Փաստ ինֆո

ՀՀ երրորդ նախագահի հարցազրույցը լի էր իրարամերժ պնդումներով, որոնք ավելի շատ հարցեր են առաջացրել, քան տվել են պատասխաններ։ Խորհրդարանում լրագրողների հետ զրույցի ժամանակ այս մասին ասաց ԱԺ «Իմ քայլը» խմբակցության ղեկավար Լիլիթ Մակունցը։

«Այն շեշտադրումները, որն անում է Սերժ Սարգսյանն իր հարցազրույցի ընթացքում, ինքը և իր քաղաքական թիմն այդ շեշտադրումներով չեն վարել հանրային քաղաքականություն։ Այդ շեշտադրումները որևէ կերպ արտացոլված չեն եղել իրենց հանրային քաղաքականությունում օրինակ 2017թ․-ի նախընտրական ժամանակաշրջանում կամ 2020թ․-ին՝ պատերազմի ընթացքում։ Հակառակը հնչել են թեզեր, որոնք եղել են ծայրահեղ հակառակ թևում։ Ցանկացած շերտ, որը փորձ է արել որևէ կերպ այլ դիսկուրս ներմուծել քաղաքական դաշտ, արժանացել է ծայրահեղական պիտակումների։ Հարց է առաջանում, թե ինչի՞ն էին սպասում նրանք, ինչու՞ է այս հարցազրույցն այն ժամանակ, երբ դրա կարիքը չկա»,-ասաց Լիլիթ Մակունցը։

Հարցին՝ եթե փետրվարի 20-ին լինի բազմամարդ հանրահավաք, հնարավո՞ր է վերանայեն արտահերթ ընտրություններից հրաժարվելու իրենց որոշումը, Լիլիթ Մակունցը նկատեց՝ իրենք չեն նշել, որ որևէ բանից հետ են կանգնում․

«Նշել ենք, որ արձագանքում ենք ընդդիմության իշխանափոխության առաջարկին, որը տեսնում են բացառապես ընտրությունների միջոցով։ Ասում ենք, որ եթե ընդդիմությունը գտնում է, որ նման անհրաժեշտություն կա, մենք առարկություն չունենք։ Ընդդիմությունը մեր այդ ձեռքմեկնմանը դրական չի արձագանքել։ Ինչ վերաբերում է ընդդիմության հանրահավաքին, ապա դա իրենց իրավունքն է՝ օրենքի և օրինականության շրջանակներում իրականացնել իրենց իրավունքները»,-ասաց Լիլիթ Մակունցը։

Աղբյուր` Փաստինֆո