Փաստ ինֆո

Երևանի ընդհանուր իրավասության դատարանը՝ դատավոր Մանվել Շահվերդյանի նախագահությամբ, հեռացել է խորհրդակցական սենյակ` «Գագիկ Սողոմոնյան» ֆեյքի գործով Մհեր Ավագյանի նկատմամբ կալանավորումը որպես խափանման միջոց ընտրելու մասին միջնորդության վերաբերյալ որոշում կայացնելու։ Փաստաբան Միքայել Շխիմյանը «Փաստինֆ»-֊ին հայտնեց, որ դատարանի որոշումը կհրապարակվի այսօր՝ ժամը 19։00-ին։

Նշենք, որ դատարանը համատեղ կարգով քննել է և՛ Ավագյանին ձերբակալելու որոշման դեմ պաշտպանի բողոքը, և՛ որպես խափանման միջոց կալանավորումն ընտրելու մասին ԱԱԾ քննիչի միջնորդությունը։

Ինչպես արդեն տեղեկացրել ենք՝ ԱԱԾ ծառայողները փետրվարի 19-ին խուզարկություն են իրականացրել Արա Սաղաթելյանի, վերլուծաբան Կարեն Բեքարյանի, ադրբեջանագետ Անժելա Էլիբեգովայի, սահմանադրագետ Գոհար Մելոյանի աշխատասենյակներում, առգրավել հեռախոսներ և համակարգիչներ, ապա նրանց բերման ենթարկել: Անժելա Էլիբեգովան և Գոհար Մելոյանն ազատ են արձակվել՝ հրաժարվելով ցուցմունք տալուց, իսկ Կարեն Բեքարյանը, Արա Սաղաթելյանը, քաղաքացիներ Մհեր Ավագյանը, Արամ Լ. Սարգսյանը ձերբակալվել են։ Նրանց ձերբակալման իրավաչափության հարցը վիճարկել են դատական կարգով, սակայն մինչ դատարանում կքննարկվեր բողոքները, վարույթն իրականացնող մարմինը մեղադրանք է առաջադրել նրանց՝ այսպես կոչված «Գագիկ Սողոմոնյան» ֆեյքի գործով ու կալանավորելու միջնորդություն ներկայացրել դատարան: Արամ Սարգսյանն արդեն կալանավորվել է։

Ավագյանի փաստաբանի դիտարկմամբ՝ մեղադրանքը մեծ հեքիաթի է նման, Ավագյանն այն ամբողջությամբ չի ընդունում։ Նրա խոսքով՝ մեղադրանքում առկա չէ մեղքի անհատականացում, որևէ կերպ չի երևում, թե կոնկրետ որ անձն ինչ է արել, որ ստատուսն է գրել, ի վերջո, օգտատիրոջ գրառումներն առերևույթ հանցագործության տարրեր չեն պարունակում, առկա չէ, թե որ գրառումներն են իրենց մեղսագրվում։

Հեղինակ՝ Իզաբել Սահակյան

Աղբյուր` Փաստինֆո