Փաստ ինֆո

«Մեր երկրի ողջ ողբերգությունն այն է, որ պետության ղեկին հայտնվել են մեր թշնամիները՝ թուրք- ադրբեջանական գումարներով իշխանության եկածները: Ես այս մասին հազարավոր անգամներ բարձրաձայնել եմ՝ 48 մլն. դոլար ծախսելով, Թուրքիան և Ադրբեջանը Հայաստանում հեղաշրջում իրականացրին՝ իշխանության ղեկին նստեցնելով իրենց վստահելի և հավատարիմ մարդուն: Հետևաբար, սա էլ, արդեն երեք տարի շարունակ, անում է այն, ինչ իրեն հրահանգված է Թուրքիայից և Ադրբեջանից: Դրա վառ ապացույցն էր խայտառակ կապիտուլյացիան, հիմա էլ՝ Ադբեջանի դեմ ինֆորմացիոն պայքարում տարիներ շարունակ փայլուն ներդրում ունեցած մասնագետների նկատմամբ կիրառվող ռեպրեսիաներն ու հետապնդումները», - «Փաստինֆո»-ի հետ զրույցում ասել է «Ազգային անվտանգություն» կուսակցության ղեկավար Գառնիկ Իսագուլյանը՝ անդրադառնալով հասարակական գործիչների, վերլուծաբանների ձերբակալություններին: 

Հիշեցնենք, որ երեկ Երևանի ընդհանուր իրավասության դատարանի դատավոր Արմինե Մելիքսեթյանը բավարարել էր Ազգային անվտանգության ծառայության միջնորդությունը և երկու ամսով կալանավորել Ազգային ժողովի աշխատակազմի նախկին ղեկավար-գլխավոր քարտուղար Արա Սաղաթելյանին, որը երկար տարիներ ակտիվ եւ արդյունավետ դերակատարում է ունեցել միջազգային մամուլում Ադրբեջանի դեմ իրականացվող տեղեկատվական պատերազմի գործում:

Գործող իշխանությունները Արա Սաղաթելյանը մեղադրում են Քրեական օրենսգրքի երեք հոդվածներով՝ կազմակերպված խմբի կողմից ազգային, ռասայական կամ կրոնական թշնամանք հարուցելու, բռնություն գործադրելու հրապարակային կոչերը, բռնություն գործադրելու հրապարակային կոչերը, բռնությունը հրապարակայնորեն արդարացնելու կամ քարոզելու, ինչպես նաև ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելու համար։ Ըստ ԱԱԾ-ի ունեցած տվյալների, Արա Սաղաթելյանը՝ մի քանի այլ անձանց հետ միասին, ֆեյսբուք սոցիալական ցանցում ստեղծել և վարել է «Գագիկ Սողոմոնյան» անվամբ կեղծ պրոֆիլը, որն առավել հայտնի է իշխանությունների հասցեին վիրավորական և հայհոյախառն քննադատությամբ։ Ի դեպ, «Գագիկ Սողոմոնյան» ֆեյքն այս օրերին եւս շարունակում է իր ակտիվ գործունեությունը, այդ թվում տելեգրամում, իսկ Արա Սաղաթելյանի դեմ կեղծ տեղեկություններ տարածած Տարոն Չախոյանը խրախուսվել է իշխանությունների կողմից ու բարձր պաշտոն ստացել Փաշինյանի աշխատակազմում։

Գառնիկ Իսագուլյանը նկատում է՝ նմանօրինակ դեպքերն այլևս զարմանք չեն հարուցում, որովհետև վաղուց արդեն բացահայտված է՝ Հայաստանում իշխում է թուրք – ադրբեջանական գործակալական ցանցի ոհմակը. «Բոլոր նրանց, ովքեր այս կամ այն կերպ պայքարել են ադրբեջանական կամ թուրքական ագրեսիայի դեմ, նրանց բոլորին ձերբակալելու և դատելու են: Սա հաստակ պատվեր է՝ իջեցված սրանց անմիջական տերերի՝ թուրք – ադրբեջանական տանդեմի կողմից: Անցած երեք տարիների ընթացքում մենք արդեն տեսել ենք սրա նախադեպերը, երբ սկսվեցին արցախյան ազատամարտում հաղթանակած գեներալիտետի նկատմամբ իրականցվող հետապնդումներն ու դատավարությունները: Այն, ինչ հիմա կատարվում է Արա Սաղաթելյանի, Կարեն Բեքարյանի և մյուսների նկատմամաբ, սրա տրամաբանական շարունակությունն է: Քանի դեռ մենք հանդուրժում ենք երկրի ղեկին թողնել թրքահպատակ իշխանություններին, սա շարունակական պրոցես է լինելու, մենք դեռ նոր զարգացումների ականատեսն ենք լինելու»,- ասել է Գառնիկ Իսագուլյանը:

Հեղինակ՝ Նվարդ Մանվելյան

Աղբյուր` Փաստինֆո