN» համակարգից օգտվելուն, Բեքարյանը մանրամասն բացատրեց, որ տարիների ընթացքում Ադրբեջանի հանրապետությունը հայաստանյան «IP»-ների նկատմամբ կիրառել է սահմանափակման քաղաքականություն՝ այսինքն, եղել է ժամանակահատված, երբ ցանկացած ադրբեջանական ինտերնետ ռեսուրս մտնելու պարագայում մեր Հայաստանյան IP-ները փակված են եղել, չեն կարողացել մուտք գործել, եղել է նաև ժամանակ, որ որոշակի ընտրանքով, այսինքն, պետական մարմինների ինտերնետ ռեսուրսներ հայաստանյան IP-ներից հնարավոր չէր մուտք գործել։

«Հետևաբար, եթե ուզում ես գործընթացները հասկանաս, պատկերացնես, իսկ ես տասնյակ տարիներով զբաղվում եմ արտաքին քաղաքականությամբ, հետևաբար չեմ կարող ուղղակիորեն այդ ինֆորմացիային չտիրապետել ու վերլուծությունների մեջ չներառել»,-մանրամասնում է Բեքարյանը։

Երբ Բեքարյանը տեղեկացել է, որ կա համակարգ, որը հնարավորություն է տալիս շրջանցելու արգելքները, այսինքն, Ադրբեջանական կողմը չի տեսնի, որ մուտք գործողը հայաստանյան IP է, բնականաբար համակարգից օգտվել է։ Որևէ արհեստական բան չի տեսնում դրանում։

«Օր օրի գերիների կարգավիճակի փոփոխության խնդիր է կատարվում, արհեստական գործերով դարձնում են քրեական հանցագործ, հիմա մեր իրավբանները, որոնք թեկուզ հեռակա կարգով պետք է օգնեն տղաներին իրավական իմաստով, այդ ինֆորմացիային որ չտիրապետեն, ո՞նց են օգնելու»։

Ինչ-ինչ համընկնումների մասին խոսելիս, Բեքարյանը նշեց՝ նախաքննությամբ զբաղվող ցանկացած մարդ, պետք է առաջնային պատկերացում ունենա համակարգի՝ այս դեպքում «VPN» համակարգի մասին։

Աղբյուր` Փաստինֆո