Փաստ ինֆո

Կառավարության վերջնական նպատակը պետք է լինի բոլոր քաղաքացիներին օգնել, անկախ նրանից տուժել են պատերազմից, թե՝ կորոնավիրուսից: Կառավարությունը չի կարողանում կատարել իր առջև դրված համար մեկ այդ պարտականությունը և ուղղակի պետք է փոխվի: Այս մասին «Փաստինֆո»-ի հետ զրույցում ասել է ԱԺ «Լուսավոր Հայաստան» խմբակցության պատգամավոր Կարեն Սիմոնյանը.

«Ես մի քանի անգամ արտահայտվել եմ կորոնավիրուսի դեմ պայքարի քաղաքականության մասին, բայց, քանի որ մենք ունենք քննիչ հանձնաժողով, որը հավաքագրում է փաստերը դրա վերաբերյալ, չեմ ուզում կանխակալ որևէ կարծիք հայտնել, կսպասեմ մինչև քննիչ հանձնաժողովն ամբողջական ինֆորմացիա կհավաքի»,-ասաց պատգամավորը:

Անդրադառնալով կառավարության որոշմանը, որով 543 մլն դրամ կուղղվի կորոնավիրուսով հիվանդ մարդկանց բուժմանը, իսկ 114 մլն դրամ՝ պատերազմական գործողությունների ընթացքում մարդկանց և զինծառայողների հետ կապված խնդիրների լուծման համար, պատգամավորը նկատում է, որ առաջնահերթությունը ճիշտ բաշխված չէ.

«Ինձ թվում է՝ առաջնահերթությունը պետք է հետևյալը լինի՝ կառավարությունը պետք է զբաղվի վերականգնմամբ: Պատերազմից տուժածն է ավելի շատ կարիքի մեջ, թե՝կորոնավիրուսից տուժածը, պետք է կառավարությունը գնահատականը տա: Պետք է նայել ոչ թե ընդհանուր պատկերին, այլ՝ յուրաքանչյուր քաղաքացի ինչի կարիք ունի: Կառավարության վերջնական նպատակը պետք է լինի բոլոր քաղաքացիներին օգնել, անկախ նրանից տուժել են պատերազմից, թե՝ կորոնավիրուսից: Կառավարությունը պետք է հստակ գնահատեր, իսկ հստակ է գնահատել, թե՝ ոչ, հիմա չեմ կարող ասել, բայց կասկածում եմ, որ արդարացիորեն չի բաշխված: Մարդիկ կան, պատերազմի պատճառով մնացել են առանց տան, կերակրողի, բազմաթիվ կորուստներ են ունեցել, այս մարդկանց առաջնահերթությունները պետք հաշվի առնել, բայց մյուս կողմից պետք չէ մոռանալ մարդկանց, ովքեր կորոնավիրուսի պատճառով զրկվել են աշխատանքից, չունեն հնարավորություն իրենց ընտանիքը պահելու: Պետք է կարողանանք բոլոր քաղաքացիների կարիքները բավարարել, անկախ նրանից՝ ինչ կարիք է դա: Կառավարությունը չի կարողանում կատարել իր առջև դրված համար մեկ այդ պարտականությունը և կառավարությունը ուղղակի պետք է փոխվի»,-պնդեց Կարեն Սիմոնյանը:

Մեր խնդրանքով պատգամավորն անդրադարձավ նաև «Տեղական ինքնակառավարման մասին» օրենքում լրացում և փոփոխություն կատարելու մասին նախագծին, որով ՏԻՄ ընտրությունները արտակարգ կամ ռազմական դրության ժամանակ հետաձգվում են, նախագծով՝ գյուղական բնակավայրեր ընդգրկող համայնքներում ղեկավարի պաշտոնակատար է նշանակում մարզպետը, իսկ քաղաքային բնակավայրեր ընդգրկող համայնքներում՝ վարչապետը.

«ՏԻՄ ընտրությունների հետաձգումը կապված է ռազմական դրության և համաճարակային իրավիճակի հետ: Եթե համաճարակային իրավիճակը թույլ է տալիս, պետք է լինեն ՏԻՄ ընտրություններ որովհետև ռազմական դրության պահպանման որևիցե պայման հիմա չեմ տեսնում» ,-ասաց Սիմոնյանը:

Պատգամավորը կարծում է, որ այս որոշումը ժողովրդավարությանը դեմ քայլ է և նշանակովի պաշտոնները ՏԻՄ-երում ոչ մի լավ բանի չեն բերելու.

«Ժողովրդավարության հիմնասյունը դրանք ՏԻՄ-երն են, եթե տեղական ինքնակառավարում մենք չունենք, մենք չենք կարող ասել , որ ունենք դեմոկրատական կառավարում: Ես հույս ունեմ, որ վարչապետը կնշանակի այն մարդկանց, ում ծայրահեղ անհրաժեշտ է, այսինքն՝ երբ պաշտոնավարման ժամկետն է սպառվել, իսկ ռազմական և արտակարգ դրության ավարտից հետո, անմիջապես կնշանակվի ընտրություններ: Այսինքն` սա զուտ տեխնիկական բնույթ կկրի, որպեսզի կարողանան կատարել օրենքի պահանջները: Իմ կարծիքով՝ դրան պետք է միտված լինի օրենքը»,- մեզ հետ զրույցում ասաց Կարեն Սիմոնյանը:

Աղբյուր` Փաստինֆո