Փաստ ինֆո

ԱԺ նախկին պատգամավոր Արագած Ախոյանը կմնա ազատության մեջ։ Վերաքննիչ քրեական դատարանը՝ դատավոր Նարինե Հովակիմյանի նախագահությամբ, մերժել է Արագած Ախոյանի նկատմամբ կալանավորումը որպես խափանման միջոց ընտրելու միջնորդությունը մերժելու որոշման դեմ դատախազի բողոքը։ Արագած Ախոյանի պաշտպան Բենիկ Գալստյանը «Փաստինֆո»-ի հետ զրույցում ասաց, որ առաջին ատյանի դատարանը կալանավորման միջնորդությունը մերժել էր՝ հիմնավոր կասկածի հիմքով և չէր անդրադարձել հիմքերին, իսկ դատախազը վերաքննիչ բողոք էր բերել ընդհանրական՝ թե՛ հիմնավոր կասկածի, թե՛ հիմքերի մասով, սակայն դատարանը քննության է առել միայն հիմնավոր կասկածի մասով։ Պաշտպանը դատարանի որոշումը դեռևս չի ծանոթացել, բայց ակնառու է, որ դատարանը մերժել է հենց հիմնավոր կասկածի բացակայության համար։ 

Ավելի վաղ հայտնել ենք, որ Երևանի ընդհանուր իրավասության դատարանի դատավորները մերժել են Արագած Ախոյանին, Արշակ Զաքարյանին, Իսրայել Հակոբկոխյանին, Տիգրան Չոբանյանին և Վահագն Չախալյանին կալանավորելու մասին քննիչի միջնորդությունները՝ հիմնավոր կասկածի բացակայության հիմքով։ Դատախազությունը բողոքարկել է դատարանի որոշումները՝ պահանջելով կալանավորել վերջիններիս։

Ինչ վերաբերում է մյուսների վերաբերյալ ներկայացված բողոքներին, ապա հարկ է նշել, որ Վերաքննիչ դատարանը՝ դատավոր Արշակ Վարդանյանի նախագահությամբ, մերժել է բռնցքամարտիկ, աշխարհի և Եվրոպայի չեմպիոն Իսրայել Հակոբկոխյանի նկատմամբ կալանավորումը որպես խափանման միջոց ընտրելու միջնորդությունը մերժելու որոշման դեմ դատախազի բողոքը։

Վերաքննիչ դատարանը քննվել է նաև «Կամք» հասարակական նախաձեռնության հիմնադիր Վահագն Չախալյանի կալանավորումը մերժելու որոշման դեմ դատախազության բողոքը։ Չախալյանի պաշտպան Միքայել Շխիմյանը «Փաստինֆո»-ի հետ զրույցում տեղեկացրեց, որ վերաքննիչ քրեական դատարանում՝ դատավոր Արմեն Դանիելյանի նախագահությամբ, երեկ կայացել է դատական նիստը, որի ընթացքում դատախազության կողմից բերված բողոքի քննությունն, ըստ էության, ավարտվել է, սակայն դատարանը խորհրդակցական սենյակ դեռևս չի հեռացել։ Հաջորդ դատական նիստը նշանակվել է փետրվարի 23-ին՝ ժամը 17։30-ին։ Դատախազի կողմից բերված բողոքում վերջինս վիճարկել է հիմնավոր կասկածի առկայության հարցը՝ պնդելով, որ պետք է դիտարկել համակցության մեջ, մասնավորապես, թեև անձամբ կոնկրետ կոչերով հանդես չի եկել Վահագն Չախալյանը կամ գործողություններ կատարել, բայց համակցության մեջ դիտարկելիս՝ մեկը մյուսի արարքը լրացնելով, միասնական դիտավորությամբ ցանկացել են զավթել շենքը, ինչը չի ստացվել՝ իրենց կամքից անկախ։ Պաշտպանական կողմը ներկայացրել է իր դիտարկումները և առարկությունները՝ դատախազության բողոքի վերաբերյալ։ Նշենք, որ դատավոր Արմեն Դանիելյանի նախագահությամբ կքննվի նաև Տիգրան Չոբանյանին չկալանավորելու որոշման դեմ դատախազության բողոքը։

Ինչպես տեղեկացրել ենք՝ հունվարի 28-ին Փաշինյանի հրաժարականի պահանջով հայահավաք է իրականացվել, որի ընթացքում 21 անձ բերման է ենթարկվել ՀՀ քրեական օրենսգրքի 219-րդ հոդվածի հատկանիշներով՝ շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելու կամ դրանք պահելու կասկածանքով։ Նույն հոդվածի հատկանիշներով հարուցվել է քրեական գործ, որի շրջանակներում հինգ անձ ձերբակալվել է՝ Արագած Ախոյանը, Արշակ Զաքարյանը, Վահագն Չախալյանը, Տիգրան Չոբանյանը և Իսրայել Հակոբկոխյանը։ Վարույթ իրականացնող մարմինը նրանց մեղադրանք է առաջադրել՝ ՀՀ քրեական օրենսգրքի 34-219-րդ հոդվածի 2-րդ մասի 1-ին կետի՝ մի խումբ անձանց կողմից նախնական համաձայնությամբ շենք-շինություններ զավթելու փորձի հատկանիշներով։ Վարույթն իրականացնող մարմինը նրանց նկատմամբ կալանավորումը որպես խափանման միջոց ընտրելու մասին միջնորդություններ էր ներկայացրել դատարան, որոնք մերժվել են՝ հիմնավոր կասկածի բացակայության հիմքով։ Միևնույն ժամանակ դատավորները ոչ իրավաչափ են համարել Արագած Ախոյանի, Արշակ Զաքարյանի, Վահագն Չախալյանի, Տիգրան Չոբանյանի և Իսրայել Հակոբկոխյանի ձերբակալությունը՝ բավարարելով պաշտպանների բողոքները։

Հեղինակ՝ Իզաբել Սահակյան

Աղբյուր` Փաստինֆո