Փաստ ինֆո

Ես ազնվորեն մինչև այս պահը չեմ հասկանում, թե ինչ է կատարվել, որովհետև այս գործողությունների բացարձակ տրամաբանական պատճառահետևանքային կապն անհասկանալի է։ Որևէ մեկը հոդաբաշխ բացատրություն չտվեց՝ իմ անձնական հեռախոսը կամ աշխատանքային համակարգիչն ինչ կապ ունեն ինչ որ ֆեյք բռնելու հետ և առավել ևս անհասկանալի էր մեզ բերման ենթարկելու պատճառը։ Այս մասին լրագրողների հետ զրույցում ասաց ադրբեջանագետ Անժելա Էլիբեգովան։

Նրա փոխանցմամբ` թեև ԱԱԾ-ում երկար չեն մնացել, բայց ինքը չի իրացրել իր զանգի իրավունքը և անհանգիստ էր, որովհետև իր ընտանիքի անդամները տեղյակ չէին, թե ինքը որտեղ է։ Բացի դա՝ դուրս գալուց հետո պարզվել է, որ մի փաստաբան փորձում էր շուրջ մեկ ժամ մուտք գործել ԱԱԾ՝ իրենց իրավաբանական օգնություն ցուցաբերելու։

«Կարծում եմ դեռ չի վերջացել այդ պրոցեսը, պետք է իրավական հարթակում հասկանալ, թե ինչ է տեղի ունեցել։ Ամեն դեպքում՝ այս պահի դրությամբ ինձ համար անհասկանալի պատճառներով ես մնացել եմ առանց հեռախոսի, առանց աշխատանքային համակարգչի, առանց հնարավորությունների՝ կատարելու իմ աշխատանքը», - նշեց նա՝ ընդգծելով, որ հիմա դատարանի բակում են, որ հասկանան, թե ինչ է կատարվում իրենց ավագ կոլեգաների հետ, որոնց հետ տարիներ շարունակ սանձել են ադրբեջանական հակահայկական քաղաքականությունը և քարոզչությունը, ընդ որում՝ բավականին էֆեկտիվ։

Էլիբեգովան արձանագրեց, որ բերման ենթարկված և ձերբակալված բոլոր անձինք շատ ակտիվ զբաղվում էին Ադրբեջանի դեմ տեղեկատվական պատերազմներում պայքարով։

«Այս պահի դրությամբ պարալիզացնելով այդ ամբողջ աշխատանքը՝ հանրության մոտ արդեն եզրակացությունները նշմարվում են, թե ինչու է դա արվում», - նշեց նա՝ հավելելով, որ, եթե անգամ իսկապես ֆեյք են փնտրում, ապա աբսուրդ է, որ ազգային անվտանգության սպառնալիքների ֆոնին ամբողջ համակարգով զբաղվում են ֆեյքով։
Ինչ վերաբերում է գործով իր դատավարական կարգավիճակին, Էլիբեգովան նշեց, որ կարծում է, որ կարգավիճակ չունի, որովհետև որևէ մեկն իրեն հոդաբաշխ բացատրություն չի տվել։ Թեև հոդաբաշխ բացատրություն չեն ստացել, Էլիբեգովան նշեց, որ և ինքը, և Գոհար Մելոյանը չեն խոչընդոտել որևէ գործընթացի՝ ոչ խուզարկությանը, ոչ բերման ենթարկելուն։

Աղբյուր` Փաստինֆո