Փաստ ինֆո

«Հայ ժողովուրդը 2018 թվականին քաղաքական հիմարություն է գործել, որի համար հիմա հատուցում է, այլ կերպ ասած՝ հայ ժողովուրդը պատժվում է, այսինքն, հիմա գնում է հայ ժողովրդի պատժվելու գործընթացը,- «Փաստինֆո»-ի հետ զրույցում ասել է հասարակական գործիչ, «Վերելք» հաղորդաշարի հեղինակ Արծրուն Պեպանյանը եւ ավելացրել. «Այն, ինչ կատարվում է մեր երկրում՝ վերջին տարիների ընթացքում, հասնում է հայ ժողովրդին, որովհետև սա կյանքի օրենքն է»։ 

Հրապարակախոսի դիտարկմամբ՝ այսքան անմտություններից հետո, նույնիսկ, «պատերազմն էր մեզ քիչ»։ «Ասեմ նաև, որ այդ պատերազմը դեռ չի ավարտվել, այն դեռ շարունակվելու է և տևելու այնքան ժամանակ, քանի դեռ մենք խելքի չենք եկել և ինքներս մեզ հարց չենք տալիս՝ իսկ ի՞նչ պետք է անել: Կամ մենք կվերանանք, կամ կվերածնվենք, որովհետև ուրիշ այլ տարբերակ այստեղ, ուղղակի, չկա»,- ասել է Արծրուն Պեպանյանը:

Անդրադառնալով երկրի ներքաղաքական կյանքում տեղի ունեցող տարատեսակ զարգացումներին, վերջինս նկատում է՝ ինքն իրեն այլևս բարոյական իրավունք չի վերապահում դատապարտել այս կամ այն գործողությունը՝ ազգովի սխալներ ենք արել, պետք է պատասխան տանք։ «Մենք մոռացել ենք, որ բացի մարդկային օրենքներից, գոյություն ունեն նաև բնական՝ աստվածային և տիեզերական օրենքներ, որոնք, անկախ երկրի ներսում տեղի ունեցող այս կամ այն զարգացումներից, գործում են մեզանից անկախ: Խելք էր պետք ունենալ՝ չհասնելու համար այս վիճակին, բայց, քանի- որ մենք արդեն այս իրավիճակի մեջ ենք, պետք է ընդունենք մեր պատիժը և հասկանանք՝ ինչպե՞ս դուրս գալ այս իրավիճակից: Եվ, ահա, այսքանից հետո, դուք ինձ հարցնում եք Դատախազության և Արդարադատության նախարարության կողմից առաջ քաշած ինչ - որ օրենքի նախագծի կամ տուգանքների թեմայի մասի՞ն…Ի՞նչ արժեք ունի քննարկել ինչ – որ մի տուգանքի թեմա, այսքանից հետո: Սխալվել եք՝ տուգանվեք, թե չէ շերեփներով դատարկ կաթսաներին էիք խփում՝ ձեր դատարկ գլուխներին խփեիք, գուցե ավելի օգուտ տար… »,- է նշել է հրապարակախոսը:

Արծրուն Պեպանյանը ցավով նշում է՝ ժամանակին ասել է՝ եթե Աստված ցանկանա հայ ժողովրդին այս թմբիրից հանել և ուշքի բերել, պատերազմ կուղարկի նրա վրա, փաստորեն այդպես էլ եղավ։ «Հիմա, արդեն, խոսելու ժամանակ չկա, արդեն գործելու պահն է, նույնիսկ շատ ենք ուշացել, ես կասեի: Վաղը Ազատության հրապարակում կրկին հանրահավաք է: Ինքս լինելու եմ այնտեղ, իմ ֆեսբուքյան էջով էլ հայտնել եմ, որ մտահոգ մարդիկ նույնպես ներկա լինեն այդ հավաքին: Իհարկե, այս իրավիճակից պետք է անհապաղ կերպով դուրս գալու ելքեր փնտրել և այդ իմաստով, այս հանրահավաքն, իհարկե, արդարացված է: Սակայն մեծ հարց է՝ ի՞նչ ծրագիր են առաջ քաշելու հանրահավաքի կազմակերպիչները, ի՞նչ ելքեր են տեսնում ստեղծված իրավիճակից դուրս գալու համար՝ հարթակում հավաքված լիդերները, որովհետև օրվա իշխանություններին հեռացնելուց հետո, դա, թերևս, ամենակարևոր հարցն է լինելու:

Երբ 2018 թվականի ապրիլի 23-ին քայլում էի Հանրապետության հրապարակում և տեսնում էի պայթող շամպայների ձայների ներքո հազարավոր մարդկանց հրճվանքն ու երջանկությունն, ասացի՝ այստեղ հավաքված բոլոր մարդկանց անտանելի մեծ հիասթափություն է սպասվում և լավ կլինի, եթե նրանք կարողանան դուրս գալ այդ հիասթափության ծանր հարվածի տակից: Հիմա էլ նույնն եմ ուզում ասել՝ լավ կլինի, որ Ազատության հրապարակում հավաքված մարդիկ, ի վերջո հասկանան, ինչո՞ւմ են նրանք այսքան ժամանակ սխալվել, որ հասել ենք այս օրվան, որպեսզի նույն սխալը չկրկնեն, որովհետև այս անգամ, արդեն, գուցե վերակենդանանալու հնարավորություն մեզ այլևս չընձեռվի…»,- ամփոփելով զրույցն, ասում է Արծրուն Պեպանյանը:

Հեղինակ՝ Նվարդ Մանվելյան

Աղբյուր` Փաստինֆո