Փաստ ինֆո

Խախտվել են ադրբեջանագետ Անժելա Էլիբեգովայի և սահմանադրագետ Գոհար Մելոյանի՝ Սահմանադրությամբ երաշխավորված պաշտպանության իրավունքը։ Այս մասին «Փաստինֆո»-ի հետ զրույցում ասաց փաստաբան Դավիթ Ավագյանը։

Ինչպես արդեն տեղեկացրել ենք՝ ԱԱԾ ծառայողներն այսօր խուզարկություն են իրականացրել վերլուծաբան Կարեն Բեքարյանի, ԱԺ ՀՀ ԱԺ աշխատակազմի նախկին ղեկավար Արա Սաղաթելյանի, ադրբեջանագետ Անժելա Էլիբեգովայի, սահնանադրագետ Գոհար Մելոյանի և քաղաքացի Մհեր Ավագյանի բնակարանները, աշխատասենյակները, առգրավել հեռախոսներ և համակարգիչներ, ապա նրանց բերման ենթարկել:

Անժելա Էլիբեգովան և Գոհար Մելոյանն ազատ են արձակվել՝ հրաժարվելով ցուցմունք տալուց, իսկ Կարեն Բեքարյանը, Արա Սաղաթելյանը և Մհեր Ավագյանը ձերբակալվել են։ Գոհար Մելոյանի և Անժելա Էլիբեգովայի փաստաբան Դավիթ Ավագյանը մեզ հետ զրույցում ասաց, որ ԱԱԾ աշխատակիցներն իրեն թույլ չեմ տվել մուտք գործել ԱԱԾ և մինչև այդ հարցերը պարզաբանվեցին, իր վստահորդներին արդեն ազատ են արձակել, ուստի՝ փաստաբանը տեղեկություն չունի ինչ գործով են բերման ենթարկվել նրանք։

Փաստաբանի դիտարկմամբ՝ կոպիտ խախտում է՝ տեղի ունեցել, անձի՝ Սահմանադրությամբ նախատեաված պաշտպանության իրավունքը խախտվել է։ «Նրանց հարազատները զանգահարել էին, որ ես ներկայացնեմ իրենց շահերը և իրավաբանական օգնություն ցույց տամ, սակայն ԱԱԾ աշխատակիցներն ինձ թույլ չտվեցին, որ մուտք գործեմ և հանդիպեմ վստահորդներիս հետ՝ իրավաբանական օգնություն ցույց տալու նպատակով՝ պատճառաբանելով, որ այլ փաստաբան կա այնտեղ և նրանց օգնություն ցույց կտա և նրանք գտնում են, որ այդ փաստաբանի իրավաբանական օգնությունը բավարար է։ Նման գնահատականներ ԱԱԾ աշխատակիցներն իրավունք չունեին տալ, այլ վստահորդներս պետք է որոշեին դա իրենց համար բավարար է, թե ոչ»,- նշեց փաստաբանը։

Ինչ վերաբերում է Մելոյանի և Էլիբեգովայի մասնակցությամբ քննչական գործողություններին` Ավագյանը ենթադրություն հայտնեց, որ նրանք բերման են ենթարկվել վկա-կասկածյալի կարգավիճակով և օգտվել են լռելու իրավունքից։

Անդրադառնալով խուզարկությանը և առգրավված իրերին՝ Ավագյանը նշեց, որ խուզարկությանը ներկա չի գտնվել, կքննարկվի խուզարկության թույլտվության վերաբերյալ որոշումը բողոքարկելու հարցը, սակայն, ամենայն հավանականությամբ այն կբողոքարկվի։ Հարցին՝ արդյոք խուզարկություն իրականացվել է դատարանի որոշմամբ՝ հաշվի առնելով, որ, օրինակ Արա Սաղաթելյանի աշխատասենյակում խուզարկություն է կատարվել միայն քննիչի որոշմամբ, Ավագյանն արձանագրեց, որ, եթե խուզարկություն կատարվել է աշխատասենյակում, ապա պետք է լինի դատարանի որոշում, հակառակ դեպքում՝ ապացույցները կճանաչվեն ոչ թույլատրելի։ «Անձի մասնավոր սեփականություն է և հնարավոր է հաղթահարել միայն դատարանի որոշմամբ», - նշեց փաստաբանը։

Հեղինակ՝ Իզաբել Սահակյան

Աղբյուր` Փաստինֆո