Փաստ ինֆո

«ՀՀ-ում վարչապետի աթոռը զբաղեցնող անձը քաղաքական հոգեվարքի մեջ է և փորձ է անում փրփուրներից կախվել: Նախօրեին Գյումրի կատարած այցի ընթացքում, հայտնի մարդկանց միջոցով ակնհայտ բեմադրված դրվագները հենց այս մասին են խոսում, - «Փաստինֆո»-ի հետ զրույցում ասել է ՀՅԴ անդամ Բագրատ Եսայանը՝ նշելով, որ Փաշինյանը փորձում է հիմնավորել ապագա բռնապետություն հաստատելու իր երազանքը։ «Վստահեցնում եմ, որ աշխարհի որևէ երկրում նման կեպով վարկաբեկված և պետությունն աղետի և կործանման հասցրած անձն ի վիճակի չէ ոչ միայն բռնապետություն հաստատել, այլև ամբողջական վերահսկողություն իրականացնել պետական համակարգի բոլոր ոլորտների նկատմամբ՝ ժողովրդին ահ ու սարսափի մթնոլորտում»,- ընդգծել է անդամ Բագրատ Եսայանը։

Հիշեցնենք՝ Նիկոլ Փաշինյանի փետրվարի 17-ին Շիրակ կատարած այցի մասին կառավարությունը տեսանյութ էր տարածել՝ ներկայացնելով, թե, իբր, բնակիչները որոշ գյուղական վայրերում կանգնեցրել են Փաշինյանի շարասյունն ու իրենց վստահությունը հայտնել նրան։ Սակայն տեսանյութն իրականում պարունակում էր ատելության եւ բռնության քարոզ. Կառավարության տեսանյութում քարոզվում էր վերացնել «ռոբասերժական կլանին»։

Իրեն զրպարտելու կամ վիրավորելու համար սահմանած տուգանքները, հատուկ դատարաններ կազմակերպելը, օր ու մեջ պետական ապարատի աշխատակիցներին փոփոխելը և նմանօրինակ անտրամաբանական քայլերը, ըստ Բագրատ Եսայանի, մեկ նպատակի են ծառայում՝ հնարավորինս երկար կառչած մնալ իշխանական աթոռից, թեկուզև՝ նվաստացուցիչ պայմաններում, այնուամենայնիվ, շարունակել պաշտոնավարումը. «Հողատուի նկատմամբ հասարակական մերժումն ու արհամարհանքն այսօր այնքան խորն է, որ պետական ապարատն, ուղղակի, կաթվածահար է եղել: Մնացյալը խիստ էժանագին քարոզչություն է, որն, իրեն քաղաքական գործիչ համարող անձը, ողջ վարչական ռեսուրսով և վաղուց մերժված ու պարտվողական գաղափարախոսությամբ փորձում է ներկայացնել, իբր ժողովրդի վստահություն, ինչն ակնհայտ կերպով ոչ միայն չկա, բացակայում է, այլև տեղը զիջել է խորը արհամարհանքին ու ատելությանը»:

Առաջիկա օրերի համար Բագրատ Եսայանը քաղաքական ակտիվ պայքարի դրսևորումներ է կանխատեսում. «Քանի դեռ վարչապետ աշխատող անձը չի հասկացել, որ երկիրը փրկելու և ստեղծված իրավիճակից դուրս գալու միակ տրամաբանական ելքն իր ինքնակամ հեռացումն է, նա քաղաքական երկխոսությունից դուրս՝ շատ ավելի խիստ ու կոշտ փողոցային պայքարի դրսևորումների հետ է առճակատվելու: Ուրիշ ճանապարհ, ուղղակի չկա: Երկրում ստեղծված անելանելի այս իրավիճակը շտապ լուծում է պահանջում, իսկ այդ լուծումն իր հեռացմամբ է լինելու:

Պարտադրված պատերազմի և դրա դավադիր ու խայտառակ պարտությունից հետո, անգամ հիմա նա զբաղված է իր սիրելի զբաղմունքով՝ հասարակությունը պառակտելու, երկրի ներսում վտանգավոր բևեռացումները սրելու, մարդկանց իրար դեմ հանելու, ատելության էսկալացիա իրականացնելու գործով:

Հետաքրքիր է՝ ինքը կարդո՞ւմ է իր ուղիղ միացումների տակ գրված մեկնաբանությունները, որտեղ հարյուրավոր մարդիկ, արդեն հայհոյանքից անցել են սպառնալիքներին, որը շուտով բռնության կոչերից շ կոնկրետ գործողությունների է վերածվելու, ինչը Հայաստանի այսօրվա դրության պայմաններում, ուղղակի, աղետաբեր կարող է լինել: Այլ կերպ ասած, այս մարդը քաղաքացիական պատերազմի ուղին է ընտրել, և ես չեմ կասկածում, որ նա ամեն ինչ անելու է՝ քաղաքացիական պատերազմ հրահրելու և ժողովրդի արյունը թափելու գնով մնալ իշխանության, սակայն ուզում եմ տեղեկացնել, որ, նույնիսկ այդ ճանապարհով, իշխանության ղեկին մնալու որևէ շանս նա այլևս չունի»:

Վերջինս նկատում է՝ Փաշինյանի նկատմամբ հասարակական ատելություն ալիքն այնքան մեծ է, որ ինքն այլևս չի պատկերացնում, թե ովքե՞ր են լինելու այն մարդիկ, ովքեր իրենց կյանքը զոհելու հաշվին, կգնան դավաճան իշխանությանը և դրա անփառունակ ղեկավարին պաշտպանելու ուղիով: Ամփոփելով զրույցը, Բագրատ Եսայանը վստահություն է հայտնում՝ նույնիսկ Ոստիկանությունն ու ԱԱԾ-ն, որ դեռևս ճիգեր են գործադրում մնալու իրենց պետական գործառույթների շրջանակներում, երբ տեսնեն, թե ինչպես է սեփական աթոռը պահելու համար երկրի առաջին դեմքը գնում ժողովրդի արյունը թափելու ճանապարհով, նույնիսկ այդ կառույցները շատ արագ վայր կդնեն իրենց զենքերն ու կմիանան ժողովրդին:

Հեղինակ՝ Նվարդ Մանվելյան

Աղբյուր` Փաստինֆո