Փաստ ինֆո

Հայաստանում, հատկապես իշխանական, իշխանամերձ շրջանակներում իրատեսության մեծ պակաս կա։ Պետությունը կործանման եզրին է, իսկ կործանման հասցնողը էժանագին մասովկաներով ուզում է մարդկանց ցույց տալ, թե՝ տեսեք՝ ժողովրդի, պարզ գյուղացիների շրջանում ի՜նչ երկրպագուներ ունեմ, ի՜նչեր են ասում քաղաքական հակառակորդներիս հասցեին, ինձնից էլ պահանջում՝ թավիշը կոշտացնել․․․

Իսկապես, ծիծաղելի է, բայց նաև՝ ողբերգական, քանի որ անճաշակ և գռեհիկ տեսարաններից հորդող թշվառությունը՝ իրական է, և անարժանապատիվ ու տխուր դերեր ստանձնողները՝ ներկայացվող ցուցադրանքի շահառու։ Որն, ըստ ամենայնի գին ունի։ Շահառու, քանի որ արդեն իսկ կեղտոտ խաղի մասնակից են դարձել։ Բայց նման զարհուրելի տեսարաններով հրապուրվող էլի պոտենցիալ մի զանգված կարող է գտնվել, իսկ այդ դեպքում մենք գործ ենք ունենում նողկալի երևույթի հետ, որն է՝ բոլոր ոլորտներում տապալված, ապաշնորհ իշխանության կողմից՝ սոցիալական ծանր պայմաններում ապրող գյուղացիներին համատարած իրենց հետ մեղավոր դարձնելու, մեղքի մեջ թաթախելու գործընթացը։ Ընդհանրապես, բոլորիս աչքի առաջ տեղի ունեցող մուտացիաները վկայում են մեկ բան՝ փողոցային իշխանազավթները ոչ մի դրական մոտիվացիա գործնականում չունեն, ճիշտ հակառակը՝ ինչ արատավոր երևույթներ եղել են նաև նախկինում և որոնց դեմ իբր պայքարում էին, նաև՝ ինչ հնարավոր է պատկերացնել, սրանք կրում են, կլլել են անհագորեն, ընդ որում, ոչ միայն ներսից, այլև՝ դրսից։

Կոռուպցիայի և կաշառակերության դեմ քայլելով «մարտնչողների» համար, փաստորեն, իրենց երազած ժամանակն է եկել։ Հիմա, ինչպես իրենք են քպական շրջանակներում ասում՝ «հա՛մ մեխն է իրենց ձեռքին, համ՛ մուրճը» և ինչ կուզեն, ինչպես կուզեն, այնպես էլ կանեն։ Լավ, մինչև ե՞րբ։ Քանի դեռ հիմնովին՝ աղանդի գուրուից սկսած՝ մինչև նրա վերջին վկան պետական համակարգից չեն մաքրվել։ Իրենց հայրերի «Մեր դեմ խաղ չկայի»՝ մուտացիայի ենթարկված, կպչուն տեսակի հետ գործ ունենք։

Աղբյուր` Փաստինֆո