Փաստ ինֆո

«Նախ, եկեք նկատենք, որ Փաշինյանի մոտ ՝ անկեղծության հետ կապված փոքրիկ առաջընթաց կա՝ եթե մարդը խոսում է վերակենդանացած տնտեսության մասին, ուրեմն, ակամա, խոստովանում է, որ այդ տնտեսությունը մեռած է եղել»,- «Փաստինֆո»-ի հետ զրույցում ասել է բիզնես խորհրդատու Արեն Ապիկյանը եւ ավելացրել. «Իսկ հիմա փորձենք հասկանալ, թե այդ ի՞նչ տնտեսական վերակենդանացման մասին է խոսքը: Երևի Նիկոլ Փաշինյանը Կառավարության աշխատակիցներին ասել է՝ ինձ հուսադրող մի բան ասեք՝ նրանք էլ որոշել են ասել, թե տնտեսությունը վերակենդանացել է, որովհետև անցյալ երկու շաբաթների ընթացքում տնտեսության ակտիվության որոշակի ցուցանիշեր է գրանցվել: Սա էլ որոշել է Կառավարության նիստի ընթացքում հայտարարել այդ մասին, այն պարագայում, երբ նախորդ օրն Էկոնոմիկայի նորանշանակ նախարարը խոսում էր տնտեսության աղետալի վիճակի մասին»։

Հիշեցնենք, որ փետրվարի 18-ին՝ Կառավարության վերջին նիստի ընթացքում, Նիկոլ Փաշինյանը հայտարարել էր, թե Հայաստանում տնտեսությունը վերակենդանացման նշաններ է ցույց տալիս։ Որպես ասվածի ապացույց, ՀՀ-ում վարչապետ աշխատող անձը վկայակոչում է ինչ-որ թվեր, որոնք, սակայն, պաշտոնապես որևէ տեղ կամ որևէ կերպ հաստատված չեն: Փոխարենը, համաձայն պետական եկամուտների կոմիտեի հրապարակած վերջին տեղեկատվության, այս տարվա հունվար ամսին, Հայաստանում հավաքագրվել է 130 մլրդ. դրամի հարկային եկամուտ, մինչդեռ անցյալ տարվա նույն ժամանակահատվածի համար հարկային եկամուտների ցուցանիշը կազմել էր 146 մլրդ. դրամ, այսինքն, մոտ 10 տոկոսով կամ 16 մլրդ. դրամով պակաս։

Բիզնես խորհրդատու Արեն Ապիկյանը նկատում է՝ առնվազն զարմանալի է, որ պետության վարչապետը երկրի տնտեսության վիճակը բնութագրում է ՀԴՄ կտրոններով, ոչ մի կերպ չհասկանալով, որ տնտեսության աճի, անկման կամ զարգացման ցուցիչը ամենևին էլ ՀԴՄ կտրոնների շրջանառության փոփոխությունների մեջ չէ. «Այն, ինչ Նիկոլ Փաշինյանն անվանում է տնտեսության վերակնեդանացում, իրականում այլ բան չէ, քան՝ շուկայում որոշակի ծառայությունների և ապրանքների հետաձգված պահանջարկի իրացում: Ողջ անցյալ տարվա ընթացքում, Հայաստանում ապրող մարդիկ, մեծ իմաստով, հետաձգել են կենսական նշանակության մի շարք իրադարձությունների կազմակերպումն ու անցկացումը՝ կլինի դա հարսանիք, կնունք, կամ այլ ընտանեկան բնույթի միջոցառում:

Դրան, նախ խոչընդոտեց երկրում հայտարարված հակահամաճարակային երկարատև կարանտինը, հետո, երբ համաճարակը, կարծես, փոքր - ինչ նահանջել էր, սկսվեց պատերազմը, հետո վրա հասավ հետպատերազմյան ճգնաժամը: Այնպես որ, ինչ – որ առումով բնական և տրամաբանական է, որ վերջին մեկ – երկու ամսվա ընթացքում մեր երկրում, կարծես թե նմանօրինակ միջոցառումների ակտիվացում կա, ինչն էլ նպաստում է ապրանքաշրջանառության և առք ու վաճառքի ակտիվացմանը: Հետևաբար, հենվելով վերջին երկու շաբաթվա ապրանքաշրջանառության ակտիվության վրա, խոսել տնտեսության վերակենդանացման մասին, մեղմ ասած՝ անգրագիտության կամ հերթական մանիպուլյացիայի արդյունք է»,- նշում է Արեն Ապիկյանը:

Բիզնես խորհրդատուն ցավով նկատում է՝ այս պահին չի տեսնում որևէ բարենպաստ հանգամանք, որը կարող էր խթանել երկրում տնտեսական վերելքի կամ վերակենդանացման հեռանկարին. «Ի՞նչ է ուզում իր այդ հայտարարությամբ ասել Նիկոլ Փաշինյանը, այն, որ մարդիկ Հայաստանում սկսել են ավելի լա՞վ ապրել: Դուրս եկեք փողոց ու մարդկանց հետ հարցում անցկացրեք՝ ավելի լա՞վ են սկսել նրանք ապրել: Որպես ոլորտին և իրավիճակին տիրապետող մասնագետ, ձեզ կարող եմ հավաստիացնել, որ Հայաստանում ապրող մարդկանց 80 տոկոսն այս ժամանակահատվածում սկսել է ավելի վատ ապրել: Ակնհայտ է, որ մարդիկ, նույնիսկ, սկսել են խնայել, անգամ, ամենօրյա սպառման սննդի վրա: Եթե ոչ վաղ անցյալում նրանք կարող էին իրենց թույլ տալ օգտվել այս կամ այն չափով թանկ համարվող սննդամթերքից, օրինակ՝ մսից, ձկնեղենից կամ կաթնամթերքից, ապա հիմա, արդեն, ստիպված են բավարարվել, բացառապես, էժան համարվող սննդատեսակներից՝ հացահատիկեղեն, ձավարեղեն և այլն: Էլ չեմ խոսում տնտեսական ներդրումային պայմանների աղետալի բացակայության և աճող միջազգային պարտքի ծավալների մասին: Հետևաբար, թե ի՞նչ տնտեսական վերելքի մասին է խոսում Նիկոլ Փաշինյանն, ինձ համար, որպես մասնագետի, առնվազն անհասկանալի է մնում»,-ամփոփելով զրույցն, ասում է բիզնես խորհրդատու Արեն Ապիկյանը:

Հեղինակ՝ Նվարդ Մանվելյան

Աղբյուր` Փաստինֆո