Փաստ ինֆո

Փորձ է արվում քաղաքական օրակարգի մեջ դնել վարկած, որ հասարակության մի հատվածը պահանջում է գործող վարչապետից թավիշը դադարեցնել և ավելի կոշտ գործողությունների անցնել ընդդիմության հանդեպ: Այս մասին «Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը՝ անդրադառնալով` Նիկոլ Փաշինյանի՝ Շիրակի մարզ կատարած այցին:

Հիշեցնենք՝ Նիկոլ Փաշինյանի փետրվարի 17-ին Շիրակ կատարած այցի մասին կառավարությունը տեսանյութ էր տարածել՝ ներկայացնելով, թե, իբր, բնակիչները որոշ գյուղական վայրերում կանգնեցրել են Փաշինյանի շարասյունն ու իրենց վստահությունը հայտնել նրան։ Սակայն տեսանյութն իրականում պարունակում էր ատելության եւ բռնության քարոզ. Կառավարության տեսանյութում քարոզվում էր վերացնել «ռոբասերժական կլանին»։

«Ռոբասերժական կլանը կերել է այս ժողովրդին, վերացրեք այդ կլանին: Թող մի հատ էլ ընտրություն լինի և ժողովուրդը կապացուցի՝ ով, ով է և նրանց պատմության աղբանոցը կնետի»,-դիմելով Փաշինյանին՝ ասվում էր կառավարության տարածած տեսանյութում։

Քաղտեխնոլոգ Վիգեն Հակոբյանը այս քայլը որակեց քարոզչական հնարք, գործողությունների շարք, որը պետք է իբրև որոշակի եզրակացությունների բերի իշխանությանը և իշխանությունը, որպես ժողովրդի իշխանություն, պետք է արձագանքի այդ պահանջին.

«Հետագայում եթե իշխանությունը փորձի ռեպրեսիվ մեթոդների անցնի ընդդիմության նկատմամբ, կպատճառաբանի, որ նման հասարակական պահանջ էր ձևավորել երկրում»,-ասաց Վիգեն Հակոբյանը:

Փորձագետը նկատում է, որ իշխանությունը նման քայլերով հակախաղեր ստեղծելու փորձեր է անում.
«Հասարակության մեջ կա մեծ զանգված, որը պահանջում է գործող իշխանության հրաժարականը, իշխանությունն էլ փորձում է հակախաղ ստեղծել և քաղաքական օրակարգեր ձևավորել: Հասարակության մեջ ատելությունն այնքան մեծ է, որ այն նվազեցնել կամ ավելացնել հնարավոր չէ: Երբ վարչապետը ճանապարհին չորս անգամ իջնում է, և ճանապարհին նրան 15-20 հոգի են դիմավորում նույն հարցերն են տալիս, նույն ֆրազներով խոսում են , այն զգացումն է, որ դա ինչ-որ բեմականացում է»,-ասաց զրուցակիցը:

Քաղտեխնոլոգը միևնույն ժամանակ նկատում է, որ նույնիսկ կապիտուլյացիայից հետո հասարակության մեջ կա զանգված, որ աջակցում է Նիկոլ Փաշինյանին և իր վարչախմբին.

«Անզեն աչքով երևում է նաև, որ վարչապետի աջակիցների թիվը զգալիորեն նվազել է: 2020թ-ին շատ բան տեղի ունեցավ, որը չէր կարող ինչ-որ կերպ չազդել մարդկանց տրամադրությունների վրա, հակառակ դեպքում դա կնշանակեր, որ մենք չունենք ադեկվատ ժողովուրդ: Երբ 2018թ-ին Նիկոլ Փաշինյանը գնում էր Գյումրի, ամեն գյուղի մոտ հազարավոր մարդիկ էին մոտենում, իսկ հիմա այնտեղ տեսանք կային ընդամենը 20 հոգի, որոնք նույն ֆրազներով էին Փաշինյանին դիմավորում, նույն հարցերն էին բարձրացնում, կասկածելի էլեմենտներ կային, որ այնտեղ շոու էր կազմակերպված»,-նկատում է փորձագետը:

Քաղտեխնոլոգը բնական է համարում, որ իշխանությունը փորձում է քաղաքական նոր օրակարգ ձևավորել.
«Քաղաքական պայքար է, պետք է լինի այդ ամենը, ուղղակի շատ բաներ ակնհայտ են արվում առանց կրեատիվի, դա պայմանավորված է նրանով, որ ոչ թե չեն ուզում անել, այլ ռեսուրս չունեն այդքան»,-ասաց Վիգեն Հակոբյանը:

Քաղաքագետը նաև նկատում է, որ երբ ընդդիմությունը համակարգված է աշխատում, հազարավոր մարդկանց կարողանում է փողոց հանել, իսկ իշխանությունը իր փողոցի ռեսուրսը դեռևս ի ցույց չի դրել, ապրում է հին հիշողություններով.

«Եթե համարենք, որ այսօրվա ընդդիմությանը չի հաջողվում իր կողմնակիցներին փողոց հանել, իսկ իշխանությունն էլ ակնհայտորեն նման ռեսուրսներ չունի, ապա կարող ենք արձանագրել, որ տվյալ պահին ժողովուրդն ապատիայի մեջ է գտնվում՝ ո՛չ իշխանությանն է աջակցում, ո՛չ էլ՝ ընդդիմությանը»,-ասաց Վիգեն Հակոբյանը:

Աղբյուր` Փաստինֆո