Փաստ ինֆո

Վերաքննիչ քրեական դատարանում կայացել է զենքի մատակարարմամբ զբաղվող գործարար Դավիթ Գալստյանի՝ «Պատրոն Դավոյի» նկատմամբ կալանավորումը՝ որպես խափանման միջոց ընտրելու որոշման դեմ պաշտպանների բողոքի քննությունը։

Փաստաբան Արմեն Հարությունյանը «Փաստինֆո»-ի հետ զրույցում հայտնեց, որ աշխատանքային օրվա ավարտով պայմանավորված՝ դատական նիստը հետաձգվել է և կշարունակվի փետրվարի 22-ին։

Հիշեցնենք, որ փետրվարի 2-ին Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, բավարարել է Գալստյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։ Ներկայացված վերաքննիչ բողոքում պաշտպանական կողմը վիճարկել է թե՛ հիմնավոր կասկածի, թե՛ կալանավորման հիմքերի առկայությունը՝ գտնելով, որ դրանք բացակայում են։

Պաշտպանի դիտարկմամբ՝ Գալստյանի նկատմամբ կալանավորումը որպես խափանման միջոց ընտրելու մասին առաջին ատյանի դատարանի որոշումն ապօրինի է, դրա հիմքում հիմնավոր կասկածի և կալանավորման հիմքերի վերաբերյալ որևէ փաստական տվյալ չի եղել։ Ըստ Հարությունյանի՝ ապօրինի է ոչ միայն Գալստյանին ազատազրկել, այլև՝ նրա նկատմամբ իրականացվող քրեական հետապնդումը։ Հարությունյանի խոսքով՝ նախաքննության ընթացքում ներկայացվել են անհերքելի ապացույցներ այն մասին, որ համապատասխան մատակարարումները կատարվել են սահմանված կարգով, անցել են բոլոր ընթացակարգերը և այս պահին քրեական գործի առկայությունն ու Դավիթ Գալստյանին ազատությունից զրկելը չի բխում այդ գործի նյութերից։

Ըստ ԱԱԾ տարածած հաղորդագրության՝ արտերկրում գրանցված ընկերության խորհրդի նախագահ Դ.Գ.-ն, նախնական համաձայնության գալով նույն ընկերության տնօրեն Ա.Բ.-ի հետ, ի սկզբանե առանձնապես խոշոր չափերի գումար հափշտակելու դիտավորությամբ, ընկերության անունից ՀՀ պաշտպանության նախարարության հետ կնքել է պայմանագիր, որի համաձայն՝ ընկերությունը պարտավորություն է ստանձնել 2018 թվականի ընթացքում, ՀՀ ԶՈՒ ԳՇ կարիքների համար մատակարարել 1983-1986թթ. արտադրության հրանոթի համապատասխան տրամաչափի կրակոցներ:
Այնուհետև, օգտվելով կնքված պայմանագրի ուժով ընձեռնված հնարավորությունից, Ա. Բ.-ն և Դ. Գ.-ն ձեռնամուխ են եղել կնքված պայմանագրի առարկային չհամապատասխանող գույքը խաբեությամբ իրացնելու և դրա դիմաց ՀՀ պաշտպանության նախարարությունից առանձնապես խոշոր չափերի գումար հափշտակելու ուղղակի դիտավորության իրագործմանը և այդ նպատակով պայմանագրով նախատեսված հրանոթի համապատասխան տրամաչափի կրակոցների փոխարեն, խաբեության եղանակով՝ թաքցնելով մատակարարված գույքի տակտիկատեխնիկական բնութագրին չհամապատասխանելու փաստը, մեկ միասնական դիտավորությամբ, ՊՆ-ին են մատակարարել ընդհանուր՝ 523.089.000 ՀՀ դրամին համարժեք, 1.083.000 ԱՄՆ դոլար արժեքով ավելի հին՝ 1977 թվականի Չեխական արտադրության մեկ այլ տեսակի հրանոթի կրակոցներ, որոնք իրենց մարտավարական և տեխնիկական հատկանիշներով էապես զիջել են այն հրանոթի կրակոցներին, որոնց համար դրանք մատակարարվել են, մասնավորապես՝ չեն ապահովել թիրախի խոցման հեռավորությունը, ձգաբանական բնութագրով չեն համապատասխանել ՊՆ-ի տրամադրության տակ առկա հրանոթների կրակոցի ձգաբանական բնութագրին և ՀՀ զինված ուժերում գործող լեռնային հրաձգության աղյուսակի պարամետրերին, հետևաբար անհնար է եղել մատակարարված կրակոցները կիրառելու դեպքում լուծել մարտական խնդիրներ, որի արդյունքում կնքված պայմանագրի հիման վրա ընկերության հաշվին է փոխանցվել առանձնապես խոշոր չափերի՝ 523.089.000 ՀՀ դրամին համարժեք, 1.083.000 ԱՄՆ դոլար՝ այդ կերպ խարդախությամբ հափշտակվել է առանձնապես խոշոր չափերի հիշյալ գումարը:

Հեղինակ՝ Իզաբել Սահակյան

Աղբյուր` Փաստինֆո